CNG-PNG Price Update: મધ્ય પૂર્વમાં વધતા તણાવ અને દરિયાઈ માર્ગો (હોર્મુઝની સામુદ્રધુની) પર સર્જાયેલી અવરોધક સ્થિતિને કારણે વૈશ્વિક સ્તરે ગેસના ભાવ 10 ડોલરથી વધીને 25 ડોલર સુધી પહોંચી ગયા છે. આવી સ્થિતિમાં CNG અને PNG (પાઈપ્ડ નેચરલ ગેસ) મોંઘા થવાની પૂરેપૂરી શક્યતા હતી. જોકે, અદાણી ગ્રુપની કંપની ATGL એ મધ્યમ વર્ગના પરિવારોને મોટી રાહત આપી છે. કંપનીએ જાહેર કર્યું છે કે ગાડીઓમાં વપરાતા CNG અને રસોડામાં વપરાતા PNG ના ભાવમાં હાલ કોઈ વધારો કરવામાં આવશે નહીં. કંપનીના જણાવ્યા અનુસાર, તેમનો લગભગ 70% ગેસ પુરવઠો ઘરેલું (Domestic) સ્ત્રોતોમાંથી આવે છે, જેના કારણે આંતરરાષ્ટ્રીય ભાવવધારાની સીધી અસર આ સેગમેન્ટ પર પડતી નથી. જોકે, બાકીનો 30% ગેસ જે આયાત (Import) કરવામાં આવે છે અને ઔદ્યોગિક એકમોને આપવામાં આવે છે, તેના પર કેટલીક મર્યાદાઓ અને ભાવવધારો લાગુ કરવામાં આવ્યો છે. આ નિર્ણયથી લાખો વાહન ચાલકો અને ગૃહિણીઓને મોંઘવારીના આ સમયમાં મોટો આશરો મળ્યો છે.
કોને મળશે રાહત અને કોના માટે મોંઘી થશે ગેસ?
અદાણી ટોટલ ગેસ (ATGL) દ્વારા લેવામાં આવેલા તાજેતરના નિર્ણય મુજબ, ગેસના ભાવવધારાની અસર અલગ-અલગ ગ્રાહકો પર જુદી-જુદી રીતે જોવા મળશે. કંપનીએ સ્પષ્ટ કર્યું છે કે, સામાન્ય ગ્રાહકો, જેઓ પોતાના વાહનોમાં CNG પુરાવે છે અથવા ઘરના રસોડામાં પાઈપ્ડ ગેસ (PNG) નો ઉપયોગ કરે છે, તેમના માટે કિંમતો યથાવત રાખવામાં આવી છે, એટલે કે તેમના બજેટમાં કોઈ ફેરફાર થશે નહીં. જોકે, ઔદ્યોગિક અને કોમર્શિયલ ગ્રાહકો માટે નિયમોમાં ધરખમ ફેરફાર કરવામાં આવ્યા છે. હવેથી ઉદ્યોગોને તેમની કુલ જરૂરિયાતના માત્ર 40% જેટલો જ ગેસ જૂના રાહત દરે (આશરે ₹40 પ્રતિ યુનિટ) આપવામાં આવશે. જો ઉદ્યોગો આ નિર્ધારિત મર્યાદાથી વધુ ગેસનો વપરાશ કરશે, તો તેમણે આંતરરાષ્ટ્રીય બજારના ઊંચા 'સ્પોટ રેટ' મુજબ ચુકવણી કરવી પડશે, જે તેમના ઉત્પાદન ખર્ચમાં નોંધપાત્ર વધારો કરી શકે છે.
વધારે વપરાશ પર 119 રૂપિયા સુધીનો ભાવ
કંપનીએ ઔદ્યોગિક ગ્રાહકો માટે મર્યાદા નક્કી કરી છે. જો કોઈ ઈન્ડસ્ટ્રી તેની નિર્ધારિત 40% ની સીમાથી વધુ ગેસનો ઉપયોગ કરે છે, તો તેમણે 'સ્પોટ માર્કેટ' ના ઊંચા દરો મુજબ ચુકવણી કરવી પડશે. આ કિંમત પ્રતિ યુનિટ 119 રૂપિયા સુધી પહોંચી શકે છે. આંતરરાષ્ટ્રીય બજારમાં ગેસના ભાવમાં થયેલા તોતિંગ ઉછાળાને કારણે કંપનીએ આ કડક પગલું ભરવું પડ્યું છે.
સપ્લાય ચેઈનમાં અવરોધનું કારણ
યુદ્ધના કારણે હોર્મુઝની સામુદ્રધુની (Strait of Hormuz) જેવા મહત્વના દરિયાઈ માર્ગો પર જહાજોની અવરજવરને માઠી અસર પહોંચી છે. આ જ કારણ છે કે વિદેશથી આવતા ગેસના ઈમ્પોર્ટમાં મુશ્કેલીઓ પડી રહી છે. તેમ છતાં, કંપનીએ ખાતરી આપી છે કે તે પડકારજનક સમયમાં પણ સામાન્ય ગ્રાહકોના હિતોનું રક્ષણ કરવા અને અવિરત સપ્લાય સુનિશ્ચિત કરવા માટે પ્રતિબદ્ધ છે.
