US Canada Trade War: અમેરિકા અને કેનેડા વચ્ચે લાંબા સમયથી ચાલી રહેલા વેપારી મતભેદ હવે વધુ ઉગ્ર બન્યા છે. અમેરિકાના રાષ્ટ્રપતિ ડોનાલ્ડ ટ્રમ્પે કેનેડાની અનેક આયાતી ચીજવસ્તુઓ પર વધારાનો 50 ટકા ટેરિફ લગાવવાની જાહેરાત કરી છે. ટ્રમ્પ પ્રશાસનનો દાવો છે કે કેનેડાએ અમેરિકન કાર, ડેરી અને આલ્કોહોલિક ઉત્પાદનો સાથે ભેદભાવપૂર્ણ વેપાર નીતિ અપનાવી છે, જેના જવાબમાં આ પગલું ભરવામાં આવ્યું છે. આ નવા ટેરિફ 19 ઓગસ્ટથી અમલમાં આવશે અને તેની અસર અંદાજે 20 અબજ ડોલરના કેનેડિયન આયાતી માલ પર પડશે. ટ્રમ્પ સરકારના આ નિર્ણયથી ઉત્તર અમેરિકામાં ફરી ટ્રેડ વોર તેજ બનવાની આશંકા વ્યક્ત થઈ રહી છે. વેપાર નિષ્ણાતોનું માનવું છે કે વધારાના ટેરિફના કારણે બંને દેશો વચ્ચેના વેપાર સંબંધો પર અસર પડશે, જ્યારે અનેક ઉત્પાદનોની કિંમતોમાં વધારો થવાની પણ શક્યતા છે. બીજી તરફ કેનેડાએ પણ આ નિર્ણયનો વિરોધ નોંધાવ્યો છે અને દ્વિપક્ષીય ચર્ચા દ્વારા ઉકેલ લાવવાની તૈયારી દર્શાવી છે.
શા માટે લગાવ્યો 50 ટકા ટેરિફ?
વ્હાઇટ હાઉસના જણાવ્યા અનુસાર, કેનેડાએ અમેરિકન કાર, ડેરી ઉત્પાદનો અને આલ્કોહોલિક પીણાં સામે એવા નિયમો લાગુ કર્યા છે, જેને અમેરિકા ભેદભાવપૂર્ણ માને છે. ટ્રમ્પ પ્રશાસનનું કહેવું છે કે આ નીતિઓના કારણે અમેરિકન ઉત્પાદકો અને ખેડૂતોને નુકસાન થઈ રહ્યું છે. તેથી 1930ના ટેરિફ એક્ટની કલમ 338 હેઠળ વધારાનો 50 ટકા ટેરિફ લગાવવાનો નિર્ણય લેવામાં આવ્યો છે. અમેરિકી ટ્રેડ પ્રતિનિધિ જેમિસન ગ્રીરે જણાવ્યું કે આ પગલું અમેરિકન ઉદ્યોગો, ખેડૂતો અને વેપારીઓને સમાન તક આપવા માટે લેવામાં આવ્યું છે. પ્રશાસનનું કહેવું છે કે કેનેડાએ અગાઉ અમેરિકાના કેટલાક ઉત્પાદનો સામે જવાબી વેપારી પગલાં પણ લીધા હતા.
કઈ વસ્તુઓ પર પડશે અસર?
નવી ટેરિફ વ્યવસ્થા હેઠળ કેનેડાથી અમેરિકા આવતી અનેક ચીજવસ્તુઓ પર 50 ટકા સુધીનો વધારાનો આયાત શુલ્ક લાગશે. તેમાં વાહનો સંબંધિત કેટલાક ઉત્પાદનો, ડેરી વસ્તુઓ, આલ્કોહોલિક પીણાં ઉપરાંત ફર્નિચર, કપડાં, સિમેન્ટ અને અન્ય ગ્રાહક તથા ઔદ્યોગિક ઉત્પાદનોનો સમાવેશ થાય છે. જોકે ઊર્જા ઉત્પાદનો, પોટાશ, મહત્વપૂર્ણ ખનિજો, માછલી અને અગાઉથી અન્ય ટેરિફ હેઠળ આવતાં કેટલાક ઉત્પાદનોને આ નિર્ણયમાંથી મુક્ત રાખવામાં આવ્યા છે. આ ક્ષેત્રોમાં વેપાર હાલની વ્યવસ્થા મુજબ ચાલુ રહેશે.
