Ahmedabad Plane Crash: 12 જૂનના રોજ એર ઇન્ડિયાનું બોઇંગ 787-8 ડ્રીમલાઇનર વિમાન અમદાવાદના સરદાર વલ્લભભાઇ પટેલ આંતરરાષ્ટ્રીય એરપોર્ટથી લંડન માટે ઉડાન ભરી હતી. ટેકઓફ કર્યાના થોડા સમય પછી તે મેઘાણીનગર વિસ્તારમાં મેડિકલ હોસ્ટેલ પરિસરમાં ક્રેશ થયું. વિમાનમાં સવાર 242 લોકોમાંથી 241 લોકો મૃત્યુ પામ્યા. વિમાનમાં સવાર ફક્ત એક જ મુસાફર બચી ગયો. મેડિકલ કોલેજમાં એક જુનિયર ડૉક્ટર સહિત 19 લોકો પણ મૃત્યુ પામ્યા છે. અકસ્માત પછી 13 જૂને અકસ્માત સ્થળે એક ઇમારતની છત પરથી એક બ્લેક બોક્સ મળી આવ્યું હતું, જ્યારે 16 જૂને કાટમાળમાંથી બીજું બ્લેક બોક્સ મળી આવ્યું હતું. એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) દ્વારા તેની તપાસ કરવામાં આવી હતી. ANIએ સૂત્રોને ટાંકીને જણાવ્યું હતું કે, હવે તપાસ ટીમે નાગરિક ઉડ્ડયન મંત્રાલયને પોતાનો પ્રારંભિક અહેવાલ સુપરત કરી દીધો છે. અકસ્માતના કારણો ટૂંક સમયમાં જાહેર કરવામાં આવશે.
આ ટીમ તપાસ કરી રહી હતી
આ અકસ્માતની તપાસ ભારતીય વાયુસેના, હિન્દુસ્તાન એરોનોટિક્સ લિમિટેડ (HAL) અને યુએસ નેશનલ ટ્રાન્સપોર્ટેશન સેફ્ટી બોર્ડ (NTSB)ના ટેકનિકલ નિષ્ણાતો દ્વારા કરવામાં આવી રહી હતી. આ ટીમનું નેતૃત્વ એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB)ના ડિરેક્ટર દ્વારા કરવામાં આવ્યું હતું. તપાસ ટીમમાં એવિએશન મેડિકલ નિષ્ણાતો અને એર ટ્રાફિક કંટ્રોલ ઓફિસરનો પણ સમાવેશ થતો હતો. NTSB ટીમ હાલમાં દિલ્હીમાં છે અને AAIB લેબમાં ભારતીય અધિકારીઓ સાથે કામ કરી રહી છે.
ડુપ્લિકેટ બ્લેક બોક્સ મળી આવ્યું હતું?
અકસ્માત પછી તપાસ ટીમને 13 જૂને અકસ્માત સ્થળેથી એક બ્લેક બોક્સ મળ્યું હતું. 16 જૂને કાટમાળમાંથી બીજું બોક્સ મળી આવ્યું હતું. આગળના બ્લેક બોક્સમાંથી ક્રેશ પ્રોટેક્શન મોડ્યુલ (CPM)મળી આવ્યું. 25 જૂને મેમરી મોડ્યુલ એક્સેસ કરવામાં આવ્યું. તપાસ ટીમે AAIB લેબમાં તેનો ડેટા ડાઉનલોડ કર્યો. એવું કહેવામાં આવ્યું કે ડેટાને સફળતાપૂર્વક પુનઃપ્રાપ્ત કરવા માટે ડુપ્લિકેટ બ્લેક બોક્સ (ગોલ્ડન ચેસિસ)નો ઉપયોગ કરવામાં આવ્યો હતો.
આ વખતે બ્લેક બોક્સ ભારતમાં જ ખોલવામાં આવ્યું?
અમદાવાદ વિમાન દુર્ઘટનાના તમામ કારણો બ્લેક બોક્સ દ્વારા બહાર આવશે. તપાસ ટીમે તેની તપાસ કર્યા પછી પ્રારંભિક અહેવાલ તૈયાર કર્યો છે. આશ્ચર્યજનક છે કે આ સમગ્ર તપાસ ભારતમાં જ કરવામાં આવી હતી. અત્યાર સુધી, વિમાન અકસ્માતો પછી, બ્લેક બોક્સને ડીકોડિંગ માટે અમેરિકા, ઇંગ્લેન્ડ, ફ્રાન્સ, ઇટાલી, કેનેડા અને રશિયા જેવા દેશોમાં મોકલવામાં આવતું હતું. આ વખતે, બ્લેક બોક્સની સંપૂર્ણ તપાસ દિલ્હીની AAIB લેબમાં કરવામાં આવી હતી.
ફતેગંજમાં રાત્રે પોલીસ ત્રાટકી અને ખુલી ગઈ પોલ!: AAP ના પૂર્વ ઉમેદવારની હોટલમાં શું ચાલતું હતું?
