Gandhinagar CBDC inauguration: કેન્દ્રીય ગૃહ અને સહકાર મંત્રી અમિત શાહે આજે ગાંધીનગરમાં દેશની પ્રથમ સેન્ટ્રલ બેંક ડિજિટલ કરન્સી (CBDC) આધારિત જાહેર વિતરણ વ્યવસ્થા (PDS)નું ઉદ્ઘાટન કર્યું. આ પહેલ ભ્રષ્ટાચારને સંપૂર્ણપણે નાબૂદ કરીને પારદર્શિતા અને કાર્યક્ષમતા વધારવા માટે 'ડિજિટલ ઇન્ડિયા' અભિયાન હેઠળ શરૂ કરવામાં આવી છે.આ નવી વ્યવસ્થામાં લાભાર્થીઓને ડિજિટલ ટોકન્સ (e-Rupee CBDC) તરીકે સબસિડી મળશે, જે તેમના ડિજિટલ વૉલેટમાં ક્રેડિટ થશે. આ ટોકન્સ ચોક્કસ અનાજ, માત્રા અને સબસિડી દર નક્કી કરશે. પાયલટ તબક્કામાં અમદાવાદ (સાબરમતી ઝોન), સુરત, આણંદ અને વલસાડ જિલ્લામાં 26,333 પરિવારોને આવરી લેવામાં આવ્યા છે.
અન્નપૂર્તિ ગ્રેઇન ATM
આ કાર્યક્રમમાં 'અન્નપૂર્તિ' નામનું અદ્યતન અનાજ ATM પણ ઉદ્ઘાટિત કરવામાં આવ્યું, જે 24 કલાક કાર્યરત રહેશે. આ મશીન માત્ર ઘઉં-ચોખા જ નહીં, પરંતુ 1 કિલો તુવેર દાળ, 1 કિલો ચણા, મીઠું અને ખાંડ પણ પેક્ડ સ્વરૂપમાં આપશે. 35 સેકન્ડમાં 25 કિલો સુધી અનાજ વિતરિત કરી શકે છે. આ મશીન "મેડ ઇન ગુજરાત" છે અને ટેકનોલોજી તથા સંવેદનશીલતાનું અદ્ભુત સંયોજન છે.
ખાદ્ય સુરક્ષામાં સૌથી મોટો ફેરફાર સાબિત થશે
અમિત શાહે જણાવ્યું કે આ સિસ્ટમ આધાર-આધારિત બાયોમેટ્રિક ઓળખ સાથે જોડાયેલી છે, જેથી વચેટિયાઓને દૂર કરીને દરેક ગરીબ વ્યક્તિને તેનો હક્ક સુરક્ષિત રીતે મળે. આગામી 3-4 વર્ષમાં આ વ્યવસ્થા દેશભરમાં લાગુ થશે, જે "એક રાષ્ટ્ર, એક રેશન કાર્ડ" પછી ખાદ્ય સુરક્ષામાં સૌથી મોટો ફેરફાર સાબિત થશે. આ પહેલ RBI, ભારતીય ખાદ્ય નિગમ અને ઇલેક્ટ્રોનિક્સ-આઈટી મંત્રાલયના સહયોગથી અમલમાં મુકાઈ છે. ડિજિટલ ઇન્ડિયાની સફળતાના પ્રતીક તરીકે ભારત હવે વિશ્વમાં અડધા ડિજિટલ વ્યવહારો કરે છે, અને આ સિસ્ટમ ભ્રષ્ટાચારમુક્ત, પારદર્શક ભારતનું નવું અધ્યાય ખોલશે!
