Trump Signature: અમેરિકાના નાણાકીય ઈતિહાસમાં એક અત્યંત અભૂતપૂર્વ અને ઐતિહાસિક ફેરફાર થવા જઈ રહ્યો છે. યુનાઇટેડ સ્ટેટ્સની આઝાદીના 250મા વર્ષની ઉજવણીના ભાગરૂપે હવે અમેરિકી ડોલરની નોટો પર રાષ્ટ્રપતિ ડોનાલ્ડ ટ્રમ્પના હસ્તાક્ષર (Signature) જોવા મળશે. અમેરિકાના 165 વર્ષના ઈતિહાસમાં આ પ્રથમ વખત બનશે જ્યારે કોઈ કાર્યકારી રાષ્ટ્રપતિનું નામ અને સહી દેશના ચલણ પર અંકિત કરવામાં આવશે. વર્ષ 1861માં ડોલરની નોટોના પ્રચલન બાદ અત્યાર સુધીની પરંપરા મુજબ માત્ર ટ્રેઝરરની સહી રહેતી હતી, પરંતુ હવે ટ્રમ્પ આ પરંપરા તોડીને નવો કીર્તિમાન સ્થાપિત કરવા જઈ રહ્યા છે.
આઝાદીના 250મા વર્ષે ટ્રમ્પની 'ડોલર ડિપ્લોમસી'
અમેરિકી ટ્રેઝરર બ્રાન્ડન બીચે સોશિયલ મીડિયા પ્લેટફોર્મ X પર આ માહિતી શેર કરતા જણાવ્યું હતું કે, અમેરિકાની સ્વતંત્રતાની 250મી વર્ષગાંઠ નિમિત્તે આ ખાસ ફેરફાર કરવામાં આવ્યો છે. ટૂંક સમયમાં જ ડોલરની નોટો પર રાષ્ટ્રપતિ ડોનાલ્ડ ટ્રમ્પની સાથે નાણા મંત્રી સ્કોટ બેસેન્ટની સહીઓ પણ જોવા મળશે. આ નિર્ણયને ટ્રમ્પના નેતૃત્વ અને દેશ પ્રત્યેના તેમના સમર્પણના પ્રતીક તરીકે જોવામાં આવી રહ્યો છે. આ પગલું અમેરિકાના આર્થિક પુનરુત્થાનના 'ગોલ્ડન એજ'ની યાદ અપાવશે.
1861થી ચાલી આવતી પરંપરાનો અંત
અમેરિકામાં ચલણી નોટો પર હસ્તાક્ષર કરવાની પ્રક્રિયા 1861થી શરૂ થઈ હતી. છેલ્લા 165 વર્ષોથી પરંપરા રહી છે કે ડોલર પર માત્ર 'ટ્રેઝરર ઓફ ધ યુનાઇટેડ સ્ટેટ્સ'ની સહી થતી હતી. રાષ્ટ્રપતિ હોવા છતાં અત્યાર સુધી કોઈ વ્યક્તિએ પોતાની સહી નોટો પર કરાવી નહોતી. હવે ટ્રમ્પ આ પરંપરાને હટાવીને પોતાનું નામ અમર કરવા જઈ રહ્યા છે. નિષ્ણાતો માને છે કે આ નિર્ણયથી અમેરિકી ડોલરના વૈશ્વિક પ્રભુત્વમાં ટ્રમ્પની છાપ કાયમ માટે અંકિત થઈ જશે.
આ પણ વાંચો: અમેરિકાના શસ્ત્રાગારમાં મિસાઈલોની અછત વર્તાઈ : જાણો શું આદેશ આપ્યો ડોનાલ્ડ ટ્રમ્પે?
24-કેરેટ સોનાના સિક્કા પર પણ ટ્રમ્પની છબી
માત્ર નોટો જ નહીં, પરંતુ ટ્રમ્પના માનમાં 24-કેરેટ સોનાના સ્મૃતિ સિક્કા (Commemorative Coins) બહાર પાડવાની પણ તૈયારીઓ થઈ ગઈ છે. ફેડરલ આર્ટ્સ કમિશને આ સિક્કાની ફાઈનલ ડિઝાઇનને મંજૂરી આપી દીધી છે. ઈરાન સાથે ચાલી રહેલા યુદ્ધ અને આંતરરાષ્ટ્રીય તણાવ વચ્ચે અમેરિકામાં લેવાયેલો આ નિર્ણય દર્શાવે છે કે ટ્રમ્પ પ્રશાસન ઘરઆંગણે રાષ્ટ્રવાદ અને આર્થિક ગૌરવને વધુ મજબૂત કરવા ઈચ્છે છે.
સ્કોટ બેસેન્ટે કર્યા ટ્રમ્પના વખાણ
અમેરિકાના નાણા મંત્રી સ્કોટ બેસેન્ટે આ નિર્ણયને આવકારતા કહ્યું કે, ટ્રમ્પના નેતૃત્વમાં અમેરિકા અભૂતપૂર્વ આર્થિક વૃદ્ધિ તરફ આગળ વધી રહ્યું છે. તેમણે ઉમેર્યું કે, "આપણા મહાન દેશ અને પ્રેસિડેન્ટ ટ્રમ્પની ઐતિહાસિક સિદ્ધિઓને સન્માન આપવાનો આનાથી વધુ સારો રસ્તો કોઈ હોઈ શકે નહીં." ટ્રેઝરર બ્રાન્ડન બીચે પણ ટ્રમ્પને અમેરિકન ઇકોનોમીના 'આર્કિટેક્ટ' ગણાવ્યા છે.
