અમદાવાદ નિકોલની જ્વેલર્સમાં થયેલી લાખોની ચોરીનો ઉકેલાયો ભેદ : પ્રેમ સંબંધે યુવક-યુવતીને પહોંચાડ્યા જેલ સુધી

અમદાવાદના નિકોલ વિસ્તારમાં આવેલી આભૂષણ જ્વેલર્સમાં થયેલી લાખો રૂપિયાના સોનાના દાગીનાની ચોરીનો ભેદ આખરે પોલીસે ઉકેલી કાઢ્યો છે. આ સમગ્ર કાવતરામાં શોરૂમમાં કામ કરતી યુવતી અને તેના પ્રેમીની સંડોવણી સામે આવતા પોલીસ પણ ચોંકી ઉઠી હતી. ક્રાઈમ બ્રાંચની સઘન તપાસ બાદ યુવતી અને તેના પ્રેમી મયુરકુમાર અશોકભાઈ માળીની ધરપકડ કરવામાં આવી છે. પોલીસને અત્યાર સુધીમાં અંદાજે 16.71 લાખ રૂપિયાનું 360 ગ્રામ સોનું પરત મળ્યું છે, જ્યારે બાકીના દાગીનાની શોધખોળ હજુ ચાલુ છે.

પ્રાથમિક તપાસ મુજબ, આરોપી યુવતી નિકોલ વિસ્તારમાં આવેલી આભૂષણ જ્વેલરી શોરૂમમાં કામ કરતી હતી અને તેને શોરૂમની આંતરિક કામગીરી તેમજ દાગીનાના સ્ટોક અંગે સંપૂર્ણ જાણકારી હતી. પોલીસના જણાવ્યા અનુસાર, યુવતીએ પોતાના પ્રેમી મયુરના કહેવા પર વિશ્વાસમાં લઈને ધીમે ધીમે દાગીનાની ચોરી શરૂ કરી હતી. બંનેએ મળીને અન્ય શહેરમાં જઈને નવી જિંદગી શરૂ કરવાનો પ્લાન બનાવ્યો હતો અને એ માટે જ આ ગુનાને અંજામ આપ્યો હોવાનું સામે આવ્યું છે.

આ પણ વાંચો: 'મને માતાજીએ કહ્યું છે, હું જ તારો ઘરવાળો છું' : ભુવાએ વિધિના નામે કારખાનેદારની પત્ની પર વારંવાર કર્યું 'ગંદુંકામ'

પાંચ મહિનાનો પ્રેમ સંબંધ

તપાસ દરમિયાન બહાર આવ્યું છે કે મયુર માળી બાપુનગર વિસ્તારમાં ડિઝાઈન પ્રિન્ટિંગનું કામ કરતો હતો. છેલ્લા 5 મહિનાથી તે યુવતીના સંપર્કમાં હતો અને બંને વચ્ચે નજીકનો પ્રેમ સંબંધ બંધાયો હતો. પોલીસ સૂત્રો મુજબ, આ સમયગાળા દરમિયાન બંનેએ અમદાવાદ છોડીને અન્ય શહેરમાં કાયમી રીતે વસવાટ કરવાની ચર્ચાઓ શરૂ કરી હતી.

આર્થિક રીતે સેટલ થવા માટે ઝડપથી મોટી રકમ મેળવવાની લાલચમાં બંનેએ જ્વેલરી શોરૂમને નિશાન બનાવવાનો પ્લાન તૈયાર કર્યો હતો. યુવતી શોરૂમમાં કામ કરતી હોવાથી સુરક્ષા વ્યવસ્થા, CCTVની ગતિવિધિઓ અને દાગીનાની અવરજવર અંગેની માહિતી તેને સહેલાઈથી મળી રહેતી હતી. આ જ બાબતનો લાભ લઈને ચોરીનું આયોજન કરવામાં આવ્યું હોવાનું પોલીસે જણાવ્યું છે.

પોલીસ અનુસાર, પ્લાન મુજબ યુવતીએ શોરૂમમાંથી સોનાના દાગીના કાઢીને પ્રેમી મયુર સુધી પહોંચાડ્યા હતા. શરૂઆતમાં ચોરીની જાણ બહાર ન આવે તે માટે ખૂબ સાવચેતી રાખવામાં આવી હતી, પરંતુ બાદમાં સ્ટોક ચેકિંગ દરમિયાન ગડબડ સામે આવતા મામલો પોલીસ સુધી પહોંચ્યો હતો.

