આંધ્રપ્રદેશના તિરૂમલા સ્થિત વિશ્વવિખ્યાત શ્રી વેંકટેશ્વર (તિરુપતિ બાલાજી) મંદિરે એક જ દિવસમાં દાનનો નવો ઈતિહાસ રચ્યો છે. 15 જુલાઈની મધરાત પહેલાં, જ્યારે તિરૂમલા તિરૂપતિ દેવસ્થાનમ (TTD)ની નવી ડોનર પોલિસી અમલમાં આવી રહી હતી, તે પહેલાં માત્ર 24 કલાકમાં મંદિરને કુલ ₹96.98 કરોડનું દાન પ્રાપ્ત થયું હતું. આ સમયગાળા દરમિયાન કુલ 2,460 દાતાઓએ વિવિધ રકમનું યોગદાન આપ્યું હતું.
નવી પોલિસી પહેલાં દાન માટે ઉમટી ભીડ
TTD દ્વારા નવી ડોનર પોલિસી જાહેર કરવામાં આવતા દાતાઓને મળતી આજીવન વિશેષ સુવિધાઓમાં મોટો ફેરફાર કરવામાં આવ્યો છે. આ કારણે હજારો શ્રદ્ધાળુઓએ જૂના નિયમો હેઠળ મળતા આજીવન લાભો જાળવી રાખવા માટે પોલિસી અમલમાં આવે તે પહેલાં જ દાન કરવાનું પસંદ કર્યું હતું. આ જ કારણસર એક જ દિવસમાં દાનની રકમ રેકોર્ડ સ્તરે પહોંચી હતી.
કેટલા લોકોએ કેટલું દાન આપ્યું?
TTDના આંકડા મુજબ, 2,460 દાતાઓમાંથી 1,212 દાતાઓએ ₹1 લાખથી ₹10 લાખ વચ્ચેનું દાન આપ્યું હતું, જ્યારે 1,246 દાતાઓએ ₹10 લાખથી ₹25 લાખ સુધીનું યોગદાન કર્યું હતું. ઉપરાંત, બે શ્રદ્ધાળુઓએ એક-એક કરોડ રૂપિયાથી વધુનું દાન આપીને મંદિરની આવકમાં નોંધપાત્ર વધારો કર્યો હતો.
વિશ્વના સૌથી સમૃદ્ધ મંદિરોમાં તિરૂપતિનો સમાવેશ
તિરુપતિ બાલાજી મંદિર વિશ્વના સૌથી સમૃદ્ધ ધાર્મિક સ્થળોમાં સ્થાન ધરાવે છે. અંદાજે ₹3.38 લાખ કરોડથી વધુની સંપત્તિ ધરાવતા આ મંદિરની હુંડીમાં નાણાકીય વર્ષ 2025-26 દરમિયાન ₹1,738 કરોડથી વધુનું દાન જમા થયું હતું. એટલે કે સરેરાશ દરરોજ લગભગ ₹4.75 કરોડનું દાન મંદિરને પ્રાપ્ત થાય છે.
છેલ્લા ચાર મહિનામાં 3,000 નવા મોટા દાતાઓ જોડાયા
TTD બોર્ડના અધ્યક્ષ બી.આર. નાયડુના જણાવ્યા મુજબ છેલ્લા માત્ર ચાર મહિનામાં જ ₹10 લાખ અથવા તેથી વધુનું દાન આપનારા આશરે 3,000 નવા દાતાઓ જોડાયા છે. મોટા દાતાઓની સતત વધી રહેલી સંખ્યાને ધ્યાનમાં રાખીને દાન વ્યવસ્થામાં પારદર્શિતા અને સંતુલન જાળવવા નવી ડોનર પોલિસી લાગુ કરવાનો નિર્ણય લેવામાં આવ્યો છે.
નવી ડોનર પોલિસીમાં શું બદલાયું?
નવી પોલિસી હેઠળ હવે વ્યક્તિગત દાતાઓને મળતી વિશેષ સુવિધાઓ માત્ર 20 વર્ષ સુધી અને સંસ્થાઓ તથા ટ્રસ્ટોને મળતા લાભો 15 વર્ષ સુધી જ માન્ય રહેશે. અગાઉ આ તમામ સુવિધાઓ આજીવન ઉપલબ્ધ રહેતી હતી. ઉપરાંત, દાતાઓ માટેની જૂની સ્લેબ સિસ્ટમ પણ દૂર કરીને નવી કેટેગરી આધારિત વ્યવસ્થા અમલમાં મુકાઈ છે.
દર્શનથી લઈને સ્મૃતિચિહ્નો સુધી નિયમોમાં ફેરફાર
નવી પોલિસી મુજબ હવે દર્શન, સેવા અને અન્ય સુવિધાઓની ફાળવણી સંપૂર્ણપણે ઓનલાઈન ડોનર મેનેજમેન્ટ સિસ્ટમ દ્વારા કરવામાં આવશે. સુપ્રભાત સેવા જેવી વિશેષ સેવાઓની સંખ્યા પણ મર્યાદિત કરવામાં આવી છે. સાથે જ મોટા દાતાઓને અપાતા સોના-ચાંદીના સિક્કા સહિતના સ્મૃતિચિહ્નોમાં પણ ઘટાડો કરવામાં આવ્યો છે.
આ પણ વાંચો: ડિજિટલ ફ્રોડ સામે મળશે વધુ સુરક્ષા! : RBI લાવ્યું નવું Data Governance Framework, જાણો કેવી રીતે ગ્રાહકોના ડેટાની સલામતી પર રહેશે ખાસ નજર
જૂના દાતાઓને મળશે આજીવન લાભ
TTDએ સ્પષ્ટ કર્યું છે કે નવી પોલિસી પૂર્વલક્ષી (Retrospective) અસરથી લાગુ કરવામાં આવી નથી. એટલે કે 15 જુલાઈની મધરાત્રિ પહેલાં દાન આપનારા તમામ દાતાઓને અગાઉની જેમ આજીવન સુવિધાઓ મળતી રહેશે. આ જ કારણથી નવી પોલિસી અમલમાં આવે તે પહેલાં મોટી સંખ્યામાં શ્રદ્ધાળુઓએ દાન કરીને પોતાના લાભો સુરક્ષિત કરી લીધા અને મંદિરને એક જ દિવસમાં રેકોર્ડ દાન પ્રાપ્ત થયું.
