Trump Iran Warning: અમેરિકા અને ઈરાન વચ્ચેનો તણાવ ફરી એકવાર ચરમસીમા તરફ આગળ વધી રહ્યો છે. અમેરિકાના રાષ્ટ્રપતિ ડોનાલ્ડ ટ્રમ્પે ઈરાનને સીધી અને કડક ચેતવણી આપતાં કહ્યું છે કે, જો તેમના પર હુમલો કરવાનો અથવા તેમની હત્યાનો કોઈપણ પ્રયાસ કરવામાં આવશે તો અમેરિકા ઈરાન સામે અભૂતપૂર્વ સૈન્ય કાર્યવાહી કરશે. ટ્રમ્પે દાવો કર્યો છે કે આવા સંજોગોમાં ઈરાનને નિશાન બનાવવા માટે 1000 મિસાઈલ પહેલેથી જ તૈયાર રાખવામાં આવી છે અને જરૂર પડશે તો હજારો વધુ મિસાઈલ તરત જ છોડવામાં આવશે. ટ્રમ્પનું આ નિવેદન એવા સમયે આવ્યું છે, જ્યારે ઈઝરાયલે અમેરિકા સાથે એવી ગુપ્તચર માહિતી શેર કરી હોવાના અહેવાલો સામે આવ્યા છે કે ઈરાનના કેટલાક કટ્ટરપંથી તત્વો ટ્રમ્પને નિશાન બનાવવાની નવી યોજના પર કામ કરી રહ્યા હોઈ શકે છે. જોકે અમેરિકાની ગુપ્તચર એજન્સીઓએ હજુ સુધી આ માહિતીની સ્વતંત્ર રીતે પુષ્ટિ કરી નથી. તેમ છતાં, આ ઘટનાએ મધ્ય-પૂર્વમાં પહેલેથી જ ચાલી રહેલા તણાવને વધુ ગંભીર બનાવી દીધો છે.
ટ્રમ્પે સોશિયલ મીડિયા પર આપી ખુલ્લી ચેતવણી
ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ Truth Social પર લાંબી પોસ્ટ કરીને કહ્યું કે જો ઈરાન સરકાર અમેરિકાના વર્તમાન રાષ્ટ્રપતિની હત્યા કરવાનો અથવા હુમલો કરવાનો પ્રયાસ કરશે તો અમેરિકા સંપૂર્ણ શક્તિ સાથે જવાબ આપશે. ટ્રમ્પે દાવો કર્યો કે, 1000 મિસાઈલ ઈરાન તરફ તૈનાત છે અને જરૂર પડે તો હજારો વધુ મિસાઈલ તરત જ છોડવામાં આવશે. તેમણે એમ પણ કહ્યું કે અમેરિકી સૈન્યને પહેલેથી જ જરૂરી આદેશ આપવામાં આવ્યા છે અને જો આવી કોઈ ઘટના બને તો ઈરાનના અનેક વિસ્તારોને સંપૂર્ણપણે નષ્ટ કરવાની ક્ષમતા અમેરિકા પાસે છે.
ઈઝરાયલના ગુપ્તચર અહેવાલોથી વધ્યો તણાવ
અમેરિકન મીડિયા અહેવાલો અનુસાર, ઈઝરાયલે તાજેતરમાં અમેરિકાને એવી ગુપ્તચર માહિતી આપી છે કે ઈરાનમાં કેટલાક કટ્ટરપંથી નેતાઓ ટ્રમ્પ વિરુદ્ધ કથિત ષડયંત્ર રચી રહ્યા છે. અહેવાલોમાં એવો પણ દાવો કરવામાં આવ્યો છે કે, આ માહિતીમાં ચોક્કસ યોજના હોવાનો ઉલ્લેખ કરવામાં આવ્યો છે. જોકે અમેરિકન ગુપ્તચર એજન્સીઓએ હજુ સુધી આ દાવાની સ્વતંત્ર રીતે પુષ્ટિ કરી નથી. કેટલાક અધિકારીઓનું માનવું છે કે ઈઝરાયલ તરફથી આપવામાં આવેલી માહિતીનો હેતુ અમેરિકા પર ઈરાન વિરુદ્ધ વધુ કડક કાર્યવાહી માટે દબાણ લાવવાનો પણ હોઈ શકે છે.
