Vadodara News: વડોદરા શહેરને ટૂંક સમયમાં વધુ એક વિશ્વસ્તરીય પ્રવાસન આકર્ષણ મળવા જઈ રહ્યું છે. વડોદરા મહાનગરપાલિકા દ્વારા શહેરના આજવા વિસ્તારમાં અંદાજે 150 એકર જમીન પર ભવ્ય વાઇલ્ડલાઇફ સફારી પાર્ક વિકસાવવાની યોજના હવે સાકાર થવા તરફ આગળ વધી રહી છે. લાંબા સમયથી તકનીકી કારણોસર અટવાયેલા આ મહત્ત્વાકાંક્ષી પ્રોજેક્ટને હવે સેન્ટ્રલ ઝૂ ઓથોરિટી (CZA) તરફથી જરૂરી મંજૂરી મળી ગઈ છે. આગામી દોઢથી બે વર્ષમાં પ્રથમ તબક્કાનું કામ પૂર્ણ કરવાનો લક્ષ્યાંક નક્કી કરવામાં આવ્યો છે.
આ પ્રોજેક્ટ માત્ર એક સફારી પાર્ક પૂરતો મર્યાદિત નહીં રહે, પરંતુ વડોદરાને દેશના અગ્રણી ઇકો-ટૂરિઝમ કેન્દ્રોમાં સ્થાન અપાવવાની દિશામાં મહત્વપૂર્ણ પગલું સાબિત થશે. સાથે જ સ્ટેચ્યુ ઓફ યુનિટી, ચાંપાનેર-પાવાગઢ અને વડોદરાને જોડતા પ્રવાસન સર્કિટને પણ આ પ્રોજેક્ટથી નવી ઓળખ મળશે.
સયાજીબાગ ઝૂના વિસ્તરણ તરીકે થશે વિકાસ
વડોદરાના ઐતિહાસિક સયાજીબાગ ઝૂમાં વર્ષોથી મોટી સંખ્યામાં પ્રવાસીઓ આવે છે, પરંતુ શહેરના મધ્યમાં આવેલી આ જગ્યા હવે વિસ્તરણ માટે મર્યાદિત બની ગઈ છે. હાથી, જિરાફ, ઝીબ્રા અને અન્ય મોટા પ્રાણીઓ માટે જરૂરી વિશાળ આવાસ ઉપલબ્ધ ન હોવાથી નવા વિકલ્પની જરૂરિયાત ઉભી થઈ હતી. આજવા ખાતે બનનારા સફારી પાર્કને સયાજીબાગ ઝૂની સેટેલાઇટ એક્સચેન્જ ફેસિલિટી તરીકે વિકસાવવામાં આવશે. વડોદરા શહેરથી અંદાજે 20 કિલોમીટર દૂર આવેલો આ વિસ્તાર વિશાળ જમીન ધરાવતો હોવાથી અહીં આધુનિક ધોરણો અનુસાર પ્રાણીઓ માટે કુદરતી માહોલ ઊભો કરી શકાશે.
આ પણ વાંચો: અમરેલીના ધારીના ફતેગઢ ગામમાં 7 સિંહો ઘૂસ્યા : શિકાર કરી કલાકો સુધી મિજબાની માણતા ભયનો માહોલ
'વર્લ્ડ ટ્રોપિકલ ઝૂ'ની થીમ પર તૈયાર થશે પાર્ક
ઝૂ ક્યુરેટર પ્રત્યુષ પાટણવાડિયાના જણાવ્યા મુજબ સમગ્ર સફારી પાર્કનું નિર્માણ 'વર્લ્ડ ટ્રોપિકલ ઝૂ'ની થીમ પર કરવામાં આવશે. કેવડિયા વિસ્તારની જેમ અહીં કુદરતી પહાડો નથી, તેથી કૃત્રિમ રીતે ટેકરીઓ, જંગલ જેવા વિસ્તારો, કુદરતી પાણીના સ્ત્રોત અને પ્રાણીઓ માટે અનુકૂળ આવાસ તૈયાર કરવામાં આવશે. આ પાર્કને ચાર આંતરરાષ્ટ્રીય ઝોનમાં વહેંચવાની યોજના છે. તેમાં દક્ષિણ એશિયા, આફ્રિકા, ઓસ્ટ્રેલિયા અને દક્ષિણ અમેરિકાના પ્રાણીઓ માટે અલગ-અલગ આવાસ તૈયાર કરવામાં આવશે. આથી મુલાકાતીઓને એક જ સ્થળે વિશ્વના વિવિધ ખંડોના વન્યજીવોને નજીકથી જોવાનો અનોખો અનુભવ મળશે.
અનેક દુર્લભ પ્રાણીઓ બનશે મુખ્ય આકર્ષણ
સફારી પાર્કમાં ગુજરાતની ઓળખ એવા એશિયાટિક સિંહ ઉપરાંત રોયલ બેંગોલ ટાઇગર, દીપડા, રીંછ, વિવિધ જાતના હરણ, હાથી, ઝીબ્રા સહિત અનેક પ્રાણીઓને રાખવાની યોજના છે. મુલાકાતીઓ સુરક્ષિત સફારી વાહનોમાં બેસીને ખુલ્લા વિસ્તારમાં ફરતા હિંસક પ્રાણીઓને નજીકથી નિહાળી શકશે. આ ઉપરાંત એક વિશાળ આધુનિક એવિયરી (પક્ષીઘર) પણ તૈયાર કરવામાં આવશે, જ્યાં દેશ-વિદેશના અનેક રંગબેરંગી પક્ષીઓને કુદરતી વાતાવરણમાં જોઈ શકાશે.