આ પણ વાંચો: અમેરિકી સૈનિકોના મોતથી ભડક્યા ટ્રમ્પ! : ઈરાનને આપી 'ભારે કિંમત' ચૂકવવાની કડક ચેતવણી! શું ફરી ભડકશે મહાયુદ્ધ?
પહેલેથી જ ચાલી રહ્યો છે વેપારી વિવાદ
અમેરિકા અગાઉથી જ કેનેડાના સ્ટીલ, એલ્યુમિનિયમ અને અન્ય કેટલાક ઉત્પાદનો પર અલગ-અલગ દરે ટેરિફ વસૂલી રહ્યું છે. તેના જવાબમાં કેનેડાએ પણ અમેરિકન સ્ટીલ, એલ્યુમિનિયમ અને વાહન ઉદ્યોગ સાથે જોડાયેલા કેટલાક ઉત્પાદનો પર જવાબી ટેરિફ લાગુ કર્યા હતા. છેલ્લા કેટલાક વર્ષોથી બંને દેશો વચ્ચે વેપારને લઈને મતભેદ સતત વધી રહ્યા છે. ટ્રમ્પનું માનવું છે કે, કેનેડા અમેરિકન ઉત્પાદનોને યોગ્ય બજાર પ્રવેશ આપતું નથી, જ્યારે કેનેડાનું કહેવું છે કે, તેણે માત્ર અમેરિકાના અગાઉના ટેરિફના જવાબમાં સમાન પગલાં લીધા છે.
કેનેડાનો જવાબ શું?
કેનેડાના વડાપ્રધાન માર્ક કાર્નીએ અમેરિકાના નિર્ણય પર નિરાશા વ્યક્ત કરતાં કહ્યું છે કે આ પગલું બંને દેશો વચ્ચેના વેપાર કરારની ભાવનાને નુકસાન પહોંચાડે છે. તેમણે ભારપૂર્વક જણાવ્યું કે કેનેડા હજુ પણ ચર્ચા દ્વારા ઉકેલ લાવવા માટે તૈયાર છે અને પોતાના ખેડૂતો, ઉદ્યોગો તથા વેપારીઓના હિતોની રક્ષા માટે જરૂરી તમામ પગલાં ભરશે. કેનેડાના કેટલાક પ્રાંતીય નેતાઓએ પણ સંકેત આપ્યો છે કે જો અમેરિકા પોતાના નિર્ણયમાં ફેરફાર નહીં કરે તો જવાબી પગલાં લેવામાં આવી શકે છે.
આ પણ વાંચો: મિડલ ઈસ્ટમાં યુદ્ધનો ખતરો વધ્યો : ભારતીય ફ્લાઇટ્સ બંધ કરવાની ઉઠી માંગ
વૈશ્વિક બજાર પર શું પડી શકે અસર?
વેપાર નિષ્ણાતોનું માનવું છે કે, અમેરિકા અને કેનેડા વચ્ચે વધતું ટેરિફ યુદ્ધ માત્ર બંને દેશો પૂરતું મર્યાદિત નહીં રહે. સપ્લાય ચેઇન પર તેની અસર પડી શકે છે, જેના કારણે અનેક ઉત્પાદનો મોંઘા બની શકે છે. ઉત્તર અમેરિકાની ઓટોમોબાઇલ, કૃષિ અને ઉત્પાદન ક્ષેત્ર સાથે જોડાયેલી કંપનીઓ પર પણ તેની સીધી અસર જોવા મળી શકે છે. હવે વિશ્વભરની નજર એ વાત પર છે કે બંને દેશો વચ્ચે ફરી વેપાર ચર્ચા શરૂ થાય છે કે પછી જવાબી ટેરિફના કારણે ટ્રેડ વોર વધુ ઉગ્ર બને છે.
