Vadodara News :વડોદરા જિલ્લાના રતનપુરના કુખ્યાત બુટલેગર રાકેશ ઉર્ફે લાલા જયસ્વાલ સામે હવે વડોદરા જિલ્લા પોલીસે કડક કાર્યવાહી શરૂ કરી છે. દારૂના ગેરકાયદેસર ધંધા દ્વારા કરોડોની સંપત્તિ ઉભી કરનાર લાલા જયસ્વાલની અંદાજે ₹75 કરોડથી વધુની મિલકતો જપ્ત કરવાની પ્રક્રિયા તેજ કરવામાં આવી છે. આ માટે જિલ્લા પોલીસે રાજ્ય સરકારના ગૃહ વિભાગ પાસે જરૂરી મંજૂરી પણ માંગી છે.
પોલીસના જણાવ્યા અનુસાર, લાલા જયસ્વાલે વર્ષો સુધી ગેરકાયદેસર દારૂના કારોબારથી વિશાળ આર્થિક સામ્રાજ્ય ઊભું કર્યું હતું. હવે તેની કથિત કાળી કમાણીથી ખરીદવામાં આવેલી મિલકતોને કાયદાકીય પ્રક્રિયા હેઠળ ટાંચમાં લેવા માટે કાર્યવાહી હાથ ધરવામાં આવી રહી છે.
13 મિલકતોમાં ખેતર, મકાન, દુકાનો અને પેટ્રોલ પંપનો સમાવેશ
પોલીસ તપાસમાં સામે આવેલી વિગતો મુજબ, લાલા જયસ્વાલે કથિત રીતે દારૂના ધંધામાંથી કમાયેલી રકમથી અંદાજે 13 જેટલી મિલકતો ખરીદી હતી. તેમાં ખેતીની જમીન, રહેણાંક મકાનો, કોમર્શિયલ દુકાનો તેમજ પેટ્રોલ પંપનો સમાવેશ થાય છે. પોલીસે જણાવ્યું છે કે કેલનપુર ખાતે આવેલી 'સચિન પેટ્રોલિયમ' નામની નાયરા પેટ્રોલ પંપ, રતનપુરની અક્ષર સિટીમાં આવેલું મકાન, અક્ષર કોમ્પ્લેક્સમાં આવેલી દુકાનો તેમજ રતનપુર ચોકડી, અભરમપુરા અને અલ્હાદપુરા ગામોમાં આવેલી અનેક જમીનો પણ તપાસના દાયરામાં છે.
કાળી કમાણીને સફેદ કરવા અનેક નાણાકીય વ્યવહારોની તપાસ
તપાસ એજન્સીઓના જણાવ્યા મુજબ, ગેરકાયદેસર રીતે મેળવેલી આવકને કાયદેસર દર્શાવવા માટે વિવિધ આર્થિક વ્યવહારો કરવામાં આવ્યા હોવાની પણ તપાસ ચાલી રહી છે. પોલીસને મળેલા પુરાવાના આધારે લાલા જયસ્વાલ અને તેના પરિવાર સાથે જોડાયેલા નાણાકીય વ્યવહારોની પણ તપાસ કરવામાં આવી રહી છે. આ ઉપરાંત, યુનિયન બેંકમાં પરિવારના સભ્યોના નામે રહેલા કરોડો રૂપિયાના સોનાની પણ જપ્તી કરવામાં આવી હોવાનું પોલીસ સૂત્રોએ જણાવ્યું છે. આ સમગ્ર સંપત્તિની ખરીદીમાં વપરાયેલા નાણાંના સ્ત્રોત અંગે પણ તપાસ ચાલી રહી છે.
ગંભીર ગુનાઓમાં નોંધાયેલા કેસ, ગુજસીટોક હેઠળ જેલમાં બંધ
લાલા જયસ્વાલ સામે દારૂના ગુનાઓ ઉપરાંત પોલીસ પર હુમલો, હત્યાના પ્રયાસ સહિતના ગંભીર ગુનાઓ પણ નોંધાયેલા હોવાનું પોલીસનું કહેવું છે. હાલ લાલા જયસ્વાલ સહિત ચાર આરોપીઓ ગુજરાત કંટ્રોલ ઑફ ટેરરિઝમ એન્ડ ઑર્ગેનાઇઝ્ડ ક્રાઇમ (GUJSITOC) કાયદા હેઠળ જેલમાં બંધ છે. જિલ્લા પોલીસ વડા સુશીલ અગ્રવાલે જણાવ્યું કે ગુનાખોરી દ્વારા એકત્રિત કરવામાં આવેલી મિલકતો સામે કાયદેસરની કાર્યવાહી કરવામાં આવી રહી છે. ગૃહ વિભાગની મંજૂરી મળ્યા બાદ સંપત્તિ જપ્ત કરવાની પ્રક્રિયા આગળ વધારવામાં આવશે. પોલીસનું માનવું છે કે સંગઠિત ગુનાખોરી સામે અસરકારક કાર્યવાહી માટે ગુનાખોરીમાંથી ઉભી થયેલી આર્થિક સંપત્તિ પર પ્રહાર કરવો જરૂરી છે.
ગુનાખોરીની આર્થિક કમર તોડવા પોલીસનો પ્રયાસ
પોલીસ અધિકારીઓના જણાવ્યા અનુસાર, સંગઠિત ગુનાખોરી સામે માત્ર આરોપીઓની ધરપકડ પૂરતી નથી, પરંતુ ગુનાખોરીમાંથી ઉભી કરવામાં આવેલી આર્થિક સંપત્તિ પર પણ કાયદેસર કાર્યવાહી કરવી જરૂરી બને છે. આ જ દિશામાં લાલા જયસ્વાલની કથિત ગેરકાયદેસર આવકથી વસાવાયેલી મિલકતોની વિગતો એકત્ર કરીને તેને જપ્ત કરવાની પ્રક્રિયા આગળ વધારવામાં આવી રહી છે. ગૃહ વિભાગની મંજૂરી મળ્યા બાદ આગામી કાયદાકીય કાર્યવાહી હાથ ધરવામાં આવશે.
આ પણ વાંચો: 'વળતર નહીં તો ટાવર નહીં'; સુરતમાં ખેડૂતોનો સરકાર સામે મોરચો : પાવરગ્રીડ પરિપત્રની હોળી કરી ઉગ્ર વિરોધ નોંધાવ્યો
નાણાકીય નેટવર્કની પણ તપાસ ચાલુ
પોલીસ તપાસ દરમિયાન લાલા જયસ્વાલ અને તેની સાથે સંકળાયેલા વ્યક્તિઓના બેંકિંગ વ્યવહારો, સંપત્તિના દસ્તાવેજો તેમજ નાણાકીય લેવડદેવડની પણ ઊંડાણપૂર્વક તપાસ કરવામાં આવી રહી છે. તપાસ એ દિશામાં પણ આગળ વધી રહી છે કે ગેરકાયદેસર કમાણી અન્ય વ્યક્તિઓ અથવા પરિવારના સભ્યોના નામે રોકાણ કરીને છુપાવવાનો પ્રયાસ થયો હતો કે નહીં. પોલીસનું કહેવું છે કે તપાસમાં જે નવા પુરાવા સામે આવશે તેના આધારે આગળની કાયદેસરની કાર્યવાહી કરવામાં આવશે.
