Donald Trump ની ભારતને વધુ એક ધમકી : રશિયા પાસેથી તેલ ખરીદવા બાબતે ટેરિફમાં હજુ વધારો કરવાનું કહ્યું

અમેરિકાના રાષ્ટ્રપતિ Donald Trump એ સોમવારે કહ્યું કે તેઓ રશિયન તેલ ખરીદવા અને ખુલ્લા બજારમાં વેચીને "મોટો નફો" કમાવવા બદલ ભારત પર ટેરિફમાં ભારે વધારો કરશે. ટ્રમ્પે આરોપ લગાવ્યો હતો કે ભારતને કોઈ પરવા નથી કે રશિયન યુદ્ધ મશીન યુક્રેનમાં કેટલા લોકોને મારી રહ્યું છે.

ટ્રમ્પે સોશિયલ મીડિયા પ્લેટફોર્મ ટ્રુથ સોશિયલ પર લખ્યું હતું કે, ભારત માત્ર રશિયન તેલનો મોટો જથ્થો ખરીદી રહ્યું નથી, પરંતુ તે ખરીદેલા તેલનો મોટો ભાગ ખુલ્લા બજારમાં પણ મોટા નફા સાથે વેચી રહ્યું છે. તેમને કોઈ પરવા નથી કે રશિયન યુદ્ધ મશીનો યુક્રેનમાં કેટલા લોકોને મારી રહ્યા છે. એટલા માટે હું ભારત દ્વારા અમેરિકાને ચૂકવવામાં આવતા ટેરિફમાં નોંધપાત્ર વધારો કરવા જઈ રહ્યો છું. આ મુદ્દા પર ધ્યાન આપવા બદલ આભાર!

અમેરિકન રાષ્ટ્રપતિના સલાહકારે પણ ભારત સામે આરોપો લગાવ્યા હતા

આજે અગાઉ, યુએસ રાષ્ટ્રપતિના સલાહકાર સ્ટીફન મિલરે ભારત સામે ગંભીર આરોપો લગાવ્યા છે. તેમણે કહ્યું હતું કે ભારત અમેરિકા સાથે પ્રામાણિકપણે વર્તન કરી રહ્યું નથી. મિલરે કહ્યું હતું કે ભારત પોતાને આપણો નજીકનો દેશ કહે છે, પરંતુ આ હોવા છતાં તે આપણા માલને મંજૂરી આપતું નથી અને અમેરિકન માલ પર ભારે ટેરિફ લાદે છે. આ ઉપરાંત, સ્ટીફન મિલરે કહ્યું કે, ભારત અમેરિકાની ઇમિગ્રેશન નીતિનો ખોટો લાભ લે છે અને હવે રશિયા પાસેથી તેલ ખરીદીને યુક્રેન યુદ્ધને પરોક્ષ રીતે ભંડોળ પૂરું પાડી રહ્યું છે.