વડોદરા મહાનગરપાલિકાનું વર્ષ 2026-27 માટેનું ડ્રાફ્ટ તથા રિવાઇઝ્ડ બજેટ આજે સ્થાયી સમિતિ સમક્ષ રજૂ કરવામાં આવ્યું છે. મ્યુનિસિપલ કમિશનર અરુણ મહેશ બાબુએ સ્થાયી સમિતિ સમક્ષ કુલ રૂપિયા 7,609.63 કરોડનું ડ્રાફ્ટ બજેટ રજૂ કર્યું છે. આ બજેટમાં શહેરના સર્વાંગી વિકાસને ધ્યાનમાં રાખીને રોડ-રસ્તા, પાણી પુરવઠો, ગટર વ્યવસ્થા, ડ્રેનેજ સિસ્ટમ, સ્ટ્રીટ લાઇટ તથા બ્રિજ જેવા મહત્વના ઇન્ફ્રાસ્ટ્રક્ચર પ્રોજેક્ટ્સ માટે વિશેષ જોગવાઈ કરવામાં આવી છે.
VMC નું ₹7,609.63 કરોડનું ડ્રાફ્ટ બજેટ રજૂ
આ બજેટ આગામી મ્યુનિસિપલ કોર્પોરેશનની ચૂંટણીને ધ્યાનમાં રાખીને તૈયાર કરવામાં આવ્યું હોવાનું સ્પષ્ટ થાય છે. ખાસ કરીને નાગરિકો પર વધારાનો આર્થિક બોજ ન પડે તે માટે બજેટમાં કરદરમાં કોઈ વધારો કરવામાં આવ્યો નથી. કરવેરો યથાવત રાખીને વિકાસકાર્યોને વેગ આપવાનો પ્રયાસ કરવામાં આવ્યો છે, જેથી શહેરના મધ્યમ અને સામાન્ય વર્ગને રાહત મળી રહે. મ્યુનિસિપલ કમિશનર અરુણ મહેશ બાબુએ ડ્રાફ્ટ બજેટ રજૂ કર્યા બાદ સ્થાયી સમિતિમાં આ બજેટ પર વિસ્તૃત ચર્ચા શરૂ કરવામાં આવી છે. ચર્ચા પૂર્ણ થયા બાદ આ બજેટને વડોદરા મહાનગરપાલિકાની સામાન્ય સભામાં મંજૂરી માટે રજૂ કરવામાં આવશે. સ્થાયી સમિતિના ચેરમેન ડૉ. શીતલ મિસ્ત્રી, સમિતિના સભ્યો, ચીફ એકાઉન્ટન્ટ સહિતના અધિકારીઓની હાજરીમાં આ બેઠક યોજાઈ હતી.
'આ વખતના બજેટમાં નોંધપાત્ર વધારો'
બજેટ રજૂઆત બાદ સ્થાયી સમિતિના ચેરમેન, મ્યુનિસિપલ કમિશનર અને વરિષ્ઠ અધિકારીઓ દ્વારા મીડિયા સમક્ષ વિગતવાર માહિતી આપવામાં આવશે. ગત વર્ષના અંદાજપત્રની સરખામણીએ આ વખતના બજેટમાં નોંધપાત્ર વધારો કરવામાં આવ્યો છે, જે શહેરના વિકાસ માટે મહત્વપૂર્ણ માનવામાં આવે છે. રોડ અને બ્રિજ જેવા ટ્રાફિક સુવિધાના કામો, પાણી પુરવઠાની મજબૂત વ્યવસ્થા, ગટર અને ડ્રેનેજ સિસ્ટમના સુધારણા સહિતના મુદ્દાઓ પર ખાસ ભાર મૂકવામાં આવ્યો છે. આ બજેટ વડોદરાના વિકાસ માટે માર્ગદર્શક સાબિત થશે તેમજ આવનારી ચૂંટણી પૂર્વે મહાનગરપાલિકાની વિકાસલક્ષી દિશા દર્શાવે છે.
