અમદાવાદ શહેરમાં લાંબા સમયથી આંગડિયા પેઢીઓ, મોટી રોકડ રકમ લઈને નીકળતા વેપારીઓ અને કિંમતી સામાન સાથે મુસાફરી કરતા લોકોને નિશાન બનાવતી કુખ્યાત ‘છારા ગેંગ’ સામે હવે અમદાવાદ શહેર પોલીસે કડક કાર્યવાહી હાથ ધરી છે. ઝોન-7 પોલીસ દ્વારા ગુજરાત કંટ્રોલ ઓફ ટેરરિઝમ એન્ડ ઓર્ગેનાઇઝ્ડ ક્રાઇમ એક્ટ (GUJCTOC) હેઠળ કાર્યવાહી કરતાં બે આરોપીઓની ધરપકડ કરવામાં આવી છે. પોલીસના જણાવ્યા મુજબ આ ગેંગ માત્ર અમદાવાદ પૂરતી સીમિત નહોતી પરંતુ આંતરરાજ્ય સ્તરે પણ સંગઠિત રીતે ગુનાઓ આચરતી હતી.
અમદાવાદ પોલીસ કમિશનર અને સંયુક્ત પોલીસ કમિશનર સેક્ટર-1ના માર્ગદર્શન હેઠળ ઝોન-7ના નાયબ પોલીસ કમિશનર શિવમ વર્મા (IPS) દ્વારા શહેરમાં સંગઠિત ગુનાખોરી સામે વિશેષ અભિયાન શરૂ કરવામાં આવ્યું હતું. આ અભિયાન દરમિયાન લોકલ ક્રાઇમ બ્રાન્ચ ઝોન-7એ તાજેતરમાં ચાર આરોપીઓને ઝડપી પાડ્યા હતા અને શહેરના અલગ અલગ પોલીસ સ્ટેશનોમાં નોંધાયેલા કુલ સાત ગુનાઓનો ભેદ ઉકેલી કાઢ્યો હતો. તપાસ દરમિયાન આરોપીઓનો વિશાળ ગુનાહિત ઇતિહાસ સામે આવતા પોલીસ દ્વારા GUJCTOC જેવી કડક કાયદાકીય જોગવાઈ લાગુ કરવામાં આવી.
આ રીતે કામ કરતી હતી ‘છારા ગેંગ’
પોલીસ તપાસમાં સામે આવ્યું છે કે ગેંગ અત્યંત આયોજનબદ્ધ રીતે ગુનાઓ આચરતી હતી. આરોપીઓ હેલ્મેટ અને રૂમાલ વડે ચહેરો ઢાંકી ઓળખ છુપાવતા હતા. ગુના સમયે અલગ કપડાં પહેરી અને બાદમાં ફરી વેશ બદલવાની રીત અપનાવવામાં આવતી હતી જેથી પોલીસને ઓળખવામાં મુશ્કેલી પડે. ગેંગ ખાસ કરીને આંગડિયા પેઢીના કર્મચારીઓ, બેંકમાંથી મોટી રકમ લઈને નીકળતા લોકો અને મોંઘી વસ્તુઓ સાથે જતા વાહનચાલકોને ટાર્ગેટ કરતી હતી.
ગુનો આચરવાની તેમની રીત પણ ખૂબ જ ચાલાકીભરી હતી. ગેંગનો એક સભ્ય વાહનચાલક સાથે ઇરાદાપૂર્વક બોલાચાલી કરીને તેને વાતોમાં વ્યસ્ત રાખતો હતો. આ દરમિયાન અન્ય સાગરીતો ‘એલ.એન.કી’ વડે એક્ટિવાની ડેકી તોડી નાખતા અથવા ‘હીરાકણી’ જેવી વસ્તુથી કારના કાચ તોડી કિંમતી માલસામાન ચોરી ફરાર થઈ જતા હતા. પોલીસે જણાવ્યું કે આ ગેંગ શહેરમાં ઝડપથી વધી રહેલી મોબાઇલ અને વાહન આધારિત ચોરીઓ પાછળ સક્રિય હતી.
