Ahmedabad News: અમદાવાદના ચાંદખેડા પોલીસે વિઝાની મુદત પૂર્ણ થયા બાદ પણ ભારતમાં ગેરકાયદેસર રીતે રહેતી બે વિદેશી મહિલાઓની ધરપકડ કરી છે. પ્રાથમિક તપાસમાં બંને મહિલાઓ લાંબા સમયથી વિઝાની સમયમર્યાદા પૂર્ણ થયા છતાં દેશમાં જ રહેતી હોવાનું સામે આવ્યું છે. હાલ પોલીસે તેમના વિરુદ્ધ જરૂરી કાયદેસરની કાર્યવાહી હાથ ધરી છે.
હોટલમાં તપાસ દરમિયાન બંને મહિલાઓ ઝડપાઈ
ચાંદખેડા પોલીસને મળેલી માહિતીના આધારે ગાંધીનગર-વિસત રોડ પર આવેલી દેવ પેલેસ હોટલ અને ગ્રીન ટ્રી હોટલમાં તપાસ હાથ ધરવામાં આવી હતી. તપાસ દરમિયાન બંને વિદેશી મહિલાઓના દસ્તાવેજોની ચકાસણી કરતાં તેઓ વિઝાની સમયમર્યાદા પૂર્ણ થયા બાદ પણ ભારતમાં રહેતી હોવાનું બહાર આવ્યું હતું.
તાન્ઝાનિયા અને કેન્યાની મહિલાઓની ઓળખ થઈ
પોલીસે ધરપકડ કરેલી મહિલાઓની ઓળખ તાન્ઝાનિયાની હેલ્લેના ન્યાગાલુ અને કેન્યાની મેગડેલાઇનંડુ તરીકે કરી છે. બંને મહિલાઓ અમદાવાદ વિસ્તારમાં બ્યુટી સલૂનમાં કામ કરતી હોવાનું પણ તપાસમાં સામે આવ્યું છે.
વિદેશી નાગરિકોના દસ્તાવેજોની તપાસ શરૂ
ચાંદખેડા પોલીસે બંને મહિલાઓના પાસપોર્ટ, વિઝા અને અન્ય ઇમિગ્રેશન સંબંધિત દસ્તાવેજોની તપાસ શરૂ કરી છે. તેઓ કેટલા સમયથી ભારતમાં ગેરકાયદેસર રીતે રહેતા હતા અને તેમની સાથે અન્ય કોઈ વ્યક્તિ અથવા નેટવર્ક સંકળાયેલું છે કે નહીં તે દિશામાં પણ તપાસ ચાલી રહી છે.
ડિપોર્ટ કરવાની પ્રક્રિયા હાથ ધરાઈ
પોલીસે બંને મહિલાઓને સંબંધિત કાયદાકીય પ્રક્રિયા પૂર્ણ કર્યા બાદ તેમના દેશ પરત મોકલવા (ડિપોર્ટ) માટેની કાર્યવાહી શરૂ કરી છે. આ માટે વિદેશી પ્રાદેશિક નોંધણી કચેરી (FRRO) સહિત સંબંધિત એજન્સીઓ સાથે સંકલન કરવામાં આવી રહ્યું છે.
આ પણ વાંચો: ચોટીલાની નાની મોરસલ સિંચાઈ યોજના પર ફરી ઉઠ્યા સવાલ : 15 વર્ષથી વચનો જ મળ્યા, નર્મદાનું પાણી હજુ નહીં મળ્યાનો આક્ષેપ
વિઝા નિયમોના પાલન અંગે તંત્રની કડક કાર્યવાહી
તાજેતરના સમયમાં વિઝાની શરતોનો ભંગ કરીને ભારતમાં રહેતા વિદેશી નાગરિકો સામે રાજ્યભરમાં ચકાસણી અભિયાન ચલાવવામાં આવી રહ્યું છે. પોલીસનું કહેવું છે કે વિઝા નિયમોનું ઉલ્લંઘન કરનાર કોઈપણ વિદેશી નાગરિક સામે કાયદા મુજબ કડક કાર્યવાહી કરવામાં આવશે.