આધુનિક સુવિધાઓથી સજ્જ રહેશે પાર્ક
સફારી પાર્કને સંપૂર્ણ ઇકો-ફ્રેન્ડલી બનાવવા માટે ખાસ આયોજન કરવામાં આવ્યું છે. સમગ્ર પાર્કમાં બેટરી સંચાલિત ગોલ્ફ કાર્ટ, વિશાળ વોકિંગ ટ્રેક, સેલ્ફી પોઇન્ટ, માહિતી કેન્દ્ર, મુલાકાતીઓ માટે આરામદાયક સુવિધાઓ, પાર્કિંગ, ફૂડ કોર્ટ અને ગ્રીન ઝોન વિકસાવવામાં આવશે. પર્યાવરણનું સંતુલન જળવાઈ રહે તે માટે વરસાદી પાણીના સંગ્રહ, સોલાર એનર્જી અને હરિયાળી વધારવા જેવા પાસાઓને પણ પ્રોજેક્ટમાં સ્થાન આપવામાં આવ્યું છે.
4,500 લોકોને મળશે રોજગારી
આ પ્રોજેક્ટ માત્ર પ્રવાસન પૂરતો મર્યાદિત નહીં રહે પરંતુ સ્થાનિક અર્થતંત્રને પણ મોટો વેગ આપશે. રાજ્ય સરકારે આ યોજનાને 'બેસ્ટ રેવન્યુ જનરેટેડ પ્રોજેક્ટ' તરીકે ગણાવી તેનો ડીપીઆર મંજૂર કર્યો છે. વડોદરા મહાનગરપાલિકા દ્વારા પ્રારંભિક તબક્કે રૂ. 10 કરોડની ફાળવણી કરવામાં આવી છે. પ્રોજેક્ટ સંપૂર્ણ રીતે કાર્યરત થયા બાદ દર વર્ષે રૂ. 85થી 100 કરોડની સીધી આવક થવાની સંભાવના છે. જ્યારે હોટેલ, ટ્રાન્સપોર્ટ, વેપાર અને અન્ય સંલગ્ન પ્રવૃત્તિઓને મળીને કુલ રૂ. 136થી 250 કરોડ સુધીનો આર્થિક પ્રભાવ સર્જાઈ શકે છે. સાથે જ આ પ્રોજેક્ટથી અંદાજે 3,375થી 4,500 લોકોને રોજગારી મળશે, જેમાં 900થી 1,200 જેટલી સીધી નોકરીઓનો સમાવેશ થાય છે.
આ પણ વાંચો: ગીર સોમનાથના ઉનામાં પ્રાથમિક શાળાના શિક્ષક સામે ગંભીર આક્ષેપ : વિદ્યાર્થીઓ પાસે દારૂ મંગાવ્યાની લેખિત ફરિયાદ
વડોદરા બનશે મોટું ટૂરિઝમ હબ
આજવા વિસ્તારમાં પહેલેથી જ અતાપી વન્ડરલેન્ડ જેવા લોકપ્રિય પ્રવાસન સ્થળો કાર્યરત છે. હવે વાઇલ્ડલાઇફ સફારી પાર્ક શરૂ થતાં સમગ્ર વિસ્તાર પશ્ચિમ ભારતના મહત્વના ટૂરિઝમ હબ તરીકે વિકસે તેવી શક્યતા છે. સ્ટેચ્યુ ઓફ યુનિટી અને ચાંપાનેર-પાવાગઢની મુલાકાતે આવતા પ્રવાસીઓ હવે વડોદરામાં એકથી વધુ દિવસ રોકાઈ શકશે. જેના કારણે શહેરમાં હોટેલ, રિસોર્ટ, રેસ્ટોરન્ટ, ટ્રાવેલ સર્વિસ અને અન્ય હોસ્પિટાલિટી વ્યવસાયમાં મોટા પ્રમાણમાં રોકાણ વધવાની સંભાવના વ્યક્ત કરવામાં આવી રહી છે.
3 તબક્કામાં પૂર્ણ થશે પ્રોજેક્ટ
વડોદરા મહાનગરપાલિકા દ્વારા આ મહત્ત્વાકાંક્ષી સફારી પાર્કને ત્રણ તબક્કામાં વિકસાવવાની યોજના બનાવવામાં આવી છે. પ્રથમ તબક્કામાં મૂળભૂત ઇન્ફ્રાસ્ટ્રક્ચર, પ્રાણીઓના આવાસ અને મુલાકાતી સુવિધાઓ તૈયાર કરવામાં આવશે. ત્યારબાદ બીજા અને ત્રીજા તબક્કામાં નવા ઝોન, વધારાના પ્રાણીઓ અને આધુનિક પ્રવાસન સુવિધાઓ ઉમેરવામાં આવશે. પ્રોજેક્ટ પૂર્ણ થયા બાદ આજવા સફારી પાર્ક માત્ર ગુજરાત જ નહીં પરંતુ દેશના અગ્રણી વાઇલ્ડલાઇફ અને ઇકો-ટૂરિઝમ ડેસ્ટિનેશનમાં સ્થાન મેળવે તેવી આશા વ્યક્ત કરવામાં આવી રહી છે.
