IPL 2026 ની સિઝનમાં અનેક ચોંકાવનારી ઘટનાઓ બની રહી છે, પરંતુ દિલ્હી ટ્રાફિક પોલીસના ACP સંજય સિંહ અત્યારે સોશિયલ મીડિયા પર હીરો બની ગયા છે. તેમણે માત્ર એક ખેલાડીનો જીવ બચાવવા માટે પોતાની ફરજ નિષ્ઠા જ નથી બતાવી, પરંતુ ક્રિકેટ જગતના સૌથી મોટા સ્ટાર વિરાટ કોહલી સાથેના તેમના જૂના સંબંધો વિશે પણ વાત કરી છે. એક સમયના ક્રિકેટર અને અત્યારના જાંબાઝ પોલીસ ઓફિસર સંજય સિંહની આ વાર્તા હૃદયસ્પર્શી અને પ્રેરણાદાયી છે.
ભયાનક અકસ્માત અને સમય સૂચકતા : લુંગી ન્ગીડીનો બચાવ
દિલ્હીના અરુણ જેટલી સ્ટેડિયમમાં રમાયેલી એક મેચ દરમિયાન દિલ્હી કેપિટલ્સના ફાસ્ટ બોલર લુંગી ન્ગીડી સાથે એક ગંભીર દુર્ઘટના ઘટી હતી. બાઉન્ડ્રી પર કેચ પકડવા જતાં તે હવામાં ઉછળ્યો અને સંતુલન ગુમાવતા માથા અને ગરદનના ભાગે સીધો જમીન પર પટકાયો હતો. મેદાન પર જ તે બેભાન જેવી અવસ્થામાં હતો અને તેને તાત્કાલિક મેડિકલ સહાયની જરૂર હતી. દિલ્હીના પીક-અવર ટ્રાફિકમાં હોસ્પિટલ પહોંચવું અશક્ય જણાતું હતું, પરંતુ ACP સંજય સિંહે તરત જ એક્શન લીધું. તેમણે પોતાની ટીમ સાથે મળીને રસ્તાઓ પર ટ્રાફિક અટકાવી એક 'ઇમ્પ્રુવાઇઝ્ડ ગ્રીન કોરિડોર' બનાવ્યો અને માત્ર 11 મિનિટમાં એમ્બ્યુલન્સને BLK મેક્સ હોસ્પિટલ પહોંચાડી, જ્યાં ન્ગીડીનો જીવ બચાવી શકાયો.
જૂની યાદો : જ્યારે 16 વર્ષનો વિરાટ પોલીસ ટીમમાં રમ્યો
સંજય સિંહે આપેલા એક ઇન્ટરવ્યુમાં તેમણે તેમના ભૂતકાળના રહસ્યો ખોલ્યા હતા. તેમણે જણાવ્યું કે, 2003-04 ના ગાળામાં દિલ્હીમાં પોલીસ લીગ ટુર્નામેન્ટ યોજાતી હતી. આ ટુર્નામેન્ટમાં દિલ્હીની ટોપની ક્લબ્સ ભાગ લેતી હતી. તે સમયે વિરાટ કોહલી માત્ર 16 વર્ષનો હતો અને તેની ક્લબ ટુર્નામેન્ટમાંથી વહેલી બહાર થઈ ગઈ હતી. ટુર્નામેન્ટના ખાસ નિયમ મુજબ, જે ટીમો ક્વોલિફાય થઈ હોય તે બહાર થયેલી ટીમના બે ગેસ્ટ પ્લેયર્સને પોતાની ટીમમાં સામેલ કરી શકતી હતી. સંજય સિંહની દિલ્હી પોલીસની ટીમ ક્વોલિફાય થઈ હોવાથી તેમણે પ્રતિભાશાળી વિરાટ કોહલીને પોતાની ટીમમાં સ્થાન આપ્યું હતું. આમ, આજના સુપરસ્ટાર વિરાટે એક સમયે પોલીસની ટીમ માટે બેટિંગ કરી હતી.
આ પણ ખાસ વાંચો : હોસ્પિટલ પહોંચવામાં સહેજ મોડું થયું હોત તો ના બચ્યો હોત ક્રિકેટર! : શોક મનાવતો હોત આખો દેશ, જીવના જોખમે 11 મિનિટમાં ACPએ બચાવ્યો જીવ!
સમર્પણની પરાકાષ્ઠા : પકોડા અને ચા છોડીને વિરાટની પ્રેક્ટિસ
સંજય સિંહ વિરાટના સમર્પણ વિશે વાત કરતા એક ખાસ કિસ્સો જણાવે છે. ફિરોઝ શાહ કોટલા મેદાન પર એક મેચ દરમિયાન ભારે વરસાદ પડ્યો હતો, જેના કારણે મેચ અટકી પડી હતી. મેદાન પર પાણી ભરાઈ ગયું હોવાથી બાકીના તમામ સિનિયર ખેલાડીઓ અને સ્ટાફ આરામથી બેસીને ચા અને પકોડાની મજા માણી રહ્યા હતા. પરંતુ સંજય સિંહે જોયું કે, 16 વર્ષનો પેલો છોકરો (વિરાટ) ઇન્ડોર નેટ્સમાં જઈને કલાકો સુધી સતત પ્રેક્ટિસ કરી રહ્યો હતો. તેને આરામ કે મનોરંજનમાં કોઈ રસ નહોતો, તેને માત્ર પોતાની રમત સુધારવી હતી. સંજય સિંહના મતે, આજની વિરાટની સફળતા પાછળ તેની વર્ષો જૂની આ મહેનત અને ભૂખ જવાબદાર છે.
ખાખી વર્દી પાછળનો ક્રિકેટર : ACP સંજય સિંહનો પરિચય
ACP સંજય સિંહ છેલ્લા બે દાયકાથી દિલ્હી પોલીસમાં સેવા આપી રહ્યા છે, પરંતુ તેમની ઓળખ માત્ર એક ઓફિસર પૂરતી મર્યાદિત નથી. તેઓ દિલ્હીના સ્થાનિક ક્રિકેટ સર્કિટમાં જાણીતું નામ રહ્યા છે. તેમણે ગૌતમ ગંભીર અને વિરાટ કોહલી જેવા દિગ્ગજો સાથે મેદાન પર સમય વિતાવ્યો છે. તેમની રમત પ્રત્યેની આ સમજ જ લુંગી ન્ગીડીની ઈજા વખતે કામ આવી, કારણ કે તેઓ જાણતા હતા કે મેદાન પર લાગેલી ઈજા કેટલી ગંભીર હોઈ શકે છે. આજે પણ તેઓ પોતાની ફરજ અને રમત પ્રત્યેના પ્રેમને સમાંતર રીતે નિભાવી રહ્યા છે.
