અમદાવાદ શહેરમાં ભારત સરકારના મહત્વાકાંક્ષી બુલેટ ટ્રેન પ્રોજેક્ટની કામગીરી હવે વધુ ઝડપથી આગળ વધી રહી છે. સાબરમતીથી વટવા સુધીના કોરિડોર પર પાયલોટિંગ અને સેગમેન્ટ સ્થાપનની કામગીરી યુદ્ધના ધોરણે ચાલી રહી છે. આ દરમિયાન હવે કાલુપુર બ્રિજ એટલે કે મનુભાઈ પરમાર ઓવરબ્રિજ પર વિશેષ સેગમેન્ટ ચઢાવવાની મહત્વપૂર્ણ કામગીરી હાથ ધરવામાં આવનાર હોવાથી અમદાવાદ ટ્રાફિક પોલીસે ખાસ ટ્રાફિક એડવાઇઝરી જાહેર કરી છે.
ટ્રાફિક વિભાગના જણાવ્યા મુજબ 22 મે, શુક્રવારથી 25 મે, સોમવાર સુધી દરરોજ મધરાત્રી 12 વાગ્યાથી સવારે 6 વાગ્યા સુધી કાલુપુર સર્કલ બ્રિજના છેડેથી નાના સર્કલ સુધીનો આશરે 500 મીટરનો માર્ગ સંપૂર્ણપણે વાહન વ્યવહાર માટે બંધ રહેશે. રાત્રિના સમયે શહેરમાં અવરજવર કરતા વાહનચાલકોને અગાઉથી વૈકલ્પિક માર્ગનું આયોજન કરવાની અપીલ કરવામાં આવી છે.
આ પણ વાંચો: શું Ola-Uberની કેબ અને ઓટો બુક થઈ રહ્યા છે કે નહીં : ડ્રાઇવરો 3 દિવસની હડતાળ પર ઉતર્યા, જાણો કારણ
બુલેટ ટ્રેન કોરિડોર માટે ખાસ કામગીરી
અમદાવાદમાં ચાલી રહેલો બુલેટ ટ્રેન પ્રોજેક્ટ દેશના સૌથી મોટા ઈન્ફ્રાસ્ટ્રક્ચર પ્રોજેક્ટ્સમાંનો એક ગણાય છે. મુંબઈ-અમદાવાદ હાઈ સ્પીડ રેલ કોરિડોર અંતર્ગત શહેરના વિવિધ વિસ્તારોમાં એલિવેટેડ ટ્રેક માટે વિશાળ સેગમેન્ટ સ્થાપિત કરવામાં આવી રહ્યા છે. કાલુપુર વિસ્તાર શહેરના સૌથી વ્યસ્ત ટ્રાફિક ઝોનમાંનો એક હોવાથી અહીં કામગીરી દરમિયાન સલામતી અને ટ્રાફિક વ્યવસ્થાને ધ્યાનમાં રાખીને રાત્રિના સમયે રોડ બંધ કરવાનો નિર્ણય લેવાયો છે.
મળતી માહિતી મુજબ દિનેશચંદ્ર આર. અગ્રવાલ ઈન્ફ્રાકોન પ્રા. લી. કંપની દ્વારા આ કામગીરી કરવામાં આવી રહી છે. ભારે મશીનરી અને વિશાળ સેગમેન્ટ સ્થાપિત કરવાની પ્રક્રિયા દરમિયાન અકસ્માતનું જોખમ ટાળવા ટ્રાફિક નિયંત્રણ જરૂરી માનવામાં આવ્યું છે.
નરોડા અને સરસપુર તરફથી આવનારા વાહન માટે વૈકલ્પિક માર્ગ
ટ્રાફિક પોલીસ દ્વારા જાહેર કરાયેલા રૂટ મુજબ નરોડા રોડ અને સરસપુર તરફથી કાલુપુર સર્કલ તરફ જવા માંગતા વાહનચાલકોને સરસપુર સર્કલથી નૂતન મિલ રોડ તરફ ડાયવર્ટ કરવામાં આવશે. ત્યારબાદ વાહનો વોરાના રોજા ચાર રસ્તા, ડૉ. આંબેડકર ફ્લાયઓવર, અસારવા સિવિલ હોસ્પિટલ રોડ, રચના સ્કૂલ રોડ અને ગિરધરનગર ચાર રસ્તા મારફતે બાબુ જગજીવનરામ બ્રિજ થઈ ઈદગાહ રોડ દ્વારા કાલુપુર સર્કલ પહોંચી શકશે.
બીજી તરફ રખિયાલ અને ગોમતીપુર તરફથી આવતો ટ્રાફિક ગુરુદ્વારા રોડ, ચારતોડા કબ્રસ્તાન રોડ, રખિયાલ ચાર રસ્તા, મુર્ગા સર્કલ અને એપેરલ પાર્ક મેટ્રો સ્ટેશન તરફથી અનુપમ બ્રિજ અને સારંગપુર સર્કલ મારફતે કાલુપુર તરફ ડાયવર્ટ કરવામાં આવશે.
