દ્વારકા નજીક આવેલા વરવાળા ગામના દરિયાકિનારે એક રહસ્યમય કન્ટેનર તણાઈ આવતા ભારે કુતુહલ સર્જાયું છે. સ્થાનિક લોકોએ આ કન્ટેનર જોતા જ તાત્કાલિક પોલીસને જાણ કરી હતી, જેના પગલે દ્વારકા પોલીસનો કાફલો ઘટનાસ્થળે દોડી આવ્યો હતો.
પ્રાથમિક દ્રષ્ટિએ આ કન્ટેનર કોઈ જહાજ પરથી દરિયામાં પડ્યું હોવાનું મનાય છે, પરંતુ તે ક્યાંથી આવ્યું અને તેમાં શું છે તે અંગે કોઈ સ્પષ્ટતા થઈ નથી. પોલીસે આ દિશામાં તપાસ શરૂ કરી છે. એક પ્રાથમિક અંદાજ મુજબ, કન્ટેનરની અંદર કેમિકલ હોવાની શંકા વ્યક્ત કરવામાં આવી રહી છે. જોકે, આ અંગેની સચોટ માહિતી FSL (ફોરેન્સિક સાયન્સ લેબોરેટરી)ના રિપોર્ટ બાદ જ બહાર આવશે.
ઘટનાની ગંભીરતાને ધ્યાનમાં રાખીને, પોલીસે વધુ તપાસ માટે તાત્કાલિક FSLની ટીમને જાણ કરી છે. FSLની ટીમ દ્વારા કન્ટેનરની અંદરના પદાર્થનું પરિક્ષણ કરવામાં આવશે, જેના પછી જ તે ખરેખર કેમિકલ છે કે અન્ય કોઈ વસ્તુ, તે જાણી શકાશે.
ઉલ્લેખનીય છે કે, આ પહેલીવાર નથી કે ગુજરાતના દરિયાકિનારે આવા કન્ટેનર તણાઈ આવ્યા હોય. અગાઉ પણ પોરબંદર અને કચ્છના દરિયાકિનારે આવા કન્ટેનર મળી આવ્યા હતા, જેના કારણે દરિયાઈ સુરક્ષા અને માલસામાનની હેરફેર અંગે અનેક સવાલો ઉભા થયા હતા. આ ઘટના પણ તે જ પ્રકારનો એક કિસ્સો છે, જેણે સ્થાનિક તંત્રને સતર્ક કરી દીધું છે.
