હજીરા પોર્ટ પર ‘ડ્રોન હુમલા’ની મોકડ્રિલ : બોટ દ્વારા પાણીનો મારો ચલાવાયો, સુરક્ષા સજ્જતાની અસરકારક ચકાસણી

Mock Drill: સુરતના હજીરા વિસ્તારમાં આવેલ ઔદ્યોગિક એકમોની સુરક્ષા અને આપત્તિ વ્યવસ્થાપનને વધુ મજબૂત બનાવવા માટે Gujarat Maritime Board (GMB) અને Adani Hazira Port Ltd. દ્વારા સંયુક્ત રીતે ડ્રોન હુમલાની મોકડ્રિલ યોજવામાં આવી હતી. વધતા ટેકનિકલ સુરક્ષા જોખમોને ધ્યાનમાં રાખીને હજીરા પોર્ટ પર આ કવાયત કરવામાં આવી, જેમાં વિવિધ સરકારી વિભાગો અને ઔદ્યોગિક સંસ્થાઓએ ભાગ લીધો.

મોકડ્રિલ દરમિયાન અજાણ્યા શંકાસ્પદ ડ્રોન દ્વારા લિક્વિડ જેટી અને લિક્વિડ ટર્મિનલ પર હવાઈ હુમલો થયાની કલ્પિત પરિસ્થિતિ સર્જવામાં આવી હતી. આ કવાયત ‘ઓન-સાઇટ ઈમરજન્સી’ તરીકે શરૂ કરવામાં આવી હતી. સતર્કતાના ભાગરૂપે પોર્ટ પર ચાલી રહેલી કાર્ગો હેન્ડલિંગ, શિપ મૂવમેન્ટ અને ક્રેન ઓપરેશન તાત્કાલિક બંધ કરવામાં આવ્યા હતા. પોર્ટ સિક્યુરિટી યુનિટ્સ, Central Industrial Security Force (CISF) અને મરીન પોલીસને હાઈ એલર્ટ પર રાખી તમામ કર્મચારીઓને સુરક્ષિત સ્થળે ખસેડવાની પ્રક્રિયા હાથ ધરવામાં આવી હતી.

કવાયત દરમિયાન કેમિકલ કાર્ગો જહાજ અને તેના સાથે જોડાયેલા ટેન્ક ફાર્મ ઇન્ફ્રાસ્ટ્રક્ચર પર ડ્રોન હુમલાની સ્થિતિ સર્જાઈ હતી, જેના કારણે ‘હેવી એરોમેટિક કેમિકલ’ સંબંધિત જોખમ ઉભું થવાનું અનુમાન લગાવવામાં આવ્યું હતું. ઈમરજન્સી પ્રોટોકોલ મુજબ જિલ્લા કલેક્ટરના માર્ગદર્શન હેઠળ મ્યુચ્યુઅલ એઇડ ટીમોને જવાબદારી સોંપવામાં આવી હતી, જેથી વિવિધ એજન્સીઓ વચ્ચે સંકલન અને પ્રતિસાદ ક્ષમતા ચકાસી શકાય.

આ મોકડ્રિલમાં ડિસ્ટ્રિક્ટ ક્રાઈસિસ ગ્રુપ (DCG), લોકલ ક્રાઈસિસ ગ્રુપ (LCG), Gujarat Pollution Control Board (GPCB), તેમજ અન્ય જિલ્લા સ્તરીય આપત્તિ વ્યવસ્થાપન વિભાગોના અધિકારીઓ જોડાયા હતા. સાથે સાથે હજીરા વિસ્તારની મ્યુચ્યુઅલ એઇડ ઇન્ડસ્ટ્રીઝ જેવી કે Shell plc, ArcelorMittal Nippon Steel India, NTPC Limited, Reliance Industries, Oil and Natural Gas Corporation અને GAIL સહિત અનેક કંપનીઓના પ્રતિનિધિઓએ ભાગ લીધો.

આ કવાયત દ્વારા અદાણી હજીરા પોર્ટ, સરકારી વિભાગો અને સ્થાનિક ઔદ્યોગિક સંસ્થાઓ વચ્ચે સંકલન મજબૂત બન્યું છે. મોકડ્રિલના વિશ્લેષણ બાદ સુરક્ષા પ્રોટોકોલમાં વધુ સુધારા માટે ચર્ચા કરવામાં આવી હતી, જેથી ભવિષ્યમાં આવી કોઈ આપત્તિ સર્જાય તો તેનો અસરકારક રીતે સામનો કરી શકાય.