શનિવારે મોડી રાત્રે અફઘાન સેનાએ પાકિસ્તાનની અંદર અનેક સ્થળો પર ભારે હુમલો કર્યો.
અફઘાન તાલિબાન સરકારના સંરક્ષણ મંત્રાલયે આ હુમલાની પુષ્ટિ કરી છે અને તેને “પાકિસ્તાની સેનાના તાજેતરના હુમલાનો બદલો” ગણાવ્યો છે.
અફઘાન દળોએ પાકિસ્તાની સેનાની અનેક ચોકીઓ પર ભારે હથિયારોથી હુમલો કર્યો, જેમાં 12 પાકિસ્તાની સૈનિકો માર્યા ગયા હોવાના અહેવાલ છે. અફઘાન મીડિયા રિપોર્ટ્સ અનુસાર, અફઘાન સુરક્ષા દળોએ આ હુમલા દરમિયાન ડ્યુરન્ડ લાઇન પાર કરીને પાકિસ્તાન સમર્થિત ISIS આતંકવાદી ઠેકાણાઓને પણ નિશાન બનાવ્યા હતા.
ISIS ઠેકાણાઓ પર હુમલો
અફઘાન મીડિયા અહેવાલો મુજબ, કુનારના નારી જિલ્લાના નજીક અને નુરિસ્તાન પ્રાંતના કામદેશ જિલ્લામાં, ડ્યુરન્ડ લાઇનની પેલે પાર ISISના ઠેકાણાઓ પર અફઘાન હવાઈ દળો દ્વારા હુમલો કરવામાં આવ્યો.
આ ઠેકાણાઓ પાકિસ્તાની સેનાના રક્ષણ હેઠળ કાર્યરત હતા અને અફઘાન તાલિબાન સામે શંકાસ્પદ પ્રવૃત્તિઓમાં સામેલ હતા. અફઘાન સૂત્રોએ દાવો કર્યો છે કે આ હુમલામાં અનેક ISIS આતંકવાદીઓને નિશાન બનાવવામાં આવ્યા છે.
પાકિસ્તાની સેનાની ચોકીઓ નાશ પામી
અફઘાન સુરક્ષા દળોએ નંગરહાર, પક્તિયા, કુનાર અને નુરિસ્તાન પ્રાંતોમાં સરહદી વિસ્તારોમાં આવેલી પાકિસ્તાની ચોકીઓ પર પણ ગોળીબાર કર્યો હતો.
આઝમ કોર્પ્સના 7મા ફ્રન્ટિયર વિભાગે માહિતી આપી કે અફઘાન દળોએ હુમલા દરમિયાન એક પાકિસ્તાની ચોકી પર કબજો કર્યો હતો.
અફઘાન સૂત્રો અનુસાર, ખોસ્ત પ્રાંતના પાલુચા વિસ્તારમાં બે પાકિસ્તાની સૈનિકોને જીવતા પકડવામાં આવ્યા, જ્યારે કંદહારના મારુફ જિલ્લામાં સાત પાકિસ્તાની સૈન્ય ચોકીઓનો નાશ થયો હોવાનું કહેવાય છે.
તાલિબાન સંરક્ષણ મંત્રાલયનું નિવેદન
તાલિબાનના સંરક્ષણ મંત્રાલયે નિવેદનમાં જણાવ્યું
“ઇસ્લામિક અમીરાતના સશસ્ત્ર દળોએ ડ્યુરન્ડ લાઇન પર પાકિસ્તાની સેનાના ઠેકાણાઓ સામે સફળ જવાબી કાર્યવાહી હાથ ધરી છે. આ પગલું પાકિસ્તાની સેનાના અફઘાનિસ્તાનની સાર્વભૌમત્વ પરના વારંવારના ઉલ્લંઘનના જવાબમાં લેવામાં આવ્યું છે.”
આ નિવેદન પછી બંને દેશોની સરહદ પર તણાવ વધ્યો છે અને આંતરરાષ્ટ્રીય સ્તરે સ્થિતિ પર નજર રાખવામાં આવી રહી છે.
