ઓપરેશન સિંદૂર પછી ભારત વધારી રહ્યું છે 'અવકાશીય' તાકાત : 'સ્કાય ટોર્ચ' મિશન શું છે? જાણો ભારતના સૌથી મોટો પ્રોજેક્ટ વિશે, જેમાં 52 ઉપગ્રહો અને......

પહેલગામ આતંકવાદી હુમલા અને ઓપરેશન સિંદૂર પછી ભારત રાષ્ટ્રીય સુરક્ષા માટે કડક પગલા લઈ રહ્યું છે. ભારત સરકાર એક મોટું પગલું ભરવા જઈ રહી છે, જેનો હેતુ પાકિસ્તાન અને ચીન પર નજર રાખવાનો છે. બંને દેશોની દરેક શહેર અને હરકત પર બાજ નજર રાખવી જરૂરી બની ગયું છે. ભારત સરકાર એક સ્કાય ટોર્ચ લોન્ચ કરવા જઈ રહી છે, જે બરાબર એ જ રીતે કામ કરશે જેમ અંધારામાં મશાલ કામ કરે છે. પૃથ્વી પર ગમે ત્યાં અંધારું હોય હશે પણ ભારતની આ ત્રીજી આંખ બધુ જોઈ શકશે!
આ બનશે ભારતની 'ત્રીજી આંખ'
ભારતીય સેના એક સ્કાય ટોર્ચ બનાવી રહી છે, જેને ટૂંક સમયમાં અવકાશમાં છોડવામાં આવશે. આ ટોર્ચ દુશ્મનો પર એટલી નજીકથી નજર રાખશે કે તેમની ગતિવિધિઓના ચિત્રો પણ કેદ કરી લેશે. ઓપરેશન સિંદૂર પછી તેની જરૂરિયાત વધી ગઈ છે. દુશ્મન પર નજીકથી નજર રાખવી જરૂરી બની ગઈ છે. જોકે પહેલા પણ અવકાશમાંથી દુશ્મનો પર નજર રાખવામાં આવતી હતી, પરંતુ આ વખતે ભારતે મોટા પાયે તૈયારીઓ કરી છે, જેનો ટૂંક સમયમાં લોન્ચિંગ થશે. આ તૈયારીને 'સ્કાય ટોર્ચ' મિશન નામ આપવામાં આવ્યું છે. આ મિશન દરિયાકાંઠા અને સરહદો પર 24 કલાક દેખરેખ વધારશે.
'સ્કાય ટોર્ચ' મિશન શું છે?
એક અહેવાલ મુજબ, ભારતીય સેના 52 ઉપગ્રહો લોન્ચ કરવાની તૈયારી કરી રહી છે. સ્પેસ બેઝ્ડ સર્વેલન્સ (SBS) કાર્યક્રમના ત્રીજા તબક્કાને ગયા વર્ષે ઓક્ટોબરમાં વડાપ્રધાન નરેન્દ્ર મોદીની અધ્યક્ષતા હેઠળની સુરક્ષા પરની કેબિનેટ સમિતિ દ્વારા મંજૂરી આપવામાં આવી હતી. આ મિશન પર 26968 કરોડ રૂપિયા (3.2 અબજ ડોલર) ખર્ચ કરવામાં આવશે. મિશન હેઠળ, ISRO દ્વારા 21 ઉપગ્રહો લોન્ચ કરવામાં આવશે અને 3 ખાનગી કંપનીઓની મદદથી 31 ઉપગ્રહો લોન્ચ કરવામાં આવશે. પહેલો ઉપગ્રહ એપ્રિલ 2026માં લોન્ચ થવાનો છે. બાકીના 51 ઉપગ્રહો 2029 સુધીમાં લોન્ચ કરવાનું લક્ષ્ય છે. ડિફેન્સ સ્પેસ એજન્સી (DSA) નવા લોન્ચ કરાયેલા ઉપગ્રહોની દેખરેખ રાખશે. આ મિશન સંરક્ષણ મંત્રાલયના ઇન્ટિગ્રેટેડ ડિફેન્સ સ્ટાફ (IDS)ના નેતૃત્વ હેઠળ લોન્ચ કરવામાં આવશે. ઉપગ્રહોને લો-અર્થ ઓર્બિટ (LEO) અને જીઓસ્ટેશનરી ઓર્બિટમાં લોન્ચ કરવામાં આવશે. ઓપરેશન સિંદૂર પછી, મિશન લોન્ચ કરવાનું કામ ઝડપી ગતિએ કરવામાં આવી રહ્યું છે. ત્રણ ખાનગી કંપનીઓને પણ શક્ય તેટલી વહેલી તકે ઉપગ્રહો બનાવવા માટે કહેવામાં આવ્યું છે..
હિંદ મહાસાગર ઉપગ્રહોનું કેન્દ્રબિંદુ રહેશે
તમને જણાવી દઈએ કે, સ્કાય ટોર્ચ મિશનનું કેન્દ્રબિંદુ ચીન અને પાકિસ્તાન હશે. હિંદ મહાસાગર પર નજર રાખવામાં આવશે જેથી જાણી શકાય કે ચીન હિંદ મહાસાગરમાં પોતાનું વર્ચસ્વ કેવી રીતે વધારી રહ્યું છે. ઉત્તમ રિઝોલ્યુશન સાથે ચિત્રો પણ ઉપલબ્ધ થશે. આ મિશનના લોન્ચ પછી ભારત વધુ આત્મનિર્ભર બનશે. ટ્રેકિંગ માટે અન્ય દેશો પર નિર્ભરતા ઓછી થશે. ઓપરેશન સિંદૂરની તપાસ દરમિયાન એવું બહાર આવ્યું હતું કે ચીને પહેલગામ આતંકવાદી હુમલાનું કાવતરું ઘડનારા પાકિસ્તાનને સેટેલાઇટ સહાય પૂરી પાડી હતી. ઓપરેશન સિંદૂર ચલાવતી વખતે ભારતે કાર્ટોસેટ અને રિસાટ જેવા ભારતીય ઉપગ્રહોની પણ મદદ લીધી, જેનાથી સંરક્ષણ દળોને દુશ્મનની ગતિવિધિઓ પર નજર રાખવામાં, હુમલાની અસરની પુષ્ટિ કરવામાં અને વર્તમાન પરિસ્થિતિ વિશે માહિતી પૂરી પાડવામાં મદદ મળી છે, જેના કારણે દેશની લશ્કરી સંપત્તિને મોટું નુકસાન થતું અટકાવી શકાયું છે.