તહવ્વુર રાણા કેસ : ભારત લાવવામાં આવ્યા પછી પણ કેમ છુપાવવામાં આવી રહ્યો છે તેનો ચહેરો

26/11ના મુંબઈ આતંકી હુમલાના આરોપી તહવ્વુર રાણાને અમેરિકાથી ભારત લાવવામાં આવ્યા બાદ હજુ સુધી તેનો ચહેરો જાહેર કરવામાં આવ્યો નથી. આનાથી સામાન્ય લોકોમાં એક સવાલ ઉઠી રહ્યો છે કે મુંબઈ હુમલાના આ ગુનેગારનો ચહેરો આજ સુધી કેમ સામે આવ્યો નથી? સૂત્રોના જણાવ્યા અનુસાર તહવ્વુર રાણાની ઓળખ પરેડ (TIP ટેસ્ટ આઇડેન્ટિફિકેશન પરેડ) ટૂંક સમયમાં હાથ ધરવામાં આવનાર છે. આ પ્રક્રિયાને કારણે સુરક્ષા એજન્સીઓએ અત્યાર સુધી તેનો ચહેરો મીડિયા અને જાહેર મંચોથી દૂર રાખ્યો છે.
આઇડેન્ટિફિકેશન પરેડ (TIP) શું છે?

ઓળખ પરેડ એ કાનૂની પ્રક્રિયા છે જેમાં ગુનાના સાક્ષીઓને આરોપીને ઓળખવા માટે બોલાવવામાં આવે છે. આમાં આરોપીને સમાન ઊંચાઈ અને ચહેરાના 4-5 અન્ય લોકો સાથે એક લાઇનમાં ઊભા કરવામાં આવે છે અને પછી સાક્ષીને પૂછવામાં આવે છે કે શું તે આરોપીને ઓળખી શકે છે.

આ કિસ્સામાં તહવ્વુર રાણાએ હુમલા પહેલા ભારતમાં જે લોકો સાથે મુલાકાત કરી હતી અથવા જ્યાં તે રોકાયો હતો તે સ્થળો પરથી તેની ઓળખ કરવી પડશે. તપાસ એજન્સીઓ ઈચ્છે છે કે સાક્ષીઓ કોઈપણ પૂર્વધારણા વગર આરોપીને ઓળખે તેથી રાણાનો ચહેરો હજુ પણ ઢંકાયેલો છે.

તહવ્વુર રાણાનું આતંકવાદ સાથે જોડાણ

તહવ્વુર રાણા પાકિસ્તાની મૂળનો કેનેડિયન નાગરિક છે જે અમેરિકામાં રહેતો હતો. તેના પર લશ્કર-એ-તૈયબા સાથે મળીને ભારતમાં જાસૂસી કરવાનો અને 26/11ના હુમલાના કાવતરામાં સામેલ હોવાનો આરોપ છે. તે ડેવિડ કોલમેન હેડલીનો નજીકનો સાથી છે જેણે મુંબઈ હુમલા પહેલા અનેક સ્થળોની તપાસ હાથ ધરી હતી. ભારત લાવવામાં આવ્યા પછી સુરક્ષા એજન્સીઓ તહવ્વુર રાણાની સતત પૂછપરછ કરી રહી છે અને માનવામાં આવે છે કે તેના પરત આવવાથી મુંબઈ હુમલાના ઘણા સ્તરો અને ષડયંત્રનો ખુલાસો થઈ શકે છે.

તહવ્વુર રાણાને અમેરિકાથી પ્રત્યાર્પણ બાદ ગુરુવારે સાંજે ભારત લાવવામાં આવ્યો હતો. રાણાને ખાસ અમેરિકન એરક્રાફ્ટ ગલ્ફસ્ટ્રીમ G550માં કડક સુરક્ષા હેઠળ દિલ્હી લાવવામાં આવ્યો હતો. પ્રત્યાર્પણ દરમિયાન આંતરરાષ્ટ્રીય નિયમો અને પ્રોટોકોલનું સંપૂર્ણ પાલન કરવામાં આવ્યું હતું. રાણા સાથે ફ્લાઇટમાં NIAના IG આશિષ બત્રા DIG જયા રોય SP પ્રભાત કુમાર અને NSG અને RAWના અધિકારીઓ પણ હાજર હતા. પ્લેન સાંજે 6.22 કલાકે દિલ્હી એરપોર્ટ પર લેન્ડ થયું હતું. રાણા પ્લેનમાંથી નીચે ઉતરે તે પહેલા જ તેની બેડીઓ ખુલી ગઈ હતી.