વડોદરા શહેરના વોર્ડ-14 વિસ્તારમાં ડ્રેનેજ કામગીરી દરમિયાન ભારતીય જનતા પાર્ટી (ભાજપ) અને કોંગ્રેસના મહિલા કાઉન્સિલરો વચ્ચે જાહેરમાં ઉગ્ર બોલાચાલી થતાં રાજકીય માહોલ ગરમાયો છે. ઘડિયાળી પોળ વિસ્તારમાં ચાલી રહેલી ડ્રેનેજની કામગીરી દરમિયાન મશીન અન્ય સ્થળે લઈ જવાના મુદ્દે બંને પક્ષના પ્રતિનિધિઓ આમને-સામને આવી ગયા હતા. ઘટનાનો વીડિયો પણ સ્થાનિકોમાં ચર્ચાનો વિષય બન્યો છે.
મળતી માહિતી મુજબ, વોર્ડ-14માં ભાજપ અને કોંગ્રેસના બે-બે કાઉન્સિલરો ચૂંટાયેલા છે. ડ્રેનેજ કામગીરી માટે ફાળવાયેલા મશીનને અન્ય સ્થળે ખસેડવાના મુદ્દે વિવાદ ઊભો થતાં ભાજપના કાઉન્સિલર અંકિતા સોની અને કોંગ્રેસના કાઉન્સિલર દીપા શ્રીવાસ્તવ વચ્ચે જાહેરમાં બોલાચાલી થઈ હતી. ઘટનાના સમયે સ્થાનિક નાગરિકો પણ મોટી સંખ્યામાં હાજર હતા.
વિકાસકાર્યના શ્રેયને લઈને ચર્ચા
સ્થાનિક સ્તરે એવી ચર્ચા છે કે વિસ્તારમાં ચાલી રહેલી ડ્રેનેજ કામગીરીના શ્રેયને લઈને બંને પક્ષ વચ્ચે મતભેદ સર્જાયા હતા. જોકે, આ અંગે ભાજપ અથવા કોંગ્રેસ તરફથી કોઈ સત્તાવાર નિવેદન જાહેર કરવામાં આવ્યું નથી. તેથી વિવાદનું ચોક્કસ કારણ સત્તાવાર રીતે સ્પષ્ટ થયું નથી. જાહેરમાં ચૂંટાયેલા પ્રતિનિધિઓ વચ્ચે થયેલી બોલાચાલીને કારણે થોડા સમય માટે સ્થળ પર અફરાતફરીનો માહોલ સર્જાયો હતો. જોકે, આ ઘટનામાં કોઈ ઇજા કે પોલીસ ફરિયાદ નોંધાઈ હોવાની માહિતી સામે આવી નથી.
આ પણ વાંચો: ચાંગોદર પ્લાઝમા કૌભાંડમાં વધુ એક આરોપીની ધરપકડ : ભેળસેળયુક્ત 1,140 યુનિટ પ્લાઝમાનો નાશ
નાગરિકોએ વ્યક્ત કરી ચિંતા
સ્થાનિક રહેવાસીઓનું કહેવું છે કે વિકાસલક્ષી કામગીરી દરમિયાન રાજકીય વિવાદ સર્જાય તો તેનો સીધો પ્રભાવ સામાન્ય નાગરિકો પર પડી શકે છે. કેટલાક નાગરિકોએ જણાવ્યું કે વોર્ડમાં ભાજપ અને કોંગ્રેસ બંનેના ચૂંટાયેલા પ્રતિનિધિઓ હોવાથી કઈ સમસ્યા માટે કોનો સંપર્ક કરવો તે અંગે પણ મૂંઝવણ સર્જાય છે. નાગરિકોનું માનવું છે કે રાજકીય મતભેદોને બાજુએ રાખીને જનહિતના વિકાસકાર્યો સમયસર પૂર્ણ થાય તે વધુ જરૂરી છે. શહેરને સ્માર્ટ સિટી તરીકે વિકસાવવાના પ્રયાસોમાં ચૂંટાયેલા પ્રતિનિધિઓ વચ્ચે સંકલન અને સહકાર જળવાઈ રહે તેવી પણ સ્થાનિકોએ અપેક્ષા વ્યક્ત કરી છે. હાલ આ સમગ્ર ઘટનાને લઈને કોઈપણ પક્ષ તરફથી સત્તાવાર સ્પષ્ટતા અથવા પ્રતિક્રિયા સામે આવી નથી.
