કડી શહેરમાં વાલીઓ માટે લાલબત્તી સમાન ચિંતાજનક ઘટના સામે આવી છે. રમતા રમતા એક નાનકડા બાળકે અંદાજે 5 સેમી લાંબી પેન્સિલ ગળી જતા પરિવારમાં અફરાતફરી મચી ગઈ હતી. ઘટના બનતાં જ બાળકને તાત્કાલિક સારવાર માટે કડી ખાનગી હોસ્પિટલ ખાતે ખસેડવામાં આવ્યો હતો.
કડીમાં ચિંતાજનક ઘટના
હોસ્પિટલમાં ફરજ પર હાજર તબીબોએ બાળકની તાત્કાલિક તપાસ હાથ ધરી હતી. પ્રાથમિક નિદાન બાદ જાણવા મળ્યું કે ગળેલી પેન્સિલ પાચનતંત્રમાં અટવાઈ ગઈ છે, જેના કારણે ગંભીર જટિલતા ઊભી થઈ શકે તેવી સ્થિતિ હતી. સમયસર સારવાર ન મળે તો આંતરિક ઇજા અથવા ઇન્ફેક્શનનો ભય રહેલો હતો. પરિસ્થિતિની ગંભીરતા ધ્યાનમાં રાખીને તબીબોએ એન્ડોસ્કોપી પદ્ધતિ દ્વારા પેન્સિલ બહાર કાઢવાનો નિર્ણય લીધો. નિષ્ણાત તબીબી ટીમે સુચિત અને સાવચેતીભર્યા પ્રયાસોથી સફળતાપૂર્વક એન્ડોસ્કોપી કરી પેન્સિલ બહાર કાઢી લીધી હતી. સારવાર દરમિયાન બાળકની સતત દેખરેખ રાખવામાં આવી હતી.
રમતા રમતા બાળક પેન્સિલ ગળી ગયું
સફળ સારવાર બાદ તબીબોએ જણાવ્યું કે હાલ બાળકની તબિયત સ્થિર છે અને કોઈ ગંભીર આંતરિક નુકસાન થયું નથી. તેમ છતાં થોડા દિવસ સુધી તબીબી દેખરેખ હેઠળ રાખવાની સલાહ આપવામાં આવી છે. આ બનાવ વાલીઓ માટે ચેતવણીરૂપ છે કે નાના બાળકો રમતા સમયે આસપાસની નાની વસ્તુઓ મોઢામાં ન મૂકે તે માટે ખાસ તકેદારી રાખવી જરૂરી છે. ઘર અને શાળામાં બાળકોની સલામતી પ્રત્યે વધુ જાગૃતિ રાખવી સમયની માંગ બની છે.
