Godhra weapons : પંચમહાલ જિલ્લાના ગોધરા શહેરમાં પોલીસે ગેરકાયદેસર હથિયારો રાખવાના મામલે મોટી કાર્યવાહી કરી છે. ગોધરા શહેરના પશ્ચિમ વિસ્તારમાં આવેલી વચલા ઓઢા મુસ્લિમએ સોસાયટીમાં રહેતા અહેમદ હુસેન યુસુફ મોહનના રહેણાક મકાન તથા સીમલા વિસ્તારમાં આવેલી તેની દુકાનમાં હથિયારો રાખવામાં આવ્યા હોવાની બાતમીના આધારે પોલીસ દ્વારા કાર્યવાહી હાથ ધરવામાં આવી હતી.
ગેરકાયદેસર હથિયારોનો મોટો જથ્થો ઝડપાયો
આ કાર્યવાહીમાં ગોધરા એસઓજી અને ગોધરા શહેર બી ડિવિઝન પોલીસની ટીમે સંયુક્ત રીતે રેડ કરી હતી. તપાસ દરમિયાન પોલીસને ડબલ બેરલ બંદૂક નંગ 2, જીવતા કારતુસ નંગ 4, ખાલી કારતુસ નંગ 11, છરા ભરેલા ડબ્બા નંગ 6, બંદૂક મૂકવાના કવર નંગ 7 તેમજ એક મોબાઈલ ફોન મળી આવ્યા હતા. પોલીસે કુલ રૂ. 1.33 લાખના મુદ્દામાલ સાથે અહેમદ હુસેન યુસુફ મોહનની ધરપકડ કરી છે.
આર્મ્સ એક્ટ હેઠળ ગુનો નોંધવામાં આવ્યો
ઝડપાયેલા આરોપી અહેમદ હુસેન યુસુફ મોહનની પ્રાથમિક પૂછપરછ દરમિયાન ખુલાસો થયો છે કે આ તમામ ગેરકાયદેસર હથિયારો તેણે ગોધરા શહેરના ભિલોડિયા પ્લોટ વિસ્તારમાં રહેતા રહીશ હુસેન મીઠા પાસેથી મેળવ્યા હતા. આ સમગ્ર મામલે ગોધરા શહેર બી ડિવિઝન પોલીસ મથકે આર્મ્સ એક્ટ હેઠળ ગુનો નોંધવામાં આવ્યો છે. પોલીસ દ્વારા ફરાર આરોપી રહીશ હુસેન મીઠાને ઝડપી પાડવા માટે તપાસ તેજ કરી દેવામાં આવી છે.
હથિયાર સપ્લાયના નેટવર્ક અંગે તપાસ હાથ ધરી
પોલીસ તપાસમાં વધુમાં સામે આવ્યું છે કે ફરાર આરોપી રહીશ હુસેન મીઠા સામે અગાઉ ગોધરા શહેર બી ડિવિઝન પોલીસ સ્ટેશનમાં બે ગુના તથા ગોધરા રેલવે પોલીસ સ્ટેશનમાં રેલ્વે એક્ટ મુજબ એક ગુનો નોંધાયેલો છે. હાલ પોલીસ આ સમગ્ર હથિયાર સપ્લાય નેટવર્ક અંગે વધુ ઊંડાણપૂર્વક તપાસ કરી રહી છે.
