ગાંધીનગર શહેરને સ્વચ્છ, સુંદર અને પ્લાસ્ટિક મુક્ત બનાવવાના ઉમદા હેતુ સાથે ગાંધીનગર મહાનગરપાલિકા અને બિસ્લેરી ઇન્ટરનેશનલ દ્વારા એક વિશેષ પર્યાવરણલક્ષી પહેલ હાથ ધરવામાં આવી છે. બિસ્લેરીના ‘Bottles for Change’ પ્રોગ્રામ અંતર્ગત શહેરના મુખ્ય ચાર સ્થળો પર પ્લાસ્ટિક વેસ્ટના કલેક્શન માટે પાણીની બોટલના આકારની વિશેષ ડસ્ટબિન્સ કાર્યરત કરવામાં આવી છે. આ પ્રોજેક્ટનો મુખ્ય ઉદ્દેશ્ય નાગરિકોમાં પ્લાસ્ટિક રિસાયકલિંગ પ્રત્યે જાગૃતિ લાવવાનો અને વેસ્ટ મેનેજમેન્ટની પ્રક્રિયાને વધુ સુદ્રઢ બનાવવાનો છે.
મહાનગરપાલિકા દ્વારા આ અનોખી કલેક્શન બિન્સ હાલમાં શહેરના પ્રમુખ સ્થળો જેવા કે, મેક્ડોનાલ્ડ્સ (ખ-0 પાસે), ઝેડ બ્લુ શો-રૂમ (સરગાસણ), માધવી ડેરી (સેક્ટર-16 પાસે) અને સરિતા ઉદ્યાન (સેક્ટર-9) ખાતે સ્થાપિત કરવામાં આવી છે. આ આકર્ષક બિન્સ દ્વારા નાગરિકો ઉપયોગમાં લેવાયેલી પ્લાસ્ટિકની બોટલો તેમજ અન્ય પ્લાસ્ટિક કચરાનો યોગ્ય રીતે નિકાલ કરી શકશે.
મોટાભાગના પ્લાસ્ટિકને રિસાયકલ કરી શકાય છે, પરંતુ જો તે અન્ય કચરા સાથે ભળી જાય તો તેને અલગ તારવવું મુશ્કેલ બને છે. આ પહેલ દ્વારા પ્લાસ્ટિક વેસ્ટને સોર્સ (ઉદભવ સ્થાન) પર જ અલગ એકત્રિત કરવામાં આવશે, જેથી તેને સરળતાથી રિસાયકલિંગ પ્રક્રિયામાં મોકલી શકાય.
ગાંધીનગર મહાનગરપાલિકા દ્વારા શહેરના તમામ નાગરિકોને અપીલ કરવામાં આવી છે કે, તેઓ પ્લાસ્ટિક કચરાને સામાન્ય કચરાથી અલગ રાખે અને જાહેર સ્થળોએ ગમે ત્યાં ફેંકવાને બદલે નિર્ધારિત કરવામાં આવેલી આ વિશેષ બિન્સનો જ ઉપયોગ કરે. પર્યાવરણ સંરક્ષણના આ અભિયાનમાં નાગરિકોનો સહકાર ગાંધીનગરને વધુ સ્વચ્છ અને ગ્રીન સીટી બનાવવામાં મહત્વપૂર્ણ સાબિત થશે.
