YouTube પર વીડિયો જોતી વખતે વચ્ચે આવતી લાંબી અને 'Unskippable' (સ્કીપ ન કરી શકાય તેવી) જાહેરાતોથી દરેક યુઝર પરેશાન હોય છે. ઘણીવાર 15 થી 30 સેકન્ડ સુધીની જાહેરાતો ફરજિયાત જોવી પડે છે. પરંતુ હવે એક દેશે આ મામલે ઐતિહાસિક નિર્ણય લેતા નવો કાયદો બનાવ્યો છે, જેનાથી યુઝર્સને મોટી રાહત મળશે.
વિયેતનામ સરકારે લીધો મોટો નિર્ણય
વિયેતનામ (Vietnam) સરકારે જાહેરાત કરી છે કે હવે કોઈપણ ઓનલાઈન પ્લેટફોર્મ, જેમાં YouTube પણ સામેલ છે, તે 5 સેકન્ડથી વધુ સમયની એવી જાહેરાત નહીં બતાવી શકે જેને સ્કીપ ન કરી શકાય. એટલે કે, દરેક વીડિયો એડમાં 5 સેકન્ડ પછી 'Skip' કરવાનું બટન આપવું ફરજિયાત રહેશે.
નવા કાયદા (Decree 342/2025)ની મુખ્ય વાતો:
5 સેકન્ડની મર્યાદા: વીડિયો અથવા એનિમેટેડ જાહેરાતોમાં મહત્તમ 5 સેકન્ડ પછી સ્કીપ કરવાનો વિકલ્પ આપવો પડશે.
સ્ટેટિક એડ્સ: સ્થિર ઈમેજ (Static Ads) વાળી જાહેરાતોને તો તરત જ બંધ કરવાનો વિકલ્પ આપવો પડશે.
ભ્રામક બટન પર પ્રતિબંધ: જાહેરાતોમાં 'Close' કરવા માટે કોઈ નકલી કે ગૂંચવણભર્યા આઈકોનનો ઉપયોગ કરી શકાશે નહીં.
રિપોર્ટિંગ ઓપ્શન: દરેક જાહેરાત સાથે તેને રિપોર્ટ કરવાનો અથવા નાપસંદ કરવાનો સ્પષ્ટ વિકલ્પ હોવો જરૂરી છે.
ક્યારથી લાગુ થશે આ નિયમ?
વિયેતનામનો આ નવો કાયદો 15 ફેબ્રુઆરી, 2026 થી અમલમાં આવશે. જો કોઈ પ્લેટફોર્મ આ નિયમનું ઉલ્લંઘન કરશે તો સરકાર તેમની સેવાઓ પર ટેકનિકલ પ્રતિબંધ લગાવી શકે છે અથવા 24 કલાકમાં જાહેરાત હટાવવાનો આદેશ આપી શકે છે.
ગ્લોબલ સ્તરે ચર્ચા
આ સમાચાર વાયરલ થતા જ સોશિયલ મીડિયા પ્લેટફોર્મ Reddit પર દુનિયાભરના યુઝર્સ વિયેતનામ સરકારના આ નિર્ણયના વખાણ કરી રહ્યા છે. અમેરિકા અને યુરોપના યુઝર્સ પણ પોતાના દેશમાં આવો કાયદો ઈચ્છે છે. હાલમાં YouTube Premium લીધા વગર લાંબી એડ્સથી બચવાનો કોઈ સત્તાવાર રસ્તો નથી, ત્યારે આ કાયદો 'કન્ઝ્યુમર રાઈટ્સ' માટે મોટી ક્રાંતિ માનવામાં આવી રહ્યો છે.