આ પણ વાંચો: ભારત-ન્યૂઝીલેન્ડ વચ્ચે ઐતિહાસિક કરાર : 10 MoU અને 8 મોટા નિર્ણયોથી વેપાર-સંરક્ષણને મળશે નવી દિશા
ઈરાનના કટ્ટરપંથી તત્વો પર શંકા
મીડિયા અહેવાલો અનુસાર, કેટલીક ગુપ્તચર માહિતી સૂચવે છે કે ઈરાનની અંદરના કટ્ટરપંથી જૂથો ટ્રમ્પને નિશાન બનાવવાના વિચારોને સમર્થન આપી રહ્યા હોઈ શકે છે. જોકે ઉપલબ્ધ માહિતી અનુસાર હજુ સુધી કોઈ સક્રિય અથવા અમલમાં મૂકાયેલી યોજના હોવાના સ્પષ્ટ પુરાવા સામે આવ્યા નથી. તેથી આ સમગ્ર મામલે તપાસ અને ગુપ્તચર મૂલ્યાંકન ચાલુ છે.
હોર્મુઝ જળમાર્ગ મુદ્દે પણ વિવાદ યથાવત
અમેરિકા અને ઈરાન વચ્ચે માત્ર સુરક્ષાનો મુદ્દો જ નહીં પરંતુ હોર્મુઝની ખાડી (Strait of Hormuz)ને લઈને પણ મતભેદ યથાવત છે. તાજેતરમાં વેપારી જહાજો પર થયેલા હુમલાઓ બાદ અમેરિકાએ ઈરાનને આંતરરાષ્ટ્રીય વેપાર માટે હોર્મુઝ જળમાર્ગ સુરક્ષિત રાખવાની જાહેર ખાતરી આપવા જણાવ્યું છે. બીજી તરફ ઈરાનનું કહેવું છે કે, આ વ્યૂહાત્મક જળમાર્ગ તેના નિયંત્રણ હેઠળ આવે છે અને ત્યાંથી પસાર થતાં જહાજો પાસેથી શુલ્ક વસૂલવાની દરખાસ્ત પણ કરવામાં આવી છે.
આ પણ વાંચો: ન્યૂઝીલેન્ડમાં PM મોદીનું ભવ્ય સ્વાગત : 40 વર્ષ બાદ ભારતીય વડાપ્રધાનની ઐતિહાસિક મુલાકાત
તાજેતરના હુમલાઓ બાદ વધી અનિશ્ચિતતા
તાજેતરના દિવસોમાં અમેરિકા દ્વારા ઈરાનના કેટલાક સૈન્ય માળખાં પર હવાઈ હુમલાઓ કરવામાં આવ્યા હતા. તેના જવાબમાં ઈરાને મધ્ય-પૂર્વના કેટલાક વિસ્તારોમાં હુમલાઓ કર્યા હોવાના અહેવાલો સામે આવ્યા હતા. ત્યારબાદ બંને દેશો વચ્ચે અસ્થાયી યુદ્ધવિરામ જેવા સંકેતો જોવા મળ્યા હતા, પરંતુ તાજેતરના નિવેદનો અને ગુપ્તચર અહેવાલોએ ફરીથી સ્થિતિને સંવેદનશીલ બનાવી દીધી છે. નિષ્ણાતોનું માનવું છે કે, હાલની પરિસ્થિતિમાં અમેરિકા, ઈરાન અને ઈઝરાયલ વચ્ચે વધી રહેલા તણાવ પર સમગ્ર વિશ્વની નજર છે. આગામી દિવસોમાં રાજદ્વારી વાતચીત આગળ વધે છે કે સ્થિતિ વધુ ગંભીર બને છે, તેના પર મધ્ય-પૂર્વની સ્થિરતા ઘણાં અંશે નિર્ભર રહેશે.
