અમદાવાદની 149મી ઐતિહાસિક ભગવાન જગન્નાથ રથયાત્રા દરમિયાન પરંપરા મુજબ ભગવાન જગન્નાથજી, બહેન સુભદ્રાજી અને ભાઈ બલભદ્રજીનું મોસાળ ગણાતા સરસપુરમાં ભવ્ય અને શ્રદ્ધાભેર મામેરું ભરવામાં આવ્યું હતું. વર્ષોથી ચાલતી આવતી આ અનોખી પરંપરાને નિહાળવા હજારો શ્રદ્ધાળુઓ મોટી સંખ્યામાં સરસપુરમાં ઉમટી પડ્યા હતા.
રથયાત્રા સરસપુર પહોંચતાં જ સમગ્ર વિસ્તાર 'જય જગન્નાથ'ના ગગનભેદી જયઘોષથી ગુંજી ઉઠ્યો હતો. ભક્તોએ ભગવાનના દર્શન કરીને ધન્યતા અનુભવી હતી, જ્યારે પરંપરાગત વિધિ-વિધાન સાથે ભગવાન જગન્નાથજી, સુભદ્રાજી અને બલભદ્રજીનું મામેરું ભરવામાં આવ્યું હતું.
આ પણ વાંચો: ગાંધીનગરનાં અડાલજમાં 5મી વખત નીકળી જગન્નાથની રથયાત્રા : CM ભૂપેન્દ્ર પટેલે પહિંદ વિધિ કરી કરાવ્યો પ્રારંભ
સરસપુરને ભગવાનનું મોસાળ માનવાની અનોખી પરંપરા
અમદાવાદની રથયાત્રામાં સરસપુરને ભગવાન જગન્નાથજીનું મોસાળ માનવામાં આવે છે. માન્યતા અનુસાર અહીં ભગવાન પોતાના મોસાળે પધારે છે, જ્યાં તેમનું પ્રેમ અને ભક્તિપૂર્વક સ્વાગત કરવામાં આવે છે તેમજ મામેરાની પરંપરા નિભાવવામાં આવે છે. આ પ્રસંગે ભગવાનને વિવિધ પ્રકારના પ્રસાદ, મીઠાઈ, ફળો અને ભેટસોગાદ અર્પણ કરવામાં આવે છે.
મામેરાની આ પરંપરા અમદાવાદની રથયાત્રાનું સૌથી વિશિષ્ટ અને ભાવનાત્મક આકર્ષણ માનવામાં આવે છે. દર વર્ષે હજારો ભક્તો આ દૃશ્યના સાક્ષી બનવા માટે સરસપુર પહોંચે છે.
આ પણ વાંચો: દ્વારકામાં અષાઢી બીજે ભક્તિમય માહોલ : ચાંદીના રથમાં બાળ દ્વારકાધીશની ભવ્ય પરિક્રમા
ભક્તિમય વાતાવરણ વચ્ચે દર્શનનો લાભ
મામેરાની વિધિ દરમિયાન ભક્તિમય વાતાવરણ સર્જાયું હતું. સુરક્ષા વ્યવસ્થા વચ્ચે શ્રદ્ધાળુઓએ વ્યવસ્થિત રીતે ભગવાનના દર્શન કર્યા હતા. સમગ્ર વિસ્તારમાં ભજન, કીર્તન અને શંખનાદ સાથે આધ્યાત્મિક માહોલ જોવા મળ્યો હતો.
ભગવાનના મોસાળે આગમન અને મામેરાની પરંપરા અમદાવાદની જગન્નાથ રથયાત્રાની આગવી ઓળખ છે, જે શહેરની સાંસ્કૃતિક અને ધાર્મિક પરંપરાને જીવંત રાખે છે.
