Ahmedabad Crime News : અમદાવાદમાં એકતરફી પ્રેમમાં પાગલ બનેલા યુવકની હરકતથી હલચલ મચી ગઈ હતી. ફતેવાડી વિસ્તારમાં રહેતી 28 વર્ષની યુવતી ખાનગી હોસ્પિટલમાં નોકરી કરે છે અને છેલ્લા છ મહિનાથી આ યુવક તેને હેરાન કરતો હતો.
એકતરફી પ્રેમની દુર્ઘટના
યુવતી સાથે એકતરફી પ્રેમ રાખનાર આ યુવકે વારંવાર સંપર્ક કરવાનો અને તકલીફ આપવા નો પ્રયત્ન કર્યો હતો. ગઇકાલે એટલે કે 27 નવેમ્બરના રોજ રાતે લગભગ 8:30 વાગ્યે યુવક કામરાન હોસ્પિટલ ખાતે યુવતીના કાર્યસ્થળે પહોંચી ગયો હતો. ત્યાં બંને વચ્ચે ફરી તકરાર થતા યુવક ઉશ્કેરાઈ ગયો અને અચાનક પોતાના શરીર પર પેટ્રોલ છાંટી દીધું. ત્યાર બાદ તેણે લાઇટરથી પોતાના શરીરને આગ લગાવી દીધી.
યુવકે આગ લગાવી...
આગની જ્વાળા વચ્ચે જ તે સળગતી હાલતમાં પહેલા માળેથી નીચે પટકાયો હતો. ઘટનામાં યુવતીને પણ ઇજાઓ પહોંચી હતી. ગંભીર રીતે દાઝેલા યુવકને તરત જ અમદાવાદ સિવિલ હોસ્પિટલ પહોંચાડવામાં આવ્યો હતો, પરંતુ ત્યાં વહેલી સવારે તેનું મોત થયું હતું. સરખેજ પોલીસે ઘટના અંગે અકસ્માતે મોતનો ગુનો દાખલ કરી આગળની તપાસ હાથ ધરી છે.
