અમદાવાદ: કહેવાય છે કે, અમદાવાદમાં એવું કંઈ નથી જે ન મળે! અમદાવાદીઓ પોતાની ખમીર અને ખરીદી માટે જાણીતા છે. જ્યારે સસ્તા અને સારા માર્કેટની વાત આવે ત્યારે લાલ દરવાજા કે ભીડભંજનના નામ તો જીભે આવે જ, પરંતુ આ બધાની વચ્ચે એક એવું બજાર છે જે દાયકાઓથી અમદાવાદીઓની શાન રહ્યું છે. અમે વાત કરી રહ્યા છીએ સાબરમતીના તટે ભરાતા ઐતિહાસિક 'રવિવારી બજાર' (ગુજરી બજાર) વિશે. અહીં રસોડાની નાની સોયથી લઈને પ્રોફેશનલ જીમ મશીન સુધીનું બધું જ અત્યંત સસ્તા ભાવે મળી રહે છે.
મોલ સંસ્કૃતિ વચ્ચે પણ અડીખમ વર્ષો જૂનો ઇતિહાસ
આજના ચમક-ધમક વાળા શોપિંગ મોલ અને ઓનલાઇન સાઇટ્સના જમાનામાં પણ રવિવારી બજારની ચમક જરાય ઓછી થઈ નથી. આ બજાર લગભગ 50 થી 60 વર્ષ જૂનું છે. જ્યારે શહેરમાં મોટા શોપિંગ સેન્ટરોનું અસ્તિત્વ નહોતું, ત્યારે આ સાપ્તાહિક બજાર જ મધ્યમ અને ગરીબ વર્ગ માટે ખરીદીનું મુખ્ય કેન્દ્ર હતું. આજે પણ અહીં હજારો લોકોની ભીડ ઉમટે છે, જે સાબિત કરે છે કે પરંપરાગત બજારનો ક્રેઝ આજે પણ અકબંધ છે.
એલિસબ્રિજથી જમાલપુર સુધી ફેલાયેલું સામ્રાજ્ય
રવિવારી બજાર ભૌગોલિક રીતે પણ ઘણું વિશાળ છે. તે એલિસબ્રિજથી શરૂ થઈને જમાલપુર સુધી ફેલાયેલું હોય છે. આ બજારની ખાસિયત એ છે કે, અહીં વેપારીઓની પેઢી દર પેઢી વ્યવસાય કરે છે. ઘણા પરિવારો એવા છે જેમની 4-4 પેઢીઓ આ જ માર્કેટમાં વેપાર કરીને પોતાનું ગુજરાન ચલાવે છે. મોટાભાગના વેપારીઓ સ્થાનિક વિસ્તારના જ રહીશ છે, જે ગ્રાહકો સાથે એક અંગત નાતો ધરાવે છે.
શું શું મળી રહેશે આ બજારમાં?
આ માર્કેટમાં મળતી વસ્તુઓની વિવિધતા જોઈને કોઈપણ વ્યક્તિ અચંબો પામી જાય તેવી છે. અહીં માત્ર જૂની જ નહીં, પણ નવી નકોર વસ્તુઓનો પણ મોટો ખજાનો ઉપલબ્ધ હોય છે. ખાસ કરીને કપડાંની વાત કરીએ તો માત્ર રૂ.100 જેવી નજીવી કિંમતથી પહેરવેશની શરૂઆત થાય છે, જેમાં લેડીઝ અને જેન્ટ્સ બંને માટેના આકર્ષક કલેક્શન જોવા મળે છે. ફેશનના શોખીનો માટે અહીં બેગ, ચંપલ અને પર્સની વિશાળ રેન્જ છે, તો યુવતીઓ માટે શણગારની મેકઅપ પ્રોડક્ટ્સ પણ અત્યંત સસ્તા ભાવે મળી રહે છે.
ટેકનોલોજીથી લઈ ઘરવખરી એકદમ વ્યાજબી ભાવે
ટેકનોલોજી અને ફિટનેસના શોખીનો માટે પણ આ બજાર સ્વર્ગ સમાન છે, કારણ કે અહીં અદ્યતન કેમેરા, ટ્રાયપોડ જેવા ગેજેટ્સની સાથે સાથે પ્રોફેશનલ જીમ મશીનો પણ વ્યાજબી ભાવે ઉપલબ્ધ હોય છે. ઘરવખરીની વાત કરીએ તો રસોડામાં વપરાતા ક્રોકરી સેટની શરૂઆત માત્ર રૂ.20 થી થાય છે. આ ઉપરાંત, પુસ્તક પ્રેમીઓ માટે અહીં જૂની દુર્લભ નોવેલ, શૈક્ષણિક ચોપડાઓ અને અન્ય વાંચન સામગ્રીનો એવો સંગ્રહ છે જે તમને કદાચ મોટા શોરૂમમાં પણ ન જોવા મળે. ટૂંકમાં, ઘરના ફર્નિચરથી લઈને રસોડાના સામાન સુધીની તમામ જીવન જરૂરિયાતની વસ્તુઓ અહીં એક જ સ્થળે મળી રહે છે.
રવિવાર એટલે મેળા જેવો માહોલ
આ માર્કેટ દર રવિવારે સવારે 8:00 વાગ્યાથી શરૂ થઈને સાંજે 7:00 વાગ્યા સુધી ધમધમે છે. રવિવાર હોવાથી અહીં માત્ર અમદાવાદ જ નહીં, પણ આસપાસના ગામડાઓ અને શહેરોમાંથી પણ લોકો ખરીદી માટે આવે છે. ભીડ એટલી હોય છે કે જાણે કોઈ મેળો ભરાયો હોય!
ગ્રાહકોની સુવિધા અને સુરક્ષાની વ્યવસ્થા
ભારે ભીડને ધ્યાનમાં રાખીને તંત્ર દ્વારા પણ ખાસ વ્યવસ્થા કરવામાં આવે છે. મુલાકાતીઓને હાલાકી ન પડે તે માટે અને ભીડને નિયંત્રિત કરવા અને સુરક્ષા જાળવવા માટે પોલીસનો ચુસ્ત બંદોબસ્ત તૈનાત હોય છે. આ સિવાય વાહન લઈને આવતા લોકો માટે પાર્કિંગની યોગ્ય વ્યવસ્થા કરવામાં આવી છે, જેથી ટ્રાફિકની સમસ્યા સર્જાય નહીં. જેથી જો તમે પણ સસ્તી અને સારી વસ્તુઓના શોખીન હોવ, તો એકવાર અમદાવાદના આ ઐતિહાસિક 'ગુજરી બજાર'ની મુલાકાત લેવા જેવી છે. અહીં તમને તમારી જરૂરિયાતની દરેક વસ્તુ તમારા બજેટમાં મળી જશે.