આ પણ વાંચો: PM મોદી-અમિત શાહને 'ગદ્દાર' ગણાવતા નિવેદન પર રાહુલ ગાંધી મુશ્કેલીમાં : દિલ્હીમાં ફરિયાદ દાખલ
રિલીફ રોડ અને દિલ્હી દરવાજા તરફથી આવનારા વાહનચાલકો માટે માર્ગ બદલાયો
રિલીફ રોડ અને દિલ્હી દરવાજા તરફથી નરોડા રોડ અને સરસપુર તરફ જવા માંગતા વાહનચાલકો માટે પણ ખાસ વૈકલ્પિક માર્ગ જાહેર કરવામાં આવ્યો છે. આવા વાહનોને કાલુપુર સર્કલથી ફ્રૂટ માર્કેટ, પાંચકુવા, ઈદગાહ રોડ, બાબુ જગજીવનરામ બ્રિજ, ગિરધરનગર ચાર રસ્તા અને અસારવા સિવિલ હોસ્પિટલ રોડ મારફતે નરોડા રોડ તરફ જવાની સલાહ આપવામાં આવી છે.
તે જ રીતે આસ્ટોડિયા અને રાયપુર વિસ્તાર તરફથી આવતો ટ્રાફિક કાગડાપીઠ પોલીસ સ્ટેશન, વાણિજ્ય ભવન, કાંકરિયા રોડ અને અનુપમ બ્રિજ મારફતે રખિયાલ તરફ જઈ શકશે.
કેટલાક માર્ગો પર યથાવત રહેશે અવરજવર
ટ્રાફિક પોલીસે સ્પષ્ટ કર્યું છે કે નરોડા GCS હોસ્પિટલ રોડ તરફથી આવતો ટ્રાફિક સરસપુર તથા ગોમતીપુર તરફ જવા માટે કાલુપુર બ્રિજનો ઉપયોગ કરી શકશે. સરસપુર અને ગોમતીપુર તરફથી નરોડા રોડ તરફ જવા માંગતા વાહનો માટે પણ બ્રિજ પરથી અવરજવર ચાલુ રહેશે.
અધિકારીઓએ જણાવ્યું છે કે બુલેટ ટ્રેન પ્રોજેક્ટના કારણે આગામી દિવસોમાં શહેરના કેટલાક વિસ્તારોમાં ટ્રાફિક દબાણ વધવાની શક્યતા છે. ખાસ કરીને રાત્રિના સમયમાં ભારે વાહનો અને લાંબા રૂટ પર ચાલતા વાહનચાલકોને સમયસર રૂટ પ્લાનિંગ કરવાની સલાહ આપવામાં આવી છે.
આ પણ વાંચો: ઉત્તર પ્રદેશની દરેક યુનિવર્સિટી અને કોલેજોમાં યુનિફોર્મ થશે ફરજિયાત : UPનાં રાજ્યપાલ આનંદીબહેન પટેલે કર્યો આદેશ, જાણો નિર્ણયનું કારણ
શહેરમાં વધતી ટ્રાફિક પડકાર વચ્ચે મેગા પ્રોજેક્ટ
અમદાવાદમાં મેટ્રો, ફ્લાયઓવર અને બુલેટ ટ્રેન જેવા મોટા પ્રોજેક્ટ એકસાથે ચાલી રહ્યા હોવાથી શહેરના અનેક વિસ્તારોમાં ટ્રાફિક મેનેજમેન્ટ મોટો પડકાર બની રહ્યો છે. કાલુપુર વિસ્તાર રેલવે સ્ટેશન, માર્કેટ વિસ્તાર અને જૂના શહેરને જોડતો મહત્વપૂર્ણ ઝોન હોવાથી અહીં થતો ટ્રાફિક ડાયવર્ઝન હજારો વાહનચાલકોને અસર કરી શકે છે.
ટ્રાફિક નિષ્ણાતો માને છે કે આવા મોટા ઈન્ફ્રાસ્ટ્રક્ચર પ્રોજેક્ટ શહેરના ભવિષ્ય માટે મહત્વપૂર્ણ છે, પરંતુ કામગીરી દરમિયાન અસરકારક ટ્રાફિક મેનેજમેન્ટ અને જાહેર સૂચનાઓ અત્યંત જરૂરી બને છે. અમદાવાદ ટ્રાફિક પોલીસ દ્વારા અગાઉથી એડવાઇઝરી જાહેર કરાતા વાહનચાલકોને મુશ્કેલી ઓછી થઈ શકે છે.
શહેરવાસીઓને ટ્રાફિક પોલીસના સૂચનોનું પાલન કરવા, અનાવશ્યક મુસાફરી ટાળવા અને શક્ય હોય ત્યાં સુધી વૈકલ્પિક માર્ગો તથા જાહેર પરિવહનનો ઉપયોગ કરવા અપીલ કરવામાં આવી છે.
