Tilak Varma : T20 વર્લ્ડ કપ પહેલા ટીમ ઈન્ડિયા માટે એક રાહતના સમાચાર છે. પેટ સંબંધિત સમસ્યાને કારણે ન્યુઝીલેન્ડ સામેની T20I સિરીઝની પ્રથમ ત્રણ મેચમાંથી બહાર થઈ ગયેલા તિલક વર્મા ઝડપથી સ્વસ્થ થઈ રહ્યા છે. તિલક વર્મા, જે હાલમાં બેંગલુરુમાં BCCI સેન્ટર ઓફ એક્સેલન્સમાં રિહેબ પ્રોસેસમાંથી પસાર થઈ રહ્યા છે, તેને સોશિયલ મીડિયા પર તેની કેટલીક તસવીરો અને વીડિયો પોસ્ટ કરીને ટૂંક સમયમાં કમબેકની આશા વ્યક્ત કરી છે. તિલક વર્માએ આવી જ એક વીડિયો ક્લિપ શેર કરી છે, જેમાં તેઓ એક્સરસાઇઝ કરતા જોવા મળે છે. તેની સાથે લખ્યું- "Leaving no stone unturned, comeback"
T20 ટીમનો મુખ્ય ખેલાડી
તિલક વર્મા લાંબા સમયથી ભારતીય T20 બેટિંગનો મહત્વપૂર્ણ આધારસ્તંભ છે. ગયા વર્ષે સાઉથ આફ્રિકા સામે ઘરઆંગણે રમાયેલી સિરીઝમાં પણ તેનું વિસ્ફોટક બેટિંગ પર્ફોમન્સ જોવા મળ્યું હતું. તિલક વર્મા સિરીઝમાં 187 રન સાથે ટોપ સ્કોરર રહ્યો હતો. આ દરમિયાન તેને 2 હાફ-સેન્ચુરી પણ ફટકારી હતી. 23 વર્ષીય તિલક વર્માએ ન્યુઝીલેન્ડ સામેની સિરીઝની તૈયારી તરીકે વિજય હજારે ટ્રોફીની 2 મેચ પણ રમી હતી, જેમાં તિલક વર્માએ અનુક્રમે 109 અને 34 રનની ઇનિંગ્સ રમી હતી.
ઈજાગ્રસ્ત તિલક વર્માની જગ્યાએ કોણ આવ્યું?
તિલક વર્મા ન્યૂઝીલેન્ડ સામેની સિરીઝની તૈયારીમાં વ્યસ્ત હતા ત્યારે તેને પેટમાં તકલીફ થઈ હતી, જેના માટે સર્જરીની જરૂર હતી. આ કારણે તે ન્યૂઝીલેન્ડ સામેની 5 મેચની T20 સિરીઝની પ્રથમ 3 મેચમાંથી બહાર થઈ ગયો હતો. તેના સ્થાને શ્રેયસ ઐયરને ટીમમાં જગ્યા આપવામાં આવી છે. લેફટી બેટ્સમેન તિલક વર્મા ત્રીજા નંબર પર ભારત માટે શાનદાર રમી રહ્યો છે. વર્લ્ડ કપમાં તેની હાજરી ટીમ ઈન્ડિયા માટે ઘણી મહત્વની છે. તેની પાસે પ્રેશરને હેન્ડલ કરવાની અને પરિસ્થિતિ અનુસાર બેટિંગ કરવાની સારી ક્ષમતા છે. તેને એશિયા કપની ફાઇનલમાં પાકિસ્તાન સામે આનું પ્રદર્શન કર્યું હતું.
તિલક વર્માનું T20I કરિયર
T20I કરિયરમાં તિલક વર્માએ અત્યાર સુધી 40 મેચની 37 ઈનિંગ્સમાં 49.29 ની એવરેજથી 1,183 રન બનાવ્યા છે. આ દરમિયાન તેનો સ્ટ્રાઇક રેટ 144.09 છે. T20I માં તિલક વર્માના નામે 2 સેન્ચુરી અને 6 હાફ-સેન્ચુરી છે. નંબર 3 પર, તે એ જ ભૂમિકા ભજવી રહ્યો છે જે વિરાટ કોહલી ભજવતો હતો. 3 નંબર પર બેટિંગ કરતા, તિલક વર્માએ 15 ઇનિંગ્સમાં 60.22 ની એવરેજ અને 160 ના સ્ટ્રાઇક રેટથી 542 રન બનાવ્યા છે. T20I માં તેની બંને સેન્ચુરી ત્રણ પર બેટિંગ કરતી વખતે આવી છે. આ સિવાય તિલક વર્માએ આ નંબર પર 3 હાફ-સેન્ચુરી પણ ફટકારી છે.
