વિશ્વનો સ્માર્ટફોન બજાર સતત નવી તકનીકો અને ડિઝાઇન સાથે બદલાતો જાય છે. દરરોજ નવો ફોન લોન્ચ થતો હોવા છતાં, માત્ર થોડા મોડલ્સ જ એવા રહ્યા છે જેમણે વેચાણના તમામ રેકોર્ડ તોડી નાખ્યા છે. How Stuff Worksના અહેવાલ અનુસાર, વિશ્વના સૌથી વધુ વેચાતા પાંચ ફોનમાં નોકિયા અને એપલના ફોન્સનો જ દબદબો જોવા મળે છે.
1. Nokia 1100, વિશ્વનો સૌથી વધુ વેચાતો ફોન
2003માં લોન્ચ થયેલો Nokia 1100 હજુ સુધી વિશ્વનો સૌથી વધુ વેચાતો મોબાઈલ ફોન ગણાય છે. તેના 250 મિલિયનથી વધુ યુનિટ્સ વેચાયા હતા. મજબૂત બોડી, ફ્લેશલાઇટ અને લાંબી બેટરી લાઈફને કારણે તે આફ્રિકા, એશિયા અને લેટિન અમેરિકા જેવા વિસ્તારોમાં અત્યંત લોકપ્રિય બન્યો હતો. પાણી કે ધૂળમાં પડ્યા બાદ પણ તેની કામગીરી અવિરત રહેતી. અનેક લોકો માટે આ તેમનો પહેલો મોબાઈલ ફોન હતો.
2. iPhone 6 અને 6 Plus, એપલનો મોટો ફેરફાર
2014માં લોન્ચ થયેલા iPhone 6 અને 6 Plusએ એપલના ઇતિહાસમાં સૌથી મોટો ફેરફાર લાવ્યો. આ શ્રેણીના 220 મિલિયનથી વધુ યુનિટ્સ વેચાયા હતા. એપલનો મોટો સ્ક્રીનવાળો પહેલો ફોન હોવાને કારણે ગ્રાહકોમાં ભારે ઉત્સાહ જોવા મળ્યો હતો. Shot on iPhone ઝુંબેશથી તેની લોકપ્રિયતા વધી. ઉત્તમ કેમેરા, ઝડપી પ્રોસેસર અને પ્રીમિયમ ડિઝાઇનને કારણે આ મોડલ લાંબા સમય સુધી માર્કેટમાં ટોચે રહ્યું.
3. Nokia 1110, સામાન્ય લોકોનો વિશ્વાસુ સાથી
2005માં લોન્ચ થયેલો Nokia 1110 એ એવા ગ્રાહકો માટે હતો જેમને સરળ અને વિશ્વસનીય ફોનની જરૂર હતી. તેમાં કોલિંગ, મેસેજિંગ અને એલાર્મ જેવી મૂળભૂત સુવિધાઓ હતી. કેમેરા કે ઇન્ટરનેટ કનેક્શન ન હોવા છતાં તેની બેટરી લાઈફ ખૂબ લાંબી હતી, જે તેને ગ્રામિણ વિસ્તારોમાં ખૂબ લોકપ્રિય બનાવતી.
4. iPhone 11, આધુનિક સ્માર્ટફોનમાં સૌથી વધુ વેચાતો
2019માં લોન્ચ થયેલો iPhone 11 પણ સૌથી વધુ વેચાયેલા સ્માર્ટફોન્સની યાદીમાં સામેલ થયો. 159 મિલિયનથી વધુ યુનિટ્સ વેચાયા હતા. તેમાં Face ID, સુધારેલ કેમેરા સિસ્ટમ અને શક્તિશાળી ચિપ હતી. તેની કિંમત અન્ય પ્રીમિયમ ફોન્સની તુલનામાં ઓછી હોવાથી તે મોટી સંખ્યામાં ગ્રાહકો સુધી પહોંચ્યો. બેટરી લાઈફ અને નાઈટ ફોટોગ્રાફી માટે તેને વિશેષ પ્રશંસા મળી.
5. Samsung Galaxy S4, સેમસંગનો સૌથી સફળ મોડલ
Samsung Galaxy S4 2013માં લોન્ચ થયો હતો અને એ સેમસંગનો અત્યાર સુધીનો સૌથી વધુ વેચાતો ફ્લેગશિપ મોડલ રહ્યો છે. 80 મિલિયન યુનિટ્સ વેચાઈ ચૂક્યા છે. AMOLED ડિસ્પ્લે, અદ્યતન સોફ્ટવેર ફીચર્સ અને સુરક્ષાના કારણે તે સમયે તે વિશ્વભરમાં લોકપ્રિય બન્યો. ખાસ કરીને એશિયા અને યુરોપના માર્કેટમાં તેની માંગ સૌથી વધુ રહી.
આ રીતે, વિશ્વના સૌથી વધુ વેચાતા ફોન્સની યાદીમાં બે દાયકાથી વધુ સમય બાદ પણ નોકિયા અને એપલના ફોન્સનું પ્રભુત્વ અડગ રહ્યું છે. ટેક્નોલોજી બદલાતી રહી, પરંતુ આ ફોન્સ લોકોના દિલમાં આજે પણ ખાસ સ્થાન ધરાવે છે.
