Vadodara Municipal Budget: વડોદરા મહાનગરપાલિકા દ્વારા વર્ષ ૨૦૨૬-૨૭ના આગામી નાણાકીય વર્ષ માટેના બજેટની તૈયારીઓ અંતિમ તબક્કામાં પહોંચી ગઈ છે. પાલિકા આ વખતે એક નવા અને નવતર અભિગમ સાથે ‘પાર્ટિસિપેટરી બજેટ’ રજૂ કરવા જઈ રહી છે, જેમાં નાગરિકો, એનજીઓ અને લોકપ્રતિનિધિઓના સૂચનોને વિશેષ મહત્વ આપવામાં આવ્યું છે.
આવતીકાલે કમિશનર બજેટ રજૂ કરશે
મ્યુનિસિપલ કમિશનર શ્રી અરુણ મહેશ બાબુ આવતીકાલે તા. ૩ ફેબ્રુઆરીએ સ્ટેન્ડિંગ કમિટી સમક્ષ વર્ષ ૨૦૨૫-૨૬નું રિવાઈઝ બજેટ તથા વર્ષ ૨૦૨૬-૨૭નું ડ્રાફ્ટ બજેટ રજૂ કરશે. આ બજેટને વડોદરાના વિકાસની દિશામાં મહત્વપૂર્ણ પગલું માનવામાં આવી રહ્યું છે.
‘પાર્ટિસિપેટરી બજેટ’થી નાગરિકોને અવાજ
આ બજેટની સૌથી મહત્વપૂર્ણ વિશેષતા એ છે કે તે ‘જનભાગીદારી’ પર આધારિત છે. વડોદરા મહાનગરપાલિકાએ ઓનલાઈન માધ્યમ દ્વારા શહેરના જાગૃત નાગરિકો, રહેણાંક સોસાયટીઓ, વેપારી સંગઠનો તેમજ વિવિધ એનજીઓ પાસેથી વિકાસ સંબંધિત સૂચનો આમંત્રિત કર્યા હતા. મળેલા સૂચનોનું વર્ગીકરણ કરીને શહેર માટે તાત્કાલિક અને આવશ્યક કામોને બજેટમાં સ્થાન આપવામાં આવશે.
સ્ટેન્ડિંગ કમિટીના ચેરમેનનો અભિપ્રાય
સ્ટેન્ડિંગ કમિટીના ચેરમેન ડૉ. શીતલ મિસ્ત્રીએ જણાવ્યું હતું કે, વડોદરાના સર્વાંગી વિકાસ માટે આ વખતે લોકોના મંતવ્યોને પાયામાં રાખવામાં આવ્યા છે. નાગરિકોની વાસ્તવિક જરૂરિયાતોને ધ્યાનમાં રાખીને વિકાસની દિશા નક્કી કરાશે, જેથી શહેરનો સંતુલિત અને દીર્ઘકાળિન વિકાસ શક્ય બને.
લોકપ્રતિનિધિઓની બેઠકમાં મહત્વના મુદ્દાઓ
મેયર પિન્કીબેન સોનીના અધ્યક્ષસ્થાને તાજેતરમાં યોજાયેલી મહત્વપૂર્ણ બેઠકમાં વડોદરાના સાંસદ તથા તમામ ધારાસભ્યો હાજર રહ્યા હતા. બેઠક દરમિયાન લોકપ્રતિનિધિઓએ પોતાના વિસ્તારોની સમસ્યાઓ અને આવશ્યકતાઓ રજૂ કરી હતી. જેમાં ખાસ કરીને રોડ-રસ્તા, ડ્રેનેજ લાઈનો, ટ્રાફિક મેનેજમેન્ટ, શાક માર્કેટ, જાહેર લાઈબ્રેરી અને સ્પોર્ટ્સ કોમ્પ્લેક્સ જેવા મુદ્દાઓ પર ભાર મૂકવામાં આવ્યો હતો.
‘ગ્રીન સિટી’ અને ‘સ્માર્ટ સિટી’ને વધુ વેગ
આગામી બજેટમાં બાગ-બગીચા, યોગા સેન્ટર, સિનિયર સિટિઝન પાર્ક સહિત પર્યાવરણલક્ષી વિકાસને પ્રોત્સાહન આપતા ‘ગ્રીન સિટી’ અને ‘સ્માર્ટ સિટી’ના પ્રોજેક્ટ્સને વધુ વેગ મળે તેવી શક્યતા વ્યક્ત કરવામાં આવી રહી છે. નાગરિકોની પાયાની સુવિધાઓમાં વધારો કરીને તેમની જીવનગુણવત્તા સુધારવાનો અને સંતોષના સ્તરને ઊંચું લઈ જવાનો પાલિકા તંત્રનો મુખ્ય હેતુ હોવાનું સ્પષ્ટ થાય છે.
