ગાંધીનગર: કેન્દ્રિય ગૃહમંત્રી અમિત શાહના બે દિવસીય ગુજરાત પ્રવાસનો આજે બીજો દિવસ છે. આજે તેમના અનેક મહત્વપૂર્ણ કાર્યક્રમો નિર્ધારિત હતા, જેમાં ગાંધીનગર સ્થિત નેશનલ ફોરેન્સિક સાયન્સિસ યુનિવર્સિટી (NFSU) ખાતે યોજાનારી ઇન્ટરપોલની 11મી ડિજિટલ ફોરેન્સિક એક્સપર્ટ ગ્રુપ (DFEG) બેઠકના ઉદ્ઘાટન સમારોહમાં હાજરી અને દહેગામ APMC ખાતે વિવિધ વિકાસકાર્યોના લોકાર્પણનો સમાવેશ થતો હતો. જોકે, કતારના પૂર્વ આમીર શેખ હમાદ બિન ખલીફા અલ-થાનીના નિધનને પગલે ભારત સરકારે એક દિવસનો રાષ્ટ્રીય શોક જાહેર કરતા NFSU ખાતે યોજાનારો ઉદ્ઘાટન સમારોહ મોકૂફ રાખવામાં આવ્યો છે. આ નિર્ણયને કારણે અમિત શાહનો સવારે યોજાનારો કાર્યક્રમ રદ કરવામાં આવ્યો છે. જોકે, દિવસના બીજા ભાગમાં દહેગામ ખાતેનો કાર્યક્રમ અગાઉથી નક્કી કરાયેલા સમયપત્રક મુજબ યોજાય તેવી શક્યતા છે.
NFSUમાં યોજાનાર આંતરરાષ્ટ્રીય કાર્યક્રમ મોકૂફ
ગાંધીનગરની નેશનલ ફોરેન્સિક સાયન્સિસ યુનિવર્સિટી ખાતે 13 જુલાઈ, 2026ના રોજ ઇન્ટરપોલની 11મી ડિજિટલ ફોરેન્સિક એક્સપર્ટ ગ્રુપ બેઠકના ઉદ્ઘાટન માટે કેન્દ્રીય ગૃહમંત્રી અમિત શાહ સવારે પહોંચવાના હતા. આ બેઠકમાં વિશ્વભરના નિષ્ણાતો ડિજિટલ ફોરેન્સિક, સાયબર ક્રાઇમની તપાસ, ડિજિટલ પુરાવાઓના વૈજ્ઞાનિક વિશ્લેષણ અને આધુનિક ટેક્નોલોજી આધારિત ગુનાઓ સામેની તપાસ પદ્ધતિઓ જેવા મહત્વના મુદ્દાઓ પર ચર્ચા કરવાના હતા. પરંતુ કતારના પૂર્વ આમીરના અવસાન બાદ ભારત સરકારે એક દિવસનો રાષ્ટ્રીય શોક જાહેર કર્યો છે. તેના અનુસંધાને NFSU દ્વારા ઉદ્ઘાટન સમારોહ મોકૂફ રાખવાનો નિર્ણય લેવામાં આવ્યો છે.
યુનિવર્સિટીના ગાંધીનગર કેમ્પસના ડાયરેક્ટર પ્રો. (ડૉ.) એસ. ઓ. જુનારેએ સત્તાવાર અખબારી યાદી જાહેર કરીને જણાવ્યું છે કે સવારે 11 વાગ્યે યોજાનાર ઉદ્ઘાટન સમારોહ હાલ માટે સ્થગિત કરવામાં આવ્યો છે. મીડિયા પ્રતિનિધિઓને પણ અત્યારે કેમ્પસ ખાતે ન આવવા સૂચના આપવામાં આવી છે. કાર્યક્રમની નવી તારીખ અને સમય અંગે ટૂંક સમયમાં જાહેરાત કરવામાં આવશે.
આ પણ વાંચો: આપત્તિ આવશે તો તરત મળશે મદદ : ગુજરાતમાં 4,526 યુવાનોને અપાઈ ખાસ તાલીમ
ઈન્ટરપોલની બેઠકનું મહત્વ
ડિજિટલ ફોરેન્સિક એક્સપર્ટ ગ્રુપ (DFEG) ઇન્ટરપોલનું મહત્વપૂર્ણ વૈશ્વિક મંચ છે, જ્યાં વિવિધ દેશોના ફોરેન્સિક અને સાયબર સુરક્ષા ક્ષેત્રના નિષ્ણાતો એકત્રિત થઈને ડિજિટલ ગુનાઓની તપાસ માટે નવી પદ્ધતિઓ, ટેક્નોલોજી અને આંતરરાષ્ટ્રીય સહયોગ અંગે ચર્ચા કરે છે. ભારતમાં આ બેઠકનું આયોજન થવું દેશના ફોરેન્સિક અને સાયબર સુરક્ષા ક્ષેત્ર માટે મહત્વપૂર્ણ માનવામાં આવી રહ્યું છે. નેશનલ ફોરેન્સિક સાયન્સિસ યુનિવર્સિટી છેલ્લા કેટલાક વર્ષોમાં ડિજિટલ ફોરેન્સિક, સાયબર સુરક્ષા અને તપાસ ક્ષેત્રે વિશેષ સંશોધન અને તાલીમ માટે આંતરરાષ્ટ્રીય ઓળખ મેળવી રહી છે.
