અધધ...કિંમતની વ્હેલ માછલીની ઉલ્ટી સાથે બે ઝડપાયા : શું તમે જાણો છો શા માટે થાય છે વ્હેલ માછલીની ઉલ્ટીનો ઉપયોગ?

Rajkot News: વારંવાર સમાચારોમાં આવતું હોય છેકે, વ્હેલ માછલીની ઉલ્ટીના જથ્થો ઝડપાયો. આ ઉલ્ટી માર્કેટમાં લાખો રૂપિયાની કિંમતમાં વેચાય છે. ત્યારે ફરી એકવાર રાજકોટ એસઓજીની ટીમે આવા જ બે શખ્સોને વ્હેલ માછલીની લાખો રૂપિયાની કિંમતની ઉલ્ટીના જથ્થા સાથે ઝડપી પાડ્યાં છે. રાજકોટમાં SOGની ટીમે સફળ ઓપરેશન કરીને રૂ. 46.20 લાખની દુર્લભ એમ્બરગ્રીસ સાથે 2 શખ્સોની ધરપકડ કરી લીધી છે. હાલ આરોપીઓ પાસે પૂછપરછ કરીને વધુ તપાસ હાથ ધરવામાં આવી છે.

રાજકોટ SOG દ્વારા સફળ ઓપરેશન

દુર્લભ એમ્બરગ્રીસ સાથે 2 શખ્સો ઝડપાયા

રૂ. 46.20 લાખની એમ્બરગ્રીસ સાથે 2 ઝડપાયા

અમદાવાદના બે શખ્સોની કરાઈ ધરપકડ

ઉલ્લેખનીય છેકે, રાજકોટ શહેરમાં સ્પેશિયલ ઓપરેશન ગ્રુપ (SOG) દ્વારા મોટી કાર્યવાહી હાથ ધરવામાં આવી છે. પોલીસને મળેલી બાતમીના આધારે કરવામાં આવેલા ઓપરેશનમાં દુર્લભ એમ્બરગ્રીસ (વ્હેલ માછલીની ઉલ્ટી) સાથે બે શખ્સોને ઝડપવામાં આવ્યા છે. રાજકોટમાં દુર્લભ એમ્બરગ્રીસ વેચાણ કરતી ગેંગ પોલીસના સ્પેશિયલ ઓપરેશન ગ્રૂપના હાથે ઝડપાઈ ગઈ છે. ધરપકડ બાદ હાલ આરોપીઓના નેટવર્ક સુધી પહોંચવા પોલીસે તપાસ તેજ કરી દીધી છે.

મળતી માહિતી મુજબ, આરોપીઓ પાસેથી અંદાજે 0.462 કિલોગ્રામ જેટલી એમ્બરગ્રીસ જપ્ત કરવામાં આવી છે, જેની બજાર કિંમત અંદાજે રૂ. 46.20 લાખ હોવાનું જણાવવામાં આવી રહ્યું છે. પોલીસે આ મામલે અમદાવાદના સુમિત ધુલમ અને મયુર ભાવસાર નામના બે આરોપીઓને ધરપકડ કરી છે. આરોપીઓ રાજકોટમાં એમ્બરગ્રીસનું ગેરકાયદેસર વેચાણ કરવા માટે આવ્યા હોવાનું પ્રાથમિક તપાસમાં સામે આવ્યું છે.

પોલીસે બંને આરોપીઓ પાસેથી રૂ. 46 લાખથી વધુ કિંમતનો મુદ્દામાલ જપ્ત કરી આગળની કાર્યવાહી હાથ ધરી છે. એમ્બરગ્રીસ વ્હેલ માછલીમાંથી મળતું અત્યંત દુર્લભ પદાર્થ છે, જેના વેપાર પર કાયદેસર પ્રતિબંધ છે. આ ઘટનાને ગંભીરતાથી લઈ રાજકોટ SOG દ્વારા આરોપીઓના અન્ય સાગરિતો તથા સમગ્ર નેટવર્ક સુધી પહોંચવા માટે વધુ તપાસ શરૂ કરવામાં આવી છે. પોલીસ તપાસમાં હજુ વધુ ખુલાસા થવાની સંભાવના વ્યક્ત કરવામાં આવી રહી છે.

વ્હેલ માછલીની ઉલટી, જેને એમ્બરગ્રીસ (Ambergris) કહેવાય છે, તે સ્પર્મ વ્હેલના આંતરડામાંથી નીકળતો મીણ જેવો દુર્લભ પદાર્થ છે, જેની આંતરરાષ્ટ્રીય બજારમાં પ્રતિ કિલો કિંમત કરોડો રૂપિયા છે. તે અત્તર (પરફ્યુમ) અને મોંઘી દવાઓમાં સુગંધ ટકાવી રાખવા માટે વપરાય છે. આ પદાર્થ વન્યજીવ સંરક્ષણ કાયદા હેઠળ પ્રતિબંધિત છે. તે સ્પર્મ વ્હેલના આંતરડામાં બનતો એક ઘન, મીણ જેવો પદાર્થ છે, જે દરિયામાં તરતો જોવા મળે છે અને તેથી જ તેને 'તરતું સોનું' (Floating Gold) પણ કહેવામાં આવે છે.

કેમ આટલી કિંમતી? એમ્બરગ્રીસનો ઉપયોગ પરફ્યુમ ઉદ્યોગમાં સુગંધને લાંબા સમય સુધી ટકાવી રાખવા માટે થાય છે.

વપરાશ: તેનો ઉપયોગ ખાસ કરીને મોંઘા અત્તર, પરફ્યુમ અને કેટલીક દવાઓમાં થાય છે.

કાયદાકીય સ્થિતિ: ભારત (વન્યજીવ સંરક્ષણ અધિનિયમ, 1972) અને અન્ય ઘણા પશ્ચિમી દેશોમાં તેનો વેપાર કરવો ગેરકાયદેસર છે.

કિંમત: અહેવાલો અનુસાર, તેની કિંમત કરોડોમાં હોઈ શકે છે, જે કદ અને ગુણવત્તા પર આધારિત છે.