આ પણ વાંચો: દીવમાં ગમખ્વાર અકસ્માત : સુરત પાસિંગ કારની ટક્કરે પિતા-પુત્રનું મોત, પરિવારની ખુશીઓ માતમમાં ફેરવાઈ
બે આરોપીઓ GUJCTOC હેઠળ ઝડપાયા
પોલીસે આ કેસમાં પ્રતિક ઉર્ફે અંધો પ્રવિણ પાનવેકર અને શંકુલ યોગેશભાઈ ભોગેકરની ધરપકડ કરી છે. બંને આરોપીઓ અમદાવાદના કુબેરનગર અને સરદારનગર વિસ્તારના રહેવાસી હોવાનું સામે આવ્યું છે. અગાઉ ઝડપાયેલા અન્ય આરોપીઓમાં અજય ઉર્ફે અજુબા ગાગડેકર અને વિશાલ ઉર્ફે ભાવુ તનવાણીનો પણ સમાવેશ થાય છે.
એલિસબ્રિજ પોલીસ સ્ટેશનમાં નોંધાયેલા ગુનામાં ભારતીય ન્યાય સંહિતા (BNS)ની કલમ 305 અને 54 ઉપરાંત GUJCTOC એક્ટની કલમ 3(1)(2), 3(2) અને 3(4) ઉમેરવામાં આવી છે. પોલીસ કમિશનરની મંજૂરી બાદ આ કાર્યવાહી હાથ ધરાઈ હોવાનું જણાવાયું છે. હાલમાં સમગ્ર કેસની વધુ તપાસ ACP એ.બી. વાળંદ દ્વારા કરવામાં આવી રહી છે.
અમદાવાદથી દિલ્હી સુધી ફેલાયેલો ગુનાહિત નેટવર્ક
પોલીસ રેકોર્ડ અનુસાર ગેંગ સામે અમદાવાદના એલિસબ્રિજ, સરખેજ, કૃષ્ણનગર, નવરંગપુરા, રામોલ, સોલા હાઇકોર્ટ, ઓઢવ, બોપલ, નરોડા, શાહીબાગ, વાડજ, રાખિયાલ અને વસ્ત્રાપુર સહિતના અનેક પોલીસ સ્ટેશનોમાં ગુનાઓ નોંધાયેલા છે. ઉપરાંત દિલ્હી ખાતે કાશ્મીરી ગેટ પોલીસ સ્ટેશનમાં પણ ગંભીર ગુનાઓ નોંધાયેલા હોવાનું બહાર આવ્યું છે.
આ કેસોમાં લૂંટ, ચોરી, વાહન તોડફોડ, પ્રોહિબિશન એક્ટ તેમજ હિંસાત્મક ગુનાઓનો સમાવેશ થાય છે. પોલીસે દાવો કર્યો છે કે આ ગેંગ વર્ષોથી સંગઠિત રીતે સક્રિય રહીને લોકોમાં ભયનો માહોલ ઊભો કરતી હતી. ગુનાખોરીનું જાળું શહેરની બહાર સુધી ફેલાયેલું હોવાથી GUJCTOC હેઠળ કાર્યવાહી કરવી જરૂરી બની હતી.
આ પણ વાંચો: 'ડ્રાય સ્ટેટ' માં દેશી દારૂ પીવાથી 2ના મોત : રાજકોટમાં શંકાસ્પદ લઠ્ઠાકાંડની આશંકા, પરિવારે કાવતરાનો આક્ષેપ
GUJCTOC કાયદો કેમ મહત્વનો?
ગુજરાત સરકારે સંગઠિત ગુનાખોરી અને આતંકવાદી પ્રવૃત્તિઓ પર નિયંત્રણ મેળવવા માટે GUJCTOC એક્ટ અમલમાં મૂક્યો હતો. આ કાયદો હેઠળ પોલીસે આરોપીઓના નેટવર્ક, નાણાકીય વ્યવહાર અને સંગઠિત ગુનાઓના માળખાની ઊંડાણપૂર્વક તપાસ કરવાની સત્તા મળે છે. સામાન્ય IPC અથવા BNS કલમોની તુલનાએ GUJCTOC હેઠળ વધુ કડક કાર્યવાહી અને લાંબી સજા શક્ય બને છે.
છેલ્લા કેટલાક વર્ષોમાં રાજ્યમાં સંગઠિત ચોરી, લૂંટ અને ગેંગ આધારિત ગુનાઓમાં વધારો નોંધાતા પોલીસ આવા કેસોમાં હવે વધુ કડક અભિગમ અપનાવી રહી છે. અમદાવાદ પોલીસની આ કાર્યવાહી શહેરમાં સક્રિય અન્ય ગેંગો માટે પણ ચેતવણીરૂપ માનવામાં આવી રહી છે.
