અમરેલી જિલ્લામાં સોશિયલ મીડિયા પર એક કથિત વીડિયો વાયરલ થતાં રાજકીય વર્તુળોમાં ચર્ચા શરૂ થઈ છે. વાયરલ વીડિયોને ખાંભા તાલુકાના ભાજપના કારોબારી ચેરમેન ભાવેશ જાદવ સાથે જોડવામાં આવી રહ્યો છે. જોકે, વાયરલ વીડિયોની પ્રામાણિકતા અને તેમાં કરવામાં આવતા દાવાઓની સ્વતંત્ર રીતે પુષ્ટિ થઈ નથી.
સોશિયલ મીડિયા પર ચાલી રહેલા દાવા મુજબ વીડિયો ચાર દિવસ જૂનો હોવાનું જણાવવામાં આવી રહ્યું છે. વીડિયોમાં ગ્રામ પંચાયતની સરપંચ ચૂંટણીને લઈને ચર્ચા થતી હોવાનો અને કાર્યકર દ્વારા મસાજ કરાવવામાં આવતું હોવાનો દાવો કરવામાં આવી રહ્યો છે. જોકે આ દાવાઓ અંગે કોઈ સત્તાવાર નિવેદન અથવા પુષ્ટિ સામે આવી નથી.
ભાજપના પ્રશિક્ષણ કાર્યક્રમ દરમિયાનનો હોવાનો દાવો
મળતી માહિતી મુજબ આ વીડિયો ધારી ગીર વિસ્તારમાં આવેલા લાયનડેન રિસોર્ટનો હોવાનું સોશિયલ મીડિયા પર દાવો કરવામાં આવી રહ્યો છે. અહીં ભાજપનું પ્રશિક્ષણ અભિયાન યોજાયું હતું અને પક્ષના વિવિધ હોદ્દેદારોનું રાત્રિ રોકાણ પણ થયું હોવાનું જણાવવામાં આવી રહ્યું છે.
જોકે વાયરલ વીડિયોને આ કાર્યક્રમ સાથે જોડતા દાવાઓની પણ સ્વતંત્ર રીતે પુષ્ટિ થઈ નથી. સંબંધિત પક્ષ અથવા નેતાઓ તરફથી પણ આ અંગે કોઈ સત્તાવાર સ્પષ્ટતા જાહેર કરવામાં આવી નથી.
આ પણ વાંચો: કોંગ્રેસ નેતાએ વેજ બિરયાની મંગાવી, ઘરે પહોંચ્યું નોનવેજ : વડોદરામાં રેસ્ટોરન્ટની મોટી ભૂલથી હોબાળો
વાયરલ વીડિયો બાદ રાજકીય ચર્ચા તેજ
વીડિયો સોશિયલ મીડિયા પર વાયરલ થતાં સમગ્ર પંથકમાં ચર્ચાઓ શરૂ થઈ છે. જોકે સોશિયલ મીડિયા પર વાયરલ થતી કોઈ પણ સામગ્રીને તેની સત્તાવાર પુષ્ટિ વિના અંતિમ સત્ય તરીકે માનવી યોગ્ય નથી. આ સમગ્ર મામલે સંબંધિત વ્યક્તિ અથવા ભાજપ તરફથી કોઈ સત્તાવાર પ્રતિસાદ સામે આવે છે કે નહીં તેના પર સૌની નજર છે. જો આ મામલે કોઈ સત્તાવાર નિવેદન અથવા સ્પષ્ટતા જાહેર થશે તો તે અનુસાર સમાચારને અપડેટ કરવામાં આવશે.
નોંધ: આ અહેવાલ સોશિયલ મીડિયા પર વાયરલ થયેલા દાવાઓ અને ઉપલબ્ધ માહિતી પર આધારિત છે. વાયરલ વીડિયોની પ્રામાણિકતા અંગે Offbeat Stories કોઈપુષ્ટિ કરતું નથી.
