અમદાવાદમાં સર્જાયેલી હૃદયદ્રાવક વિમાન દુર્ઘટનાને આજે એક વર્ષ પૂર્ણ થયું છે, પરંતુ આ દુર્ઘટનામાં પોતાના યુવાન પુત્રને ગુમાવનાર ભરૂચ જિલ્લાના જંબુસર તાલુકાના સારોઠ ગામના પટેલ પરિવાર માટે સમય જાણે થંભી ગયો હોય તેવી સ્થિતિ છે. એક વર્ષ વીતી જવા છતાં પરિવારના ઘાવ હજુ તાજા છે અને પોતાના વહાલસોયા પુત્ર સાહિલ પટેલ માટે ન્યાયની આશા સાથે પરિવાર આજે પણ સંઘર્ષ કરી રહ્યો છે.
દુર્ઘટનામાં જીવ ગુમાવનાર 25 વર્ષીય સાહિલ પટેલ પોતાના ભવિષ્યના નવા સપનાઓ લઈને લંડન જવા નીકળ્યો હતો. પરિવારજનો અને મિત્રો સાથે ખુશીના વાતાવરણમાં વિદાય લીધા બાદ કોઈએ કલ્પના પણ કરી નહોતી કે થોડા જ કલાકોમાં ખુશીઓનો માહોલ શોકમાં પરિવર્તિત થઈ જશે. સાહિલનું અવસાન માત્ર પટેલ પરિવાર માટે જ નહીં, પરંતુ સમગ્ર ગામ અને વિસ્તાર માટે પણ આઘાતજનક ઘટના બની હતી.
એક વર્ષ પછી પણ અધૂરા પ્રશ્નો
દુર્ઘટના બાદ પીડિત પરિવારોને સાંત્વના આપવા માટે એર ઈન્ડિયા અને ટાટા ગ્રુપના પ્રતિનિધિઓ તેમજ ઉચ્ચ અધિકારીઓએ મુલાકાત લીધી હતી. તે સમયે પીડિત પરિવારોને સહાય, વળતર અને જરૂરી સહકાર આપવા માટે અનેક વાયદાઓ કરવામાં આવ્યા હતા. જોકે, પટેલ પરિવારનો આક્ષેપ છે કે સમય જતાં આ તમામ વચનો માત્ર આશ્વાસન પૂરતા જ સાબિત થયા.
પરિવારના સભ્યોના જણાવ્યા અનુસાર શરૂઆતના દિવસોમાં સતત સંપર્કમાં રહેલા અધિકારીઓ હવે ફોનનો જવાબ આપતા નથી અથવા યોગ્ય પ્રતિસાદ આપવાનું ટાળી રહ્યા છે. પરિવારનું કહેવું છે કે દુર્ઘટનાના કારણે માત્ર એક વ્યક્તિનું મૃત્યુ થયું નથી, પરંતુ સમગ્ર પરિવારનું જીવન બદલાઈ ગયું છે. આવી સ્થિતિમાં કંપનીઓએ પોતાની નૈતિક અને સામાજિક જવાબદારી નિભાવવી જોઈએ હતી, જે પૂરતી રીતે નિભાવવામાં આવી નથી.
આ પણ વાંચો: લગ્નના 2 દિવસ બાદ જ ઊજડી ગઈ દુનિયા : પ્લેન ક્રેશમાં પુત્ર ગુમાવનાર વડોદરાનો પરિવાર આજે પણ જુએ છે ભાવિકની રાહ
બહેનની આંખોમાં હજુ પણ તાજું છે એ અંતિમ વિદાયનું દ્રશ્ય
મૃતક સાહિલની બહેન સાહિસ્તા પટેલ માટે એક વર્ષ પછી પણ ભાઈની યાદો એટલી જ જીવંત છે. ભાવુક સ્વરે વાત કરતાં તેમણે જણાવ્યું કે લંડન જવા માટે સાહિલની બેગ પોતાના હાથે તૈયાર કરી હતી. પરિવારના દરેક સભ્યના ચહેરા પર ખુશી હતી કારણ કે સાહિલ પોતાના સપનાઓને સાકાર કરવા માટે નવા પ્રવાસે નીકળ્યો હતો.
