West Bengal News: પશ્ચિમ બંગાળમાં ઐતિહાસિક જીત બાદ હવે ભાજપ સરકાર રચનાની પ્રક્રિયા અંતિમ તબક્કામાં પહોંચી ગઈ છે. રાજ્યમાં નવી સરકારના નેતૃત્વને લઈને રાજકીય ચર્ચાઓ વચ્ચે કેન્દ્રીય ગૃહમંત્રી અમિત શાહ ગુરુવારે કોલકાતા પહોંચ્યા. ભાજપે તેમને ધારાસભ્ય દળના નેતા પસંદ કરવા માટે કેન્દ્રીય નિરીક્ષક તરીકે નિયુક્ત કર્યા છે, જ્યારે ઓડિશાના મુખ્યમંત્રી મોહન ચરણ માઝીને સહ-નિરીક્ષક બનાવવામાં આવ્યા છે.
આજે બપોરે 2 વાગ્યે યોજાનારી BJP ધારાસભ્ય દળની બેઠકમાં નવા મુખ્યમંત્રીના નામની સત્તાવાર જાહેરાત થઈ શકે છે. બેઠક બાદ રાજ્યમાં સરકાર રચનાની પ્રક્રિયા ઝડપી બનશે. નવી સરકારનો શપથ ગ્રહણ સમારોહ 9 મેના રોજ કોલકાતાના બ્રિગેડ પરેડ ગ્રાઉન્ડમાં યોજાશે, જેને ભાજપ રાજ્યમાં પોતાના નવા રાજકીય યુગની શરૂઆત તરીકે રજૂ કરવા માંગે છે.
સુવેન્દુ અધિકારીનો રાજ્યાભિષેક નક્કી!: શું બંગાળમાં ભાજપના 2-ડેપ્યુટી CMની લાગુ થશે ફોર્મ્યુલા? આ નામ રેસમાં સૌથી આગળ
સુવેન્દુ અધિકારી સૌથી આગળ
મુખ્યમંત્રી પદની રેસમાં ભાજપના દિગ્ગજ નેતા સુવેન્દુ અધિકારી સૌથી મજબૂત દાવેદાર તરીકે સામે આવ્યા છે. સુવેન્દુએ ભવાનીપુર બેઠક પરથી મમતા બેનર્જીને હરાવીને બંગાળની રાજનીતિમાં મોટો સંદેશ આપ્યો છે. ખાસ વાત એ છે કે 2021ની વિધાનસભા ચૂંટણીમાં પણ તેમણે નંદીગ્રામ બેઠક પરથી મમતાને હરાવ્યા હતા. આ વખતે તેઓ નંદીગ્રામ અને ભવાનીપુર બંને બેઠકો પરથી જીત્યા છે, જેના કારણે તેમની રાજકીય પકડ વધુ મજબૂત બની છે. ભાજપના સંગઠન અને કેન્દ્રિય નેતૃત્વમાં પણ સુવેન્દુને મહત્વપૂર્ણ ચહેરા તરીકે જોવામાં આવે છે. રાજકીય વિશ્લેષકો માને છે કે બંગાળમાં મમતાના પ્રભાવ સામે સૌથી અસરકારક વિરોધી ચહેરો તરીકે સુવેન્દુ ઉભર્યા છે. ભાજપ માટે આ જીત માત્ર ચૂંટણી વિજય નહીં પરંતુ લાંબા સમયથી ચાલતી પ્રાદેશિક રાજનીતિ સામેની વ્યૂહાત્મક સફળતા પણ છે.
તમિલનાડુમાં ખેલાશે 'મહાભારત': જો DMK-AIADMK સાથે આવશે તો વિજયના 107 ધારાસભ્યો આપશે રાજીનામું!
BJPની ઐતિહાસિક જીત
4 મેના રોજ જાહેર થયેલા પરિણામોમાં ભાજપે પશ્ચિમ બંગાળની 294માંથી 206 બેઠકો જીતીને સ્પષ્ટ બહુમતી મેળવી હતી. બીજી તરફ મમતા બેનર્જીની તૃણમૂલ કોંગ્રેસ માત્ર 81 બેઠકો પર સીમિત રહી ગઈ. એક બેઠક ફાલ્ટા પર ફરી મતદાન થવાનું હોવાથી પરિણામ 24 મેના રોજ આવશે. ભાજપ માટે આ જીત અનેક કારણોસર ઐતિહાસિક માનવામાં આવે છે. પ્રથમ વખત પાર્ટી રાજ્યમાં સરકાર બનાવવા જઈ રહી છે. લાંબા સમય સુધી ડાબેરી અને પછી TMCના પ્રભાવ હેઠળ રહેલા બંગાળમાં ભાજપે સત્તા સુધી પહોંચીને રાષ્ટ્રીય રાજનીતિમાં મોટો સંદેશ આપ્યો છે. ભવાનીપુર બેઠક પર સુવેન્દુ અધિકારીએ મમતા બેનર્જીને 15,114 મતોથી હરાવ્યા હતા. આ હાર મમતાના રાજકીય કારકિર્દી માટે મોટો ઝટકો માનવામાં આવી રહ્યો છે, કારણ કે સુવેન્દુ સામે તેમની આ સતત બીજી હાર છે.
