રિપોર્ટમાં સૌથી મોટો ખુલાસો : 2024માં મહિલાઓએ લોન લેવામાં પુરૂષોને પછાડ્યા! જાણો કયા રાજ્યની મહિલાઓ છે આગળ

Women Loan Trends: એક સમય હતો જ્યારે મહિલાઓને આર્થિક મામલામાં કમજોર માનવામાં આવતી હતી, પરંતુ 2024નો આ રિપોર્ટ દર્શાવે છે કે તેઓ હવે માત્ર ઘર સુધી સીમિત નથી રહી, પરંતુ આર્થિક મોરચે પુરુષોને પણ પાછળ છોડી રહી છે. ઘર ખરીદવાનું સપનું હોય, બિઝનેસ વધારવાની ઈચ્છા હોય કે પછી બાળકોના શિક્ષણ માટે લોન લેવી હોય, મહિલાઓ હવે દરેક ક્ષેત્રમાં મજબૂત બની રહી છે. ખાસ વાત એ છે કે તેઓએ માત્ર વધુ લોન જ લીધી નથી, પરંતુ તે ચૂકવવામાં પણ તેઓ પુરુષો કરતાં વધુ સારા સાબિત થઈ છે. આ પરિવર્તન દરેક મહિલાને આત્મનિર્ભર બનવા તરફ એક મોટું પગલું છે.

મહિલાઓએ વધાર્યો લોન લેવાનો વ્યાપ
2024માં મહિલાઓએ લોન લેવા અને ચુકવવાની બાબતમાં શાનદાર પ્રદર્શન કર્યું હતું. ક્રેડિટ રિપોર્ટ કંપની CRIF હાઈ માર્ક અનુસાર મહિલાઓની કુલ બાકી લોન 18% વધીને 36.5 લાખ કરોડ રૂપિયા થઈ ગઈ છે. ડિસેમ્બર 2024 સુધીમાં દેશમાં 8.3 કરોડ મહિલાઓ દેવાદાર હતી, જે ગયા વર્ષ કરતાં 10.8% વધુ છે. જ્યારે, મહિલાઓએ પુરુષો કરતાં વધુ લોન લીધી.

પુરુષોમાં આ વધારો માત્ર 6.5% હતો. મહિલાઓએ હોમ લોન, બિઝનેસ લોન, ફાર્મિંગ અને ટ્રેક્ટર લોન, પ્રોપર્ટી લોન અને એજ્યુકેશન લોન જેવી કેટેગરીમાં વધુ લોન લીધી હતી. આ સિવાય મહિલાઓની કન્ઝ્યુમર ડ્યુરેબલ લોન (ઈલેક્ટ્રોનિક્સ અને ઘરગથ્થુ સામાન પર ઉપલબ્ધ લોન)માં પણ સુધારો થયો છે, જ્યારે પુરુષોની આ લોનમાં ઘટાડો થયો છે.

મહિલાઓએ લોન ચૂકવવામાં દેખાડી જવાબદારી
રિપોર્ટ અનુસાર લોન ચૂકવવામાં મહિલાઓ વધુ જવાબદાર છે, તેથી તેમની બાકી રકમ ઓછી રહે છે. પરંતુ ગોલ્ડ લોન અને ટુ-વ્હીલર લોન ચૂકવવામાં તેમની સ્થિતિ થોડી નબળી હતી. સરકારી બેંકોએ 2024માં મહિલાઓને લોન આપવામાં વધુ રસ દાખવ્યો, જેના કારણે મહિલાઓનો કુલ હિસ્સો 24% રહ્યો. 35 વર્ષ કે તેથી ઓછી વયની મહિલાઓ લોન લેવામાં મોખરે રહી, પરંતુ 2022 સુધીમાં તેમનો હિસ્સો થોડો ઘટીને 43.8% થયો.

લોન લેવામાં મહારાષ્ટ્રની મહિલાઓ સૌથી આગળ
જો આપણે રાજ્યોની વાત કરીએ તો મહારાષ્ટ્રની મહિલાઓ હોમ લોન, બિઝનેસ લોન, પ્રોપર્ટી લોન, ઓટો લોન, ક્રેડિટ કાર્ડ અને એજ્યુકેશન લોન લેવામાં સૌથી આગળ હતી. ભારતીય મહિલાઓ આર્થિક રીતે મજબૂત બની રહી છે અને ઘણા મામલામાં પુરૂષો કરતા વધુ સારી કામગીરી કરી રહી છે.