સાહિસ્તાના જણાવ્યા મુજબ પરિવારના કોઈ સભ્યએ ક્યારેય વિચાર્યું પણ નહોતું કે જે પુત્રને ઉજ્જવળ ભવિષ્ય માટે વિદાય આપવામાં આવી રહી છે, તે ક્યારેય પરત નહીં ફરે. અંતિમ વિદાયની તે ક્ષણ આજે પણ પરિવારની આંખો સામે જીવંત છે અને દરરોજ એ યાદો તેમને અંદરથી ઝંઝોળી નાખે છે.
માત્ર એક પરિવારનો પ્રશ્ન નહીં
પટેલ પરિવારનું માનવું છે કે આ ઘટના માત્ર તેમના પરિવારની વ્યક્તિગત પીડા પૂરતી મર્યાદિત નથી. આ દુર્ઘટનાએ વિમાન સુરક્ષા, એરલાઇન્સ કંપનીઓની જવાબદારી અને દુર્ઘટના બાદ પીડિત પરિવારો પ્રત્યેના વલણ અંગે ગંભીર પ્રશ્નો ઉભા કર્યા છે. દુર્ઘટના બાદ જાહેર કરાયેલા સહાય પેકેજ, વળતર અને લાંબા ગાળાના સહયોગ અંગે કેટલી હદ સુધી અમલ થયો તેની પણ પારદર્શક સમીક્ષા થવી જોઈએ એવી માંગ ઉઠી રહી છે.
સ્થાનિક લોકો અને સામાજિક આગેવાનોનું પણ માનવું છે કે આવી દુર્ઘટનાઓમાં પીડિત પરિવારોને માત્ર આર્થિક સહાય પૂરતી નથી, પરંતુ માનસિક, કાનૂની અને સામાજિક સ્તરે સતત સહકારની પણ જરૂર હોય છે. જો કંપનીઓ અને સંસ્થાઓ પોતાના વચનો પર ખરી નહીં ઉતરે તો પીડિત પરિવારોમાં અસંતોષ વધવો સ્વાભાવિક છે.
ન્યાય માટે લડત યથાવત
સારોઠ ગામનો પટેલ પરિવાર હવે ન્યાય માટે પોતાની લડત વધુ મજબૂત બનાવવા તૈયાર છે. પરિવારનું કહેવું છે કે જ્યાં સુધી તેમને યોગ્ય જવાબદારી નક્કી થતી દેખાશે નહીં અને આપેલા વચનોનો અમલ નહીં થાય ત્યાં સુધી તેઓ પોતાની લડત ચાલુ રાખશે.
દુર્ઘટનાને એક વર્ષ પૂર્ણ થવા છતાં અનેક પ્રશ્નો હજુ અનુત્તરિત છે. પીડિત પરિવારની માંગ છે કે સંબંધિત કંપનીઓ અને સત્તાવાળાઓ આગળ આવીને પોતાની જવાબદારી સ્પષ્ટ કરે અને પીડિતોને યોગ્ય ન્યાય મળે તેની ખાતરી કરે.
એક વર્ષ પછી પણ સાહિલ પટેલનું ખાલી પડેલું સ્થાન પરિવાર માટે અસહ્ય વેદનાનું કારણ છે. સમય પસાર થઈ ગયો છે, પરંતુ માતા-પિતા, ભાઈ-બહેન અને પરિવારજનો માટે દરેક દિવસ એ દુઃખદ યાદોને ફરી જીવવાનો બની ગયો છે. હવે સૌની નજર એ વાત પર છે કે શું પીડિત પરિવારને ન્યાય મળશે કે પછી આ વચનો અને આશ્વાસનો સમયની સાથે ભૂંસાઈ જશે.
