Ahmedabad News: અમદાવાદના પાલડી વિસ્તારમાં ટેક્સટાઇલ વેપારીના નિવાસસ્થાને થયેલી ₹49 લાખની ચોરીના ગુનાનો પોલીસે ભેદ ઉકેલી એક આરોપીની ધરપકડ કરી છે. આ ચોરી 13 જુલાઈએ બની હતી. તપાસ દરમિયાન સામે આવ્યું કે વેપારીના ઘરે ઘરકામ કરતો કમલેશ મીણા જ સમગ્ર ઘટનાનો મુખ્ય સૂત્રધાર હતો. જોકે, તે હાલ ફરાર છે અને પોલીસે તેના સાથીદારો સામે પણ કાર્યવાહી હાથ ધરી છે. પોલીસના જણાવ્યા અનુસાર, ફરિયાદી પાસે કમલેશનું માત્ર નામ જ હતું અને તેની ઓળખ અથવા સરનામા અંગે કોઈ વિગત ઉપલબ્ધ નહોતી. તેમ છતાં ટેક્નિકલ સર્વેલન્સ અને માનવ સૂત્રોની મદદથી પોલીસે તપાસ આગળ વધારી અને સમગ્ર કાવતરાનો પર્દાફાશ કર્યો.
એક આરોપીની ધરપકડ, બે આરોપીઓની શોધખોળ ચાલુ
તપાસ દરમિયાન પોલીસે બાબુલાલ નામના આરોપીની ધરપકડ કરી હતી. જ્યારે મુખ્ય આરોપી કમલેશ મીણા અને તેનો ભત્રીજો ગૌતમ હાલ ફરાર છે. પોલીસે આરોપીઓ પાસેથી અત્યાર સુધીમાં અંદાજે ₹26.17 લાખનો મુદ્દામાલ કબજે કર્યો છે. પ્રાથમિક તપાસમાં જાણવા મળ્યું છે કે કમલેશ મીણા વેપારીના ઘરમાં કામ કરતો હોવાથી તેને ઘરની અંદરની તમામ માહિતી હતી. તેણે ઘરમાં રાખેલી તિજોરીમાંથી સોના-ચાંદીના દાગીના ચોરી કર્યા હતા.
વર્ષો જૂની મિત્રતાનો લીધો સહારો
પોલીસ તપાસ મુજબ બાબુલાલ અને કમલેશ વર્ષોથી મિત્રો હતા અને અગાઉ સાથે કામ પણ કરી ચૂક્યા હતા. ચોરી બાદ પોલીસનો ભય લાગતાં કમલેશે ચોરાયેલા દાગીના બાબુલાલને સોંપી દીધા હતા અને પોતે ફરાર થઈ ગયો હતો.
બાબુલાલે બાદમાં આ દાગીના પોતાના ભત્રીજા ગૌતમને પહોંચાડવાની યોજના બનાવી હતી. જોકે, પોલીસની તપાસ દરમિયાન સમગ્ર કડી સામે આવતા બાબુલાલ ઝડપાઈ ગયો અને દાગીનાનો મોટો જથ્થો પણ જપ્ત કરવામાં આવ્યો.
ફરાર આરોપીઓને ઝડપી પાડવા પોલીસની તજવીજ
અમદાવાદ ઝોન-7ના ડીસીપી શિવમ વર્માએ જણાવ્યું હતું કે કેસમાં મુખ્ય આરોપી કમલેશ મીણા અને ગૌતમની શોધખોળ માટે વિવિધ ટીમો કામે લાગી છે. તેમની સંભવિત હાજરીના સ્થળોએ દરોડા પાડવામાં આવી રહ્યા છે અને ટૂંક સમયમાં બંને આરોપીઓને ઝડપી લેવામાં આવશે તેવી આશા વ્યક્ત કરવામાં આવી છે.
પોલીસનું કહેવું છે કે કેસમાં વધુ તપાસ ચાલુ છે અને ચોરીના મુદ્દામાલનો બાકીનો ભાગ પણ શોધી કાઢવાના પ્રયાસો કરવામાં આવી રહ્યા છે. સાથે જ આરોપીઓના અન્ય કોઈ ગુનાહિત રેકોર્ડ છે કે નહીં તે દિશામાં પણ તપાસ ચાલી રહી છે.
ટેક્નિકલ સર્વેલન્સથી પોલીસે ઉકેલ્યો કેસ
પોલીસ અધિકારીઓના જણાવ્યા અનુસાર, ફરિયાદમાં આરોપી અંગે મર્યાદિત માહિતી હોવા છતાં તપાસ ટીમે ટેક્નિકલ સર્વેલન્સ, સીસીટીવી ફૂટેજ, માનવ સૂત્રો અને અન્ય પુરાવાઓના આધારે તપાસ આગળ વધારી હતી. અલગ-અલગ કડીઓને જોડીને પોલીસે આરોપીઓ સુધી પહોંચવામાં સફળતા મેળવી હતી. ત્યારબાદ બાબુલાલની ધરપકડ કરીને ચોરીના મુદ્દામાલનો મોટો હિસ્સો પણ કબજે કરવામાં આવ્યો હતો.
આ પણ વાંચો: બોટાદના રાણપુરમાં ભાજપના આગેવાન પર જીવલેણ હુમલો : ગંભીર હાલતમાં હોસ્પિટલમાં ખસેડાયા
બાકીનો મુદ્દામાલ અને ફરાર આરોપીઓની શોધ ચાલુ
પોલીસ હાલમાં ફરાર આરોપી કમલેશ મીણા અને ગૌતમને ઝડપી પાડવા માટે વિવિધ સ્થળોએ તપાસ કરી રહી છે. સાથે જ ચોરીમાં સામેલ અન્ય કોઈ વ્યક્તિની સંડોવણી છે કે નહીં અને બાકીનો મુદ્દામાલ ક્યાં છુપાવવામાં આવ્યો છે તે દિશામાં પણ તપાસ ચાલી રહી છે. પોલીસનું કહેવું છે કે બંને આરોપીઓની ધરપકડ બાદ સમગ્ર કાવતરાની વધુ વિગતો સામે આવશે અને કેસમાં જરૂરી કાયદેસરની કાર્યવાહી કરવામાં આવશે.
