ખેલ મહાકુંભ 2025 અંતર્ગત સમા ઈન્ડોર સ્પોર્ટ્સ કોમ્પ્લેક્સ, વડોદરા ખાતે 18 થી 19 જાન્યુઆરી 2026 દરમિયાન યોજાયેલી સ્વિમિંગ સ્પર્ધામાં વડોદરાના તરવૈયાઓએ શાનદાર પ્રદર્શન કરી શહેરનું ગૌરવ વધાર્યું છે. મહેનત, સંકલ્પ અને સતત તાલીમના બળ પર તરવૈયાઓએ કુલ 58 પદકો મેળવી ઉત્કૃષ્ટ સિદ્ધિ હાંસલ કરી હતી. આ પદકોમાં 14 સુવર્ણ, 9 રજત અને 35 કાંસ્ય પદકોનો સમાવેશ થાય છે, જે વડોદરાની રમતગમત પ્રતિભાનું જીવંત ઉદાહરણ પૂરું પાડે છે.
સૌમ્યા તિવારીએ બે સુવર્ણ અને બે કાંસ્ય પદકો મેળવ્યા
સ્પર્ધામાં અઝિંક્યા સિંહ, અનુષ્યા કૈથવાસ, ફોરમ બ્રહ્મભટ્ટ, સૌમ્યા તિવારી, ઓમ કદમ અને હર્ષ મહેશ્વરીએ સુવર્ણ પદકો મેળવી વિશેષ સિદ્ધિ નોંધાવી હતી. ખાસ કરીને અઝિંક્યા સિંહે ચાર સુવર્ણ અને એક રજત પદક જીતી ટીમને મજબૂત બનાવવામાં મહત્વપૂર્ણ ફાળો આપ્યો હતો, જ્યારે અનુષ્યા કૈથવાસે ત્રણ સુવર્ણ, એક રજત અને એક કાંસ્ય પદક સાથે પોતાની શ્રેષ્ઠતા સાબિત કરી હતી. ફોરમ બ્રહ્મભટ્ટે બે સુવર્ણ અને બે કાંસ્ય, ઓમ કદમે બે સુવર્ણ અને ત્રણ કાંસ્ય, તેમજ સૌમ્યા તિવારીએ બે સુવર્ણ અને બે કાંસ્ય પદકો મેળવી પોતાની પ્રતિભા ઉજાગર કરી હતી. હર્ષ મહેશ્વરીએ પણ એક સુવર્ણ અને એક રજત પદક મેળવી ટીમની સફળતામાં યોગદાન આપ્યું હતું.
પ્રેરણાદાયક ઉદાહરણ
અન્ય ખેલાડીઓમાં મહેતાએ બે રજત અને ત્રણ કાંસ્ય, જિનલ પિત્રોડાએ એક રજત અને ત્રણ કાંસ્ય, તેમજ હાર્દી લાડાણી, હર્ષિલ વાઘ, મનદીપ સિંહ સંધા, નિરાલી ભલગામિયા, રેનુંકા પાહુ અને લીલા ચૌહાન સહિતના તરવૈયાઓએ કાંસ્ય પદકો મેળવી ટીમની કુલ સિદ્ધિને વધુ મજબૂત બનાવી હતી. 40 વર્ષથી ઉપરની પુરુષ કેટેગરીમાં કૃષ્ણકાંત રેએ બે રજત અને એક કાંસ્ય પદક મેળવી પ્રશંસનીય પ્રદર્શન કર્યું હતું, જ્યારે 60 વર્ષથી ઉપરની મહિલા કેટેગરીમાં લીલા ચૌહાનએ કાંસ્ય પદક મેળવી પ્રેરણાદાયક ઉદાહરણ પૂરું પાડ્યું હતું.
આ નોંધપાત્ર સફળતા પાછળ કોચ વિવેક સિંહ બોરલિયા અને કોચ કૃષ્ણ પંડ્યાનું માર્ગદર્શન, આયોજનબદ્ધ તાલીમ અને ખેલાડીઓની અવિરત મહેનતનું મહત્વપૂર્ણ યોગદાન રહ્યું છે. વડોદરાના તરવૈયાઓના આ શાનદાર પ્રદર્શનથી રાજ્યમાં સ્પર્ધાત્મક સ્વિમિંગ માટે વડોદરાની ઓળખ વધુ મજબૂત બની છે અને આવનારા સમયમાં વધુ મોટી સિદ્ધિઓની આશા જગાવી છે.
