West Bengal New CM: પશ્ચિમ બંગાળની રાજનીતિમાં ઐતિહાસિક ફેરફાર બાદ હવે સૌની નજર એક જ સવાલ પર છે. રાજ્યના આગામી મુખ્યમંત્રી કોણ બનશે? વિધાનસભા ચૂંટણીમાં ભાજપને મળેલી મોટી જીત બાદ કોલકાતાથી લઈને દિલ્હી સુધી રાજકીય ચર્ચાઓનો માહોલ ગરમાયો છે. પાર્ટી તરફથી હજી સત્તાવાર જાહેરાત કરવામાં આવી નથી પરંતુ સુવેન્દુ અધિકારીનું નામ સૌથી મજબૂત દાવેદાર તરીકે સામે આવી રહ્યું છે. ભાજપે પશ્ચિમ બંગાળમાં પ્રથમ વખત પૂર્ણ બહુમતી સાથે સરકાર બનાવવાની સ્થિતિ હાંસલ કરી છે. પરિણામે હવે માત્ર CM નહીં પરંતુ સંપૂર્ણ કેબિનેટનું સંતુલન કેવી રીતે ગોઠવાશે તેના પર પણ ચર્ચા શરૂ થઈ ગઈ છે. ખાસ કરીને “બે ડેપ્યુટી CM” ફોર્મ્યુલા અપનાવવામાં આવશે કે નહીં, તે મુદ્દે રાજકીય અટકળો વધી રહી છે.
સુવેન્દુ અધિકારી કેમ સૌથી આગળ?
સુવેન્દુ અધિકારી છેલ્લા કેટલાક વર્ષોમાં બંગાળ BJPનો સૌથી આક્રમક અને પ્રભાવશાળી ચહેરો બનીને ઉભર્યા છે. તેઓ અગાઉ તૃણમૂલ કોંગ્રેસમાં મમતા બેનર્જીના વિશ્વાસુ નેતા હતા પરંતુ 2020માં BJPમાં જોડાયા બાદ રાજ્યની રાજનીતિમાં મોટો ફેરફાર લાવ્યો. 2021માં નંદીગ્રામમાં મમતા બેનર્જીને હરાવી તેઓ રાષ્ટ્રીય સ્તરે ચર્ચામાં આવ્યા હતા. આ વખતે પણ તેમણે મમતા બેનર્જીના ગઢમાં BJP માટે મજબૂત અભિયાન ચલાવ્યું હતું. રિપોર્ટ મુજબ BJPના કેન્દ્રીય નેતૃત્વે પહેલેથી જ સંકેત આપ્યો હતો કે બંગાળનો CM “બંગાળી ભાષા બોલતો અને રાજ્યની જમીન સાથે જોડાયેલો ચહેરો” હશે. આ માપદંડમાં સુવેન્દુ અધિકારીનું નામ સૌથી મજબૂત ગણાય છે.
તમિલનાડુમાં ખેલાશે 'મહાભારત' : જો DMK-AIADMK સાથે આવશે તો વિજયના 107 ધારાસભ્યો આપશે રાજીનામું!
શું BJP અપનાવશે 2 ડેપ્યુટી CM મોડલ?
છેલ્લાં કેટલાક રાજ્યોમાં BJPએ CM સાથે બે ડેપ્યુટી CMની વ્યૂહરચના અપનાવી છે. મધ્ય પ્રદેશ, રાજસ્થાન, છત્તીસગઢ, મહારાષ્ટ્ર અને બિહારમાં પાર્ટીએ આ મોડલ અમલમાં મૂક્યું હતું. હવે પશ્ચિમ બંગાળમાં પણ તે જ ફોર્મ્યુલા અપનાવવામાં આવી શકે તેવી ચર્ચા છે. રાજકીય વિશ્લેષકો માને છે કે બંગાળ જેવી સામાજિક અને રાજકીય રીતે જટિલ રાજ્યમાં વિવિધ વર્ગો અને વિસ્તારોનું પ્રતિનિધિત્વ આપવા BJP બે ડેપ્યુટી CM બનાવી શકે છે. આથી પાર્ટી સંગઠન અને સરકાર બંનેમાં સંતુલન જાળવી શકે છે.
ડેપ્યુટી CM માટે કયા નામ ચર્ચામાં?
જો સુવેન્દુ અધિકારી મુખ્યમંત્રી બને છે તો ડેપ્યુટી CM માટે અનેક મોટા નામોની ચર્ચા થઈ રહી છે. તેમાં સૌથી વધુ ચર્ચામાં અગ્નિમિત્રા પોલ, દિલીપ ઘોષ, રૂપા ગાંગુલી અને સમીક ભટ્ટાચાર્યના નામ છે. અગ્નિમિત્રા પોલ BJPની ફાયરબ્રાન્ડ મહિલા નેતા તરીકે ઓળખાય છે. ફેશન ડિઝાઇનરથી રાજકારણમાં આવેલી અગ્નિમિત્રાએ આસનસોલ દક્ષિણમાંથી મોટી જીત મેળવી હતી. મહિલા ચહેરા તરીકે તેઓ BJP માટે મહત્વપૂર્ણ બની શકે છે.
દિલીપ ઘોષને બંગાળ BJPના સંગઠનનો મજબૂત આધાર માનવામાં આવે છે. રાજ્યમાં BJPને મુખ્ય વિરોધ પક્ષ તરીકે ઉભું કરવાનું મોટું શ્રેય તેમને આપવામાં આવે છે. તેમની ગ્રાઉન્ડ કનેક્ટ અને સંગઠન પરની પકડને કારણે તેઓ પણ મજબૂત દાવેદાર છે. રૂપા ગાંગુલીનું નામ પણ ચર્ચામાં છે. ‘મહાભારત’માં દ્રૌપદીના પાત્રથી જાણીતી બનેલી રૂપા ગાંગુલી ઘણા વર્ષોથી BJP સાથે જોડાયેલા છે અને મહિલા મુદ્દાઓ પર સક્રિય અવાજ ઉઠાવતા રહ્યા છે. તે ઉપરાંત રાજ્ય BJP પ્રમુખ સમીક ભટ્ટાચાર્યનું નામ પણ રાજકીય વર્તુળોમાં ચર્ચાઈ રહ્યું છે. તેઓ સંગઠનાત્મક રીતે મજબૂત નેતા ગણાય છે અને RSS પૃષ્ઠભૂમિ ધરાવે છે.
આજે થઈ શકે છે સત્તાવાર જાહેરાત
રિપોર્ટ્સ મુજબ આજે BJP વિધાનમંડળ દળની બેઠક યોજાઈ શકે છે, જેમાં CMના નામ પર અંતિમ નિર્ણય લેવાશે. કેન્દ્રીય નેતૃત્વ તરફથી અમિત શાહ અને અન્ય નિરીક્ષકો કોલકાતા પહોંચી ચૂક્યા હોવાનું પણ કહેવાઈ રહ્યું છે. બેઠક બાદ સત્તાવાર જાહેરાત થઈ શકે છે. પશ્ચિમ બંગાળની રાજનીતિમાં આ બદલાવ માત્ર સત્તા પરિવર્તન નથી, પરંતુ રાજ્યના રાજકીય સમીકરણોમાં મોટું પરિવર્તન માનવામાં આવી રહ્યું છે. હવે જોવાનું રહેશે કે BJP સુવેન્દુ અધિકારી પર દાવ લગાવે છે કે પછી કોઈ સરપ્રાઈઝ ચહેરાને આગળ લાવે છે.
