પશ્ચિમ બંગાળ વિધાનસભા ચૂંટણીના અંતિમ તબક્કાના મતદાન દરમિયાન EVM મશીન પર ‘ટેપ’ લગાવવાનો મામલો સામે આવ્યો છે. ડાયમંડ હાર્બર લોકસભા મતવિસ્તારની હાઈ-પ્રોફાઈલ સીટ ફાલ્ટામાં અનેક બૂથો પર EVM ના બટનો પર સેલોફેન ટેપ ચીપકાવવામાં આવી હોવાના અહેવાલો છે. ચૂંટણી પંચે આ પ્રભાવિત બૂથો પર ફરીથી મતદાન કરવાનો આદેશ આપ્યો છે.
શું છે સમગ્ર વિવાદ?
મતદાન શરૂ થયાના થોડા કલાકો બાદ જ ભાજપના ઉમેદવાર દેબાંશુ પાંડાએ આરોપ લગાવ્યો હતો કે અનેક બૂથો પર ભાજપ અને લેફ્ટ (CPM) ના ઉમેદવારોના નામ અને ચૂંટણી ચિન્હવાળા બટન પર ટેપ ચીપકાવી દેવામાં આવી છે. આ કારણે જ્યારે મતદારો બટન દબાવતા હતા, ત્યારે બટન દબાતું જ નહોતું. આ વિવાદ એ બેઠક (ફાલ્ટા) નો છે, જ્યાં અભિષેક બેનર્જીના નજીકના ગણાતા જહાંગીર ખાન ચૂંટણી લડી રહ્યા છે. ઉલ્લેખનીય છે કે, એક દિવસ પહેલા જ ‘સિંઘમ’ તરીકે ઓળખાતા IPS અજય પાલ શર્માએ જહાંગીર ખાનના ઘરે જઈને કડક ચેતવણી આપી હતી કે, ‘જો બદમાશી કરી તો યોગ્ય રીતે પતાવી દઈશું.’
ભાજપે શું કહ્યું?
સોશિયલ મીડિયા પર વાયરલ થયેલા કથિત વીડિયોમાં સ્પષ્ટ જોઈ શકાય છે કે કેવી રીતે વિપક્ષી ઉમેદવારોના બટનોને બ્લોક કરવામાં આવ્યા હતા. ભાજપ આઈટી સેલના વડા અમિત માલવીયાએ આ વીડિયો શેર કરતા તેને ‘ડાયમંડ હાર્બર મોડલ’ ગણાવ્યું છે. અમિત માલવીયાએ કટાક્ષ કરતા લખ્યું કે – ‘મમતા બેનર્જી આ જ ગુંડાગીરીનો બચાવ કરી રહ્યા હતા. ડાયમંડ હાર્બરમાં આ જ મોડલના આધારે ચૂંટણી જીતવામાં આવે છે, જ્યાં મતદારોને તેમનો હક વાપરતા રોકવામાં આવે છે.’
તેમણે વધુમાં જણાવ્યું કે, ‘ઘણા પોલિંગ બૂથ પર ભાજપને વોટ આપવાના ઓપ્શનને ટેપથી બ્લોક કરી દેવામાં આવ્યો છે, જેથી મતદારો પોતાની પસંદગીનો વોટ આપી શકતા નથી. આ કહેવાતું ‘ડાયમંડ હાર્બર મોડલ’ છે, એ જ મોડલ જેણે મમતા બેનર્જીના ભત્રીજા અભિષેક બેનર્જીને પોતાની લોકસભા બેઠક જીતવામાં મદદ કરી હતી. અમે ફાલ્ટાના એ તમામ પ્રભાવિત બૂથો પર તાત્કાલિક ફરીથી મતદાનની માંગ કરીએ છીએ જ્યાં આવી ઘટનાઓ બની છે.’ આ સાથે માલવીયાએ એ બૂથના નંબરો પણ લખ્યા છે જ્યાંથી ફરિયાદો મળી હતી.
મોંતેશ્વરમાં પણ હંગામો
આવો જ કિસ્સો પૂર્વ બર્ધમાનના મોંતેશ્વર વિધાનસભા મતવિસ્તારમાં પણ જોવા મળ્યો હતો. અહીં બૂથ નંબર 35 પર મતદાન ત્યારે અટકાવવું પડ્યું જ્યારે TMC ઉમેદવાર સિદ્દીકુલ્લા ચૌધરીના બટન પર ટેપ લાગેલી જોવા મળી. ચૂંટણી પંચની ટીમ અને પોલીસ તપાસ કરી રહી છે કે આ કોઈની મજાક છે કે કોઈ સુનિયોજિત કાવતરું.
શું સમગ્ર વિસ્તારમાં ફરીથી મતદાન થશે?
રિપોર્ટ અનુસાર, રાજ્યના મુખ્ય ચૂંટણી અધિકારી મનોજ કુમાર અગ્રવાલે આ બાબતને અત્યંત ગંભીરતાથી લીધી છે. તેમણે સંકેત આપ્યા છે કે જો આવી વધુ ફરિયાદો સાચી જણાશે, તો માત્ર થોડા બૂથ પર જ નહીં પરંતુ સમગ્ર મતવિસ્તારમાં ફરીથી મતદાન થઈ શકે છે. હાલમાં પ્રભાવિત બૂથ પર મતદાન અટકાવી દેવામાં આવ્યું છે અને નવા છેડેથી મતદાનની તૈયારીઓ કરવામાં આવી રહી છે.