દહેગામ APMCમાં રહેશે મહત્વનો કાર્યક્રમ
સવારેનો કાર્યક્રમ મોકૂફ રહ્યા બાદ કેન્દ્રીય ગૃહમંત્રી અમિત શાહ બપોરે અંદાજે 12:45 વાગ્યે ગાંધીનગર જિલ્લાના દહેગામ ખાતે પહોંચવાના છે. અહીં તેઓ દહેગામ કૃષિ ઉપજ બજાર સમિતિ (APMC) દ્વારા નિર્માણ કરવામાં આવેલા નવા શાક માર્કેટનું લોકાર્પણ કરશે. આ ઉપરાંત APMC દ્વારા આયોજિત અમૃત મહોત્સવ કાર્યક્રમમાં પણ તેઓ મુખ્ય અતિથિ તરીકે હાજરી આપશે. કાર્યક્રમ દરમિયાન ખેડૂતો, વેપારીઓ અને સ્થાનિક આગેવાનોની ઉપસ્થિતિ રહેવાની સંભાવના છે.
આ પણ વાંચો: પાટણમાં ચંદ્રુમાણા કેનાલ કેસમાં ચોંકાવનારો વળાંક : પતિ અને તેના મિત્ર સામે નોંધાયો ગુનો
કૃષિ બજારના આધુનિકીકરણને મળશે વેગ
દહેગામ APMC ખાતે તૈયાર કરાયેલું નવું શાક માર્કેટ ખેડૂતો અને વેપારીઓ માટે વધુ સુવિધાસભર માળખું પૂરું પાડશે તેવી અપેક્ષા છે. નવા માર્કેટમાં કૃષિ ઉપજના વેચાણ માટે આધુનિક સુવિધાઓ, વ્યવસ્થિત માર્કેટિંગ અને ખરીદી-વેચાણની પ્રક્રિયાને વધુ સરળ બનાવવાના પ્રયાસો કરવામાં આવ્યા છે. સ્થાનિક સ્તરે આ પ્રોજેક્ટને ખેડૂતો માટે મહત્વપૂર્ણ સુવિધા તરીકે જોવામાં આવી રહ્યો છે. નવા માર્કેટથી કૃષિ ઉત્પાદનોના વેપારને પ્રોત્સાહન મળશે તેમજ ખેડૂતોને પોતાની ઉપજ માટે વધુ સારી બજાર વ્યવસ્થા ઉપલબ્ધ થશે તેવી આશા વ્યક્ત કરવામાં આવી રહી છે.
રાષ્ટ્રીય શોકને પગલે બદલાયો કાર્યક્રમ
કતારના પૂર્વ આમીર શેખ હમાદ બિન ખલીફા અલ-થાનીના નિધનને પગલે ભારત સરકારે એક દિવસનો રાષ્ટ્રીય શોક જાહેર કર્યો છે. રાષ્ટ્રીય શોક દરમિયાન કેન્દ્ર સરકારના વિવિધ ઔપચારિક કાર્યક્રમોમાં જરૂરી ફેરફાર કરવામાં આવે છે અને કેટલાક સમારોહો મોકૂફ રાખવામાં આવે છે. તેના ભાગરૂપે NFSU ખાતે યોજાનારો ઉદ્ઘાટન સમારોહ પણ હાલ માટે સ્થગિત કરવામાં આવ્યો છે. જોકે, અન્ય વહીવટી અને જાહેર કાર્યક્રમો અંગે સ્થાનિક તંત્ર સમયાનુસાર નિર્ણય લઈ રહ્યું છે.
કેન્દ્રીય ગૃહમંત્રી અમિત શાહના ગુજરાત પ્રવાસનો બીજો દિવસ રાજ્ય માટે અનેક મહત્વપૂર્ણ કાર્યક્રમો સાથે જોડાયેલો હતો. સવારે આંતરરાષ્ટ્રીય મહત્વના કાર્યક્રમને રાષ્ટ્રીય શોકના કારણે મોકૂફ રાખવામાં આવ્યો છે, જ્યારે બપોરે દહેગામ APMC ખાતે વિકાસલક્ષી કાર્યક્રમોમાં તેમની હાજરી પર સૌની નજર રહેશે. આગામી દિવસોમાં NFSU ખાતે યોજાનારી ઇન્ટરપોલની બેઠકના ઉદ્ઘાટન માટે નવી તારીખ જાહેર કરવામાં આવશે.