બંગાળમાં કેવું હશે ભાજપનું પ્રથમ મંત્રીમંડળ?: જાણો કયા કયા નેતાઓ બની શકે છે મંત્રી, આ છે શાહનો 'માસ્ટર પ્લાન'
મમતાના આક્ષેપોથી રાજકીય ગરમી
ચૂંટણી પરિણામો બાદ મમતા બેનર્જીએ હાર સ્વીકારવાની જગ્યાએ ચૂંટણી પંચ અને ભાજપ પર ગંભીર આરોપો લગાવ્યા હતા. કોલકાતામાં યોજાયેલી પ્રેસ કોન્ફરન્સમાં તેમણે કહ્યું હતું કે “અમે જનાદેશથી નહીં, ષડયંત્રથી હાર્યા છીએ.” મમતાએ સ્પષ્ટ કર્યું કે તેઓ મુખ્યમંત્રી પદ પરથી રાજીનામું આપવા રાજભવન નહીં જાય. તેમણે ચૂંટણી પંચને “અસલી વિલન” ગણાવીને આરોપ લગાવ્યો કે ભાજપ સાથે મળીને 100 બેઠકો “લૂંટી” લેવામાં આવી છે. તેમણે પોતાને “આઝાદ” ગણાવતા કહ્યું કે હવે તેમની પાસે કોઈ ખુરશી નથી અને તેઓ રસ્તાઓ પર રહીને લડત લડશે. આ નિવેદનો દર્શાવે છે કે TMC હવે વિરોધ પક્ષ તરીકે આક્રમક રાજકીય ભૂમિકા ભજવવા તૈયાર થઈ રહી છે.
કોણે કરાવી ચંદ્રનાથ રથની હત્યા? એરફોર્સ છોડી કેમ ફરતો હતો નેતા સાથે?: તેની પાસે કયા પુરાવા હતા જેનાથી પોલ ખૂલવાનો TMCમે લાગતો હતો ડર?
હિંસા અને તણાવ વચ્ચે સરકાર રચના
ચૂંટણી પરિણામો બાદ બંગાળમાં રાજકીય તણાવ પણ વધી ગયો છે. 6 મેના રોજ સુવેન્દુ અધિકારીના પર્સનલ આસિસ્ટન્ટની ગોળી મારીને હત્યા કરવામાં આવી હતી. ભાજપે આ ઘટનામાં TMC પર આરોપ લગાવ્યો છે. સુવેન્દુએ જાહેરમાં કહ્યું કે મમતાને હરાવવાના કારણે તેમના નજીકના લોકો નિશાન બની રહ્યા છે. આ ઘટનાએ રાજ્યની કાયદો-વ્યવસ્થાને લઈને ફરી પ્રશ્નો ઉભા કર્યા છે.
નવી સરકાર માટે સૌથી મોટો પડકાર રાજકીય હિંસા પર નિયંત્રણ લાવવાનો રહેશે. બંગાળ લાંબા સમયથી રાજકીય અથડામણો માટે ચર્ચામાં રહ્યું છે અને સત્તા પરિવર્તન બાદ આ તણાવ વધુ વધવાની શક્યતા વ્યક્ત થઈ રહી છે.
ભાજપ નેતા સુવેન્દુ અધિકારીના PAનો હત્યારો ઝડપાયો: હિસ્ટ્રીશીટરને કોણે આપી હતી સોપારી? બંગાળ હત્યાકાંડમાં ખુલી શકે છે મોટા નામો
બંગાળમાં છેલ્લાં 5 દિવસનો ઘટનાક્રમઃ
4 મે: બંગાળ ચૂંટણીના પરિણામો આવ્યા, ભાજપ પ્રથમ વખત સરકાર બનાવવા જઈ રહી છે
5 મે: મમતા બોલ્યા- હું આઝાદ છું, સિંહની જેમ લડીશ; રાજીનામું નહીં આપું
6 મે: સુવેન્દુના PAની ગોળી મારીને હત્યા, TMC પર આરોપ
7 મે: સુવેન્દુ બોલ્યા - મેં મમતાને હરાવ્યા, તેથી પીએની હત્યા
8 મે: બંગાળમાં શપથ ગ્રહણ સમારોહને લઈને તૈયારીઓ તેજ
સામાન્ય યુવતી સમજીને અડધી રાતે 40 ટપોરીઓએ કરી છેડતી: જાણો કોણ છે એ IPS બી સુમતિ
શપથ ગ્રહણ સમારોહ પર રાષ્ટ્રીય નજર
9 મેના રોજ યોજાનાર શપથ ગ્રહણ સમારોહને ભાજપ ભવ્ય બનાવવાની તૈયારીમાં છે. બ્રિગેડ પરેડ ગ્રાઉન્ડમાં યોજાનાર કાર્યક્રમમાં કેન્દ્ર સરકારના અનેક મોટા નેતાઓ હાજરી આપી શકે છે. રાજકીય રીતે આ સમારોહ બંગાળમાં ભાજપના સત્તાકાળની શરૂઆતનું પ્રતીક બનશે. સાથે જ ભાજપ આ પ્રસંગ દ્વારા પૂર્વ ભારતની રાજનીતિમાં પોતાના વધતા પ્રભાવનો સંદેશ દેશભરમાં પહોંચાડવા માંગે છે.
પશ્ચિમ બંગાળમાં ભાજપની જીત બાદ હવે સૌની નજર નવા મુખ્યમંત્રીના નામ પર છે. અમિત શાહની હાજરીમાં યોજાનારી ધારાસભ્ય દળની બેઠક રાજ્યની આગામી રાજકીય દિશા નક્કી કરશે. સુવેન્દુ અધિકારીનું નામ સૌથી આગળ હોવા છતાં અંતિમ નિર્ણય બેઠક બાદ જ સ્પષ્ટ થશે. બંગાળમાં હવે માત્ર સરકાર નહીં બદલાઈ રહી, પરંતુ લાંબા સમયથી ચાલતી રાજકીય વ્યવસ્થામાં પણ મોટો ફેરફાર જોવા મળી રહ્યો છે.
