રાજ્યના વિવિધ વિસ્તારોમાં કમોસમી વરસાદ વરસ્યો છે. મહેસાણા, અમદાવાદ, ગાંધીનગર તેમજ ભરૂચ જિલ્લાના કેટલાક વિસ્તારોમાં વરસાદી માહોલ છવાયો છે. કાપણીની વેળાએ કાળા ડિબાંગ વાદળો સાથે માવઠાની એન્ટ્રી થતા ખેડૂતોમાં ચિંતા વધી ગઈ છે. રાજ્યભરમાં છેલ્લા કેટલાક દિવસોથી હવામાનમાં અચાનક ફેરફારો નોંધાઈ રહ્યા છે. શિયાળો હવે વિદાયની કગાર પર છે અને ઉનાળાની શરૂઆત સાથે તાપમાન ધીમે ધીમે વધી રહ્યું હતું.
વાદળછાયા વાતાવરણ વચ્ચે વરસાદ
ભરૂચ જિલ્લામાં ફરી વરસાદ પડતા વાતાવરણમાં અચાનક ઠંડક પ્રસરી ગઈ છે. ત્રણ દિવસ પહેલા પણ વાદળછાયા વાતાવરણ વચ્ચે વરસાદ નોંધાયો હતો અને આજે ફરી તેજ પવન સાથે ઝરમર વરસાદ વરસ્યો હતો. વહેલી સવારે અંકલેશ્વર અને જબુસર તાલુકાઓમાં અચાનક વરસાદ શરૂ થયો હતો. ઠંડા પવન સાથે વરસેલા આ માવઠાએ સામાન્ય જનજીવન પર અસર પાડી છે. રસ્તાઓ પર ભેજ અને ઓછી દૃશ્યતા સર્જાતા વાહનચાલકોને સાવચેતીપૂર્વક વાહન ચલાવવા પડ્યા હતા. કેટલીક જગ્યાએ દૃશ્યતા ઘટતા ટ્રાફિકની ગતિ ધીમી પડી હતી.
ખેડૂતો પર ચિંતાના વાદળ ઘેરાયા
માવઠાની આ પરિસ્થિતિ ખેડૂતો માટે ચિંતાજનક સાબિત થઈ રહી છે. હાલ અનેક વિસ્તારોમાં ઘઉં, કપાસ, તુવેર અને વિવિધ શાકભાજીનો પાક કાપણી માટે તૈયાર છે. આવા સમયે વરસાદ પડવાથી પાકને નુકસાન થવાની ભીતિ છે. ભીના વાતાવરણને કારણે દાણા કાળા પડવા, પાક પલળી જવા અથવા ગુણવત્તામાં ઘટાડો થવાની શક્યતા વ્યક્ત કરવામાં આવી રહી છે. ખેતી પર આધારિત પરિવારો માટે આ સ્થિતિ આર્થિક ફટકો સાબિત થઈ શકે છે.
બીજી તરફ મહેસાણા શહેરમાં પણ વાતાવરણમાં પલટો જોવા મળ્યો છે. શહેરમાં આકાશ વાદળછાયું બની ગયું છે. એક તરફ ગરમીનો અહેસાસ થઈ રહ્યો છે તો બીજી તરફ વાદળો છવાતા હવામાન બદલાયું હોય તેવી સ્થિતિ સર્જાઈ છે. આમ, અચાનક બદલાતા હવામાનને કારણે લોકો અને ખાસ કરીને ખેડૂતો માટે સાવચેતી રાખવી જરૂરી બની છે.
