Vadodara News: વડોદરા જિલ્લાના પાદરા પોલીસ સ્ટેશનની ટીમે બે વર્ષથી કાયદાની પકડથી દૂર રહેલા દારૂના ગુનાના એક ફરાર આરોપીને ઝડપી પાડવા માટે એવી યુક્તિ અપનાવી કે, જે હાલ પોલીસ વિભાગમાં ચર્ચાનો વિષય બની છે. આરોપી સુધી પહોંચવા માટે પોલીસે ટેકનિકલ સર્વેલન્સ, બાતમીદારોના નેટવર્ક અને પોતાની સૂઝબૂઝનો ઉપયોગ કરીને રાજસ્થાન સુધી પહોંચીને આખરે સફળતા મેળવી હતી. ખાસ વાત એ છે કે, આરોપીને પકડવા માટે પોલીસ કર્મચારીઓની અનોખી રણનીતિના કારણે આરોપીને પોલીસની હાજરીની શંકા પણ ન ગઈ પોલીસના હાથે ઝડપાઈ ગયો હતો. આ સમગ્ર ઓપરેશનને પાદરા પોલીસ માટે મોટી સફળતા માનવામાં આવી રહી છે.
2024ના દારૂના ગુનામાં વોન્ટેડ હતો આરોપી
મળતી માહિતી મુજબ, વર્ષ 2024 દરમિયાન પાદરા પોલીસ સ્ટેશનમાં દારૂ સંબંધિત એક ગંભીર ગુનો નોંધાયો હતો. તપાસ દરમિયાન આ કેસમાં સુરેન્દ્રગીરી ગોરધનગીરી ગોસ્વામી નામના વ્યક્તિની સંડોવણી સામે આવી હતી. ગુનો નોંધાયા બાદ આરોપી પોલીસની નજરથી બચી ગયો હતો અને સતત પોતાનું સ્થાન બદલતો રહ્યો હતો. પોલીસે અનેક વખત તેની શોધખોળ કરી હતી, પરંતુ આરોપી હાથ લાગતો નહોતો. છેલ્લા બે વર્ષથી તે ફરાર જાહેર કરવામાં આવ્યો હતો અને પોલીસ માટે તેને શોધવો પડકારરૂપ બની ગયો હતો.
સોશિયલ મીડિયા અને મોબાઇલ લોકેશન બન્યા મહત્વના હથિયાર
તાજેતરમાં પાદરા પોલીસને ચોક્કસ બાતમી મળી હતી કે આરોપી પોતાના વતન રાજસ્થાનના જોધપુર જિલ્લામાં છુપાયો છે. આ માહિતી મળ્યા બાદ પોલીસે આરોપીના સોશિયલ મીડિયા એકાઉન્ટ્સ, મોબાઇલ એક્ટિવિટી અને અન્ય ટેકનિકલ માહિતીનું વિશ્લેષણ શરૂ કર્યું હતું. ટેકનિકલ સર્વેલન્સના આધારે આરોપી જોધપુરના મંગરા પુંજલા વિસ્તારમાં હોવાની પુષ્ટિ થતાં પાદરા પોલીસની એક ખાસ ટીમ રાજસ્થાન રવાના થઈ હતી. જોકે ત્યાં પહોંચ્યા બાદ પોલીસ સામે સૌથી મોટો પડકાર આરોપીના ચોક્કસ મકાન સુધી પહોંચવાનો હતો.
'વસ્તી ગણતરી'ના બહાને આરોપીના ઘર સુધી પહોંચ્યા
જોધપુરના મંગરા પુંજલા વિસ્તારમાં એકસરખા દેખાતા અનેક મકાનો હોવાના કારણે આરોપીને ઓળખવો સરળ નહોતો. બીજી તરફ જો પોલીસ સીધી કાર્યવાહી કરે તો આરોપી ભાગી જવાની શક્યતા હતી. આ સ્થિતિમાં પોલીસે એક અનોખી યોજના તૈયાર કરી હતી. પોલીસ કર્મચારીઓએ વસ્તી ગણતરી માટે આવેલા સરકારી કર્મચારીઓનો વેશ ધારણ કર્યો હતો. આ સ્વરૂપમાં તેઓ વિસ્તારના ઘરોમાં જઈને માહિતી એકત્ર કરી રહ્યા હોય તેવો દેખાવ કર્યો હતો. આ દરમિયાન લગભગ 8થી 10 મકાનોની ચકાસણી કર્યા બાદ ટીમ આખરે આરોપીના ઘર સુધી પહોંચી હતી.
દરવાજો ખોલતાની સાથે જ પોલીસના હાથે ઝડપાયો
પોલીસે વસ્તી ગણતરીના બહાને આરોપીના ઘરના દરવાજા પર ટકોરા માર્યા હતા. કોઈ શંકા કર્યા વગર આરોપીએ દરવાજો ખોલ્યો હતો. બહાર આવતા જ પોલીસે તેની ઓળખની ખાતરી કરી હતી અને તરત જ તેને કસ્ટડીમાં લઈ લીધો હતો. બે વર્ષથી પોલીસને ચકમો આપતો આરોપી પાદરા પોલીસની આ સુનિયોજિત કામગીરી સામે નિષ્ફળ ગયો હતો. ધરપકડ બાદ આરોપીને કાયદાકીય કાર્યવાહી માટે ગુજરાત લાવવાની પ્રક્રિયા હાથ ધરવામાં આવી છે.
આ પણ વાંચો: વડોદરા નજીક NH-48 પર ગોઝારો અકસ્માત : શાકભાજીના વેપારીનું મોત; EV ટેમ્પોના બે ટુકડા થયા
પોલીસની સૂઝબૂઝની થઈ રહી છે પ્રશંસા
આ સમગ્ર ઓપરેશન બાદ પાદરા પોલીસની કાર્યશૈલી અને સૂઝબૂઝની પ્રશંસા થઈ રહી છે. ટેકનોલોજી અને માનવ બાતમીદારોના સંયોજન સાથે અપનાવવામાં આવેલી આ રણનીતિએ બતાવ્યું છે કે ગુનેગારો કેટલાય સમય સુધી કાયદાથી બચવાનો પ્રયાસ કરે, પરંતુ કાયદાની પહોંચથી દૂર રહી શકતા નથી. પોલીસ અધિકારીઓનું માનવું છે કે, આધુનિક ટેકનિકલ સાધનો અને બુદ્ધિપૂર્વકની કામગીરીના કારણે હવે ફરાર આરોપીઓને શોધવા અને પકડવામાં વધુ સફળતા મળી રહી છે.