આ પણ વાંચો: ઈંધણ બાદ હવે ખાદ્યતેલોના ભાવમાં વધારો : ડબ્બે આટલા રૂપિયાનો થયો વધારો

પોલીસથી બચવા શહેરો બદલતા રહ્યા આરોપીઓ

ચોરી બાદ બંને આરોપીઓ અમદાવાદ છોડીને અલગ-અલગ શહેરોમાં ફરતા રહ્યાં હતા. તપાસમાં જાણવા મળ્યું છે કે આરોપીઓ પહેલા ઉદયપુર ગયા હતા અને ત્યારબાદ જયપુર, દિલ્હી તથા ઋષિકેશ જેવા શહેરોમાં રોકાયા હતા. સતત સ્થળ બદલતા રહેવાના કારણે પોલીસ માટે તેમને ટ્રેસ કરવું પડકારજનક બન્યું હતું.

ક્રાઈમ બ્રાંચે ટેક્નિકલ સર્વેલન્સ, મોબાઈલ લોકેશન અને માનવ સૂત્રોના આધારે બંનેની હિલચાલ પર નજર રાખી હતી. આખરે યુવતીને ઝડપી લેવામાં આવી અને પૂછપરછ દરમિયાન સમગ્ર કાવતરાનો ખુલાસો થયો હતો. ત્યારબાદ પોલીસે મયુર માળીની પણ ધરપકડ કરી હતી.

પોલીસે જણાવ્યું છે કે આરોપીઓએ ચોરી કરેલા દાગીનાનો એક ભાગ અલગ અલગ સ્થળોએ છુપાવ્યો હતો. અત્યાર સુધીમાં 360 ગ્રામ સોનું કબજે લેવામાં આવ્યું છે, પરંતુ હજુ પણ કેટલીક જ્વેલરી રાજસ્થાન વિસ્તારમાં છુપાવવામાં આવી હોવાની શંકા છે. આ દિશામાં પોલીસ દ્વારા વધુ તપાસ ચાલી રહી છે.

નિકોલ પોલીસ હાલમાં યુવતીના રિમાન્ડ દરમિયાન વધુ પૂછપરછ કરાઈ રહી છે. તપાસ એ દિશામાં પણ ચાલી રહી છે કે આ ચોરીમાં અન્ય કોઈ વ્યક્તિની મદદ લેવામાં આવી હતી કે નહીં. પોલીસને આશા છે કે આગળની પૂછપરછમાં બાકીના દાગીના અને આર્થિક લેવડદેવડ અંગે વધુ મહત્વપૂર્ણ વિગતો બહાર આવી શકે છે.

આ પણ વાંચો: મહેસાણા સાયબર ક્રાઇમ પોલીસનો મોટો સપાટો : લાખોના 'મ્યુલ એકાઉન્ટ' કૌભાંડનો પર્દાફાશ, 5 શખ્સો સામે ગુનો દાખલ

આરોપીઓ સામે કડક કાર્યવાહી તરફ પોલીસ

પોલીસે બંને આરોપીઓ સામે ચોરી અને વિશ્વાસઘાત સંબંધિત કલમો હેઠળ ગુનો નોંધ્યો છે. તપાસ અધિકારીઓના જણાવ્યા અનુસાર, કેસમાં નાણાકીય ટ્રેલ, બેંક ટ્રાન્ઝેક્શન અને મુસાફરીના ડેટાની પણ તપાસ કરવામાં આવી રહી છે. જો ચોરી કરેલા દાગીનાનો કોઈ ભાગ વેચાયો હશે તો તે ચેઇન સુધી પહોંચવાનો પ્રયાસ કરવામાં આવશે. આ કેસે ફરી એક વખત બતાવ્યું છે કે પ્રેમ સંબંધ અને ઝડપથી રૂપિયા કમાવાની લાલચ કેવી રીતે ગંભીર ગુનામાં ફેરવાઈ શકે છે. હાલ સમગ્ર મામલે નિકોલ પોલીસ અને ક્રાઈમ બ્રાંચ સંયુક્ત રીતે તપાસ આગળ ધપાવી રહી છે.