Jamnagar Thar driver terror: જામનગરથી મહિન્દ્રા થાર કાર લઈને નીકળેલા એક શખ્સે રાજ્યના માર્ગ પર ભયાનક આતંક મચાવ્યો હતો. આરોપીએ જે કોઈ વાહન આડે આવ્યું તેને જાણીજોઈને ઠોકર મારી અને અડફેટે લીધું, જેના કારણે અનેક વાહનચાલકો ભયભીત થઈ ગયા હતા અને માર્ગ પર અફરાતફરીનો માહોલ સર્જાયો હતો.
ભાયાવદર પોલીસે ત્વરિત કાર્યવાહી કરી
આ ઘટના દરમિયાન થાર કાર ભાયાવદર તરફ આગળ વધી રહી હતી ત્યારે સ્થાનિક લોકોએ તાત્કાલિક પોલીસને જાણ કરી દીધી હતી. ભાયાવદર પોલીસે ત્વરિત કાર્યવાહી કરી, સતર્કતા દાખવતા કારનો પીછો કર્યો અને તેને સફળતાપૂર્વક અટકાવી લીધી. હાલ આરોપી ચાલકને ભાયાવદર પોલીસે હિરાસતમાં લઈ લીધો છે અને સમગ્ર ઘટનાની વધુ તપાસ હાથ ધરી છે. આ બેફામ અને જોખમી વર્તનને કારણે રોડ સેફ્ટીના મુદ્દે ફરી એકવાર ચર્ચા થઈ રહી છે.
