સવારના સમયે અમેરિકાએ ફોડ્યો ટેરિફ બોમ્બ : 104 % ટેક્સથી ઉકળ્યું ચીન

વિશ્વમાં હાલ ટેરિફ વોરમાં ચીન અને અમેરિકા આમને સામને થઈ ગયા છે. તેવામાં ચીનના વડાપ્રધાન લી કેકિયાંગે અમેરિકાના રાષ્ટ્રપતિ ડોનાલ્ડ ટ્રમ્પના ચીનથી આવતા તમામ સામાન પર 104% ટેરિફ લાદવાના નિર્ણય પર પ્રતિક્રિયા આપી છે. તેમણે કહ્યું કે ચીન આવી પરિસ્થિતિઓનો સામનો કરવા માટે સંપૂર્ણ રીતે તૈયાર છે અને દેશ કોઈપણ પ્રકારના નકારાત્મક બાહ્ય પ્રભાવોનો સામનો કરવા સક્ષમ છે.

લી કિઆંગે કહ્યું કે ચીનની વર્તમાન આર્થિક નીતિઓ આ વર્ષે ઊભી થઈ શકે તેવી વિવિધ અનિશ્ચિત પરિસ્થિતિઓને સંપૂર્ણપણે ધ્યાનમાં લે છે. તેમનું કહેવું છે કે ચીને પોતાની આર્થિક યોજનાઓમાં દરેક પરિસ્થિતિ માટે તૈયારી કરી છે, જેથી કોઈ પણ બાહ્ય સંકટ કે આર્થિક આંચકો દેશની અર્થવ્યવસ્થાને અસર ના કરે.

2025માં આર્થિક વૃદ્ધિ અંગે વિશ્વાસ

વડાપ્રધાન લી કેકિઆંગે એમ પણ કહ્યું હતું કે ચીનને વર્ષ 2025માં તેની અર્થવ્યવસ્થાની મજબૂતી અને વૃદ્ધિ અંગે વિશ્વાસ છે. તેઓને વિશ્વાસ છે કે બાહ્ય દબાણ વધવા છતાં ચીનનું અર્થતંત્ર સ્વસ્થ અને સ્થિર રહેશે. તેમનું નિવેદન ટ્રમ્પ દ્વારા લાદવામાં આવેલા ટેરિફ છતાં ચીનનો આર્થિક વિશ્વાસ દર્શાવે છે.

ચીનની મજબૂત સ્થિતિ પર વૈશ્વિક વિશ્વાસ

લી કેકિઆંગે મંગળવારે યુરોપિયન કમિશનના પ્રમુખ ઉર્સુલા વોન ડેર લેયેન સાથેની વાતચીતમાં આર્થિક સ્થિતિ અંગે ચીનનું મક્કમ વલણ પણ વ્યક્ત કર્યું હતું. ચીનનો આ સંદેશ વૈશ્વિક સ્તરે જણાવે છે કે તે આર્થિક પડકારોનો સામનો કરવા માટે તૈયાર છે અને આ પડકારો છતાં તે પોતાની સ્થિરતા અને વૃદ્ધિ જાળવી રાખવામાં સક્ષમ છે.

શું છે આખો મામલો?

અમેરિકાએ ચીનથી આવતા તમામ સામાન પર વધુ ટેક્સ લાદવાનો નિર્ણય કર્યો છે. વ્હાઇટ હાઉસે 8 એપ્રિલે કહ્યું હતું કે હવે ચીનથી આવનારા ઇલેક્ટ્રિક વાહનો પર 104% ટેક્સ લાગશે. આ નવો ટેક્સ 9 એપ્રિલની મધરાતથી અમલમાં આવ્યો છે.

અમેરિકાના આ પગલાને ચીન સાથે ચાલી રહેલા ટ્રેડ વોરમાં અત્યાર સુધીનો સૌથી મોટો અને કડક નિર્ણય માનવામાં આવી રહ્યો છે. ફોક્સ બિઝનેસના રિપોર્ટ અનુસાર વ્હાઇટ હાઉસની પ્રેસ સેક્રેટરી કેરોલિન લેવિટે કહ્યું કે ચીને હજુ સુધી અમેરિકા પર લગાવેલા તેના ટેક્સને હટાવ્યા નથી. આ કારણોસર અમેરિકાએ હવે 9 એપ્રિલથી ચીનથી આવતા સામાન પર કુલ 104 ટકા ટેક્સ લગાવવાનો નિર્ણય લીધો છે.

ટેક્સને ત્રણ ભાગમાં વહેંચવામાં આવ્યો છે

અમેરિકાએ હવે ચીનથી આવતા સામાન પર કુલ 104 ટકા ટેક્સ લગાવ્યો છે, જેને ત્રણ ભાગમાં વહેંચવામાં આવ્યો છે. પ્રથમ, આ વર્ષની શરૂઆતમાં 20 ટકા ટેક્સ લાદવામાં આવ્યો હતો. ત્યારબાદ, 2 એપ્રિલે, 'રેસિપ્રોકલ ટેરિફ' હેઠળ અન્ય 34 ટકા ટેક્સ લાદવામાં આવ્યો હતો. હવે ડોનાલ્ડ ટ્રમ્પે 50 ટકાનો નવો ટેક્સ ઉમેર્યો છે. આ ત્રણ ટેક્સને જોડીને કુલ ટેક્સ 104 ટકા થઈ ગયો છે, જે ચીનથી આયાત થતા માલ પર લાગુ થશે.