ચીનની ધમકી પર ટ્રમ્પે લીધું મોટું પગલું : અમેરિકાએ 104% ટેરિફ લગાવવાની કરી જાહેરાત

ચીન અને અમેરિકા વચ્ચેનો વેપાર તણાવ ફરી એકવાર ચરમસીમાએ પહોંચી ગયો છે. અમેરિકી રાષ્ટ્રપતિ ડોનાલ્ડ ટ્રમ્પની ધમકીના બીજા જ દિવસે વ્હાઇટ હાઉસે ચીન પર 104% ઈમ્પોર્ટ ડ્યૂટી (ટેરિફ) લાદવાની જાહેરાત કરી છે. આ ટેરિફ 9 એપ્રિલથી લાગુ થશે. અમેરિકાના આ નિર્ણયને બંને દેશો વચ્ચે આર્થિક યુદ્ધની નવી શરૂઆત તરીકે જોવામાં આવી રહ્યું છે. ડોનાલ્ડ ટ્રમ્પે સોશિયલ મીડિયા પર એક પોસ્ટમાં કહ્યું હતું કે જો ચીન અમેરિકા પર લાદવામાં આવેલા 34% ટેરિફને પાછો નહીં ખેંચે તો અમેરિકા પણ તેના પર વધારાની 50% ટેરિફ લગાવશે. હવે વ્હાઇટ હાઉસે કુલ 104% ટેરિફની જાહેરાત કરીને આ ધમકીને અમલમાં મૂકી છે. વ્હાઇટ હાઉસનું કહેવું છે કે આ નિર્ણય 9 એપ્રિલથી અમલમાં આવશે.

ચીન સામે ટ્રમ્પની વળતી કાર્યવાહી
પોતાના નિવેદનમાં ટ્રમ્પે સ્પષ્ટપણે કહ્યું હતું કે જે પણ દેશ અમેરિકા સામે બદલો લેશે તેના પર તાત્કાલિક અસરથી નવા અને કડક ટેરિફ લગાવવામાં આવશે. તેમણે કહ્યું કે અમે પહેલાથી જ સ્પષ્ટ કરી દીધું છે કે અમે બિઝનેસમાં અન્યાયી વ્યવહારને સહન નહીં કરીએ. હવે સમય આવી ગયો છે કે ચીન પોતાની નીતિ પર પુનર્વિચાર કરે અને અમેરિકા સાથે યોગ્ય વર્તન કરે.

વેપાર યુદ્ધની મોટી અસર પડશે
ટ્રમ્પે એ પણ સ્પષ્ટતા કરી હતી કે હવે અમેરિકા અને ચીન વચ્ચે પ્રસ્તાવિત બેઠકો સ્થગિત કરી દેવામાં આવી છે. અમેરિકા તે દેશો સાથે પણ વાટાઘાટોની પ્રક્રિયા શરૂ કરશે જેમણે પહેલાથી જ વેપાર વાટાઘાટો માટે વિનંતી કરી છે. વિશ્લેષકો માને છે કે આ નિર્ણય વૈશ્વિક વ્યાપારને અસર કરી શકે છે અને ચીન સાથેના અમેરિકાના સંબંધો વધુ વણસશે.

ચીન તરફથી કોઈ પ્રતિક્રિયા આપવામાં આવી નથી
ચીન તરફથી અત્યાર સુધી આ નિર્ણય પર કોઈ સત્તાવાર પ્રતિક્રિયા આવી નથી. પરંતુ માનવામાં આવે છે કે બેઈજિંગ ટૂંક સમયમાં જ તેનો જવાબ આપશે. નિષ્ણાતોનું માનવું છે કે ચીન પણ આ ટેરિફના જવાબમાં કડક પગલાં લઈ શકે છે, જે વિશ્વની બે સૌથી મોટી અર્થવ્યવસ્થાઓ વચ્ચેના વેપાર યુદ્ધને વધુ ઘેરી બનાવી શકે છે. હવે તમામની નજર ચીનના આગામી પગલા પર ટકેલી છે.