Gold Silver Price Today (27 March 2026) : ભારતીય બજારમાં 27 માર્ચના રોજ સોનાના ભાવમાં ફરી તેજી જોવા મળી છે. ગઈકાલના ઘટાડા બાદ આજે સોનું ફરી મોંઘું થયું છે અને તેમાં 1,600 રૂપિયા સુધીનો વધારો નોંધાયો છે. જોકે, બીજી તરફ ચાંદીના ભાવમાં મોટો ઘટાડો થતાં ખરીદદારો માટે મિશ્ર સમાચાર આવ્યા છે. વૈશ્વિક બજારમાં ચાલી રહેલા ભૌગોલિક તણાવ અને ડોલરના મૂલ્યની અસર સીધી કિંમતી ધાતુઓ પર જોવા મળી રહી છે.
24 કેરેટ સોનાના લેટેસ્ટ ભાવ
શુદ્ધ સોના એટલે કે 24 કેરેટ સોનાના ભાવમાં આજે વધારો જોવા મળ્યો છે. 100 ગ્રામ સોનાનો ભાવ 1,600 રૂપિયા વધીને 14,47,100 રૂપિયા પર પહોંચ્યો છે. જ્યારે 10 ગ્રામ સોનાનો ભાવ 160 રૂપિયા વધીને 1,44,710 રૂપિયા થયો છે. મધ્યમ વર્ગમાં લોકપ્રિય એવું 8 ગ્રામ સોનાનો ભાવ 1,15,768 રૂપિયા રહ્યો છે.
22 કેરેટ અને 18 કેરેટમાં કેટલી તેજી?
દાગીના બનાવવા માટે વપરાતા 22 કેરેટ સોનાના ભાવમાં પણ 1,500 રૂપિયાનો વધારો થયો છે, જેના કારણે 100 ગ્રામનો ભાવ 13,26,500 રૂપિયા થયો છે. 10 ગ્રામ સોનું 1,32,650 રૂપિયામાં વેચાઈ રહ્યું છે. તેવી જ રીતે 18 કેરેટ સોનાના ભાવમાં 1,200 રૂપિયાનો વધારો થતાં 100 ગ્રામનો ભાવ 10,85,300 રૂપિયા અને 10 ગ્રામનો ભાવ 1,08,530 રૂપિયા સુધી પહોંચ્યો છે.
ચાંદીના ભાવમાં મસમોટો ઘટાડો
સોનામાં તેજી હોવા છતાં ભારતીય બજારમાં ચાંદીના ભાવમાં મોટો કડાકો જોવા મળ્યો છે. 1 કિલો ચાંદીનો ભાવ આજે 10,000 રૂપિયા ઘટીને 2.40 લાખ રૂપિયા થઈ ગયો છે. 100 ગ્રામ ચાંદીના ભાવમાં 1,000 રૂપિયાનો ઘટાડો થતા તે 24,000 રૂપિયા પર ટ્રેડ થઈ રહી છે. ઔદ્યોગિક માંગમાં અનિશ્ચિતતાને કારણે ચાંદી પર દબાણ જોવા મળી રહ્યું છે.
વૈશ્વિક બજાર અને યુદ્ધની અસર
સોનાના ભાવમાં ઉછાળા પાછળનું મુખ્ય કારણ અમેરિકા અને ઈરાન વચ્ચે ચાલી રહેલું યુદ્ધ છે. હાલમાં આ યુદ્ધ ચોથા સપ્તાહમાં પ્રવેશ્યું છે. જોકે, અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સાથે વાતચીત કરવા અને યુદ્ધનો અંત લાવવા માટેની સમયમર્યાદા લંબાવી છે, જેના કારણે બજારમાં થોડી રાહત જોવા મળી છે અને સોનામાં શોર્ટ કવરિંગ આવ્યું છે.
ડોલર અને ક્રૂડ ઓઈલની સ્થિતિ
નિષ્ણાતોના મતે ડોલર મજબૂત હોવાને કારણે આંતરરાષ્ટ્રીય ખરીદદારો માટે સોનું મોંઘું બન્યું છે. બીજી તરફ ક્રૂડ ઓઈલના ભાવ હજુ પણ ઉંચા હોવાથી ફુગાવાની ચિંતા યથાવત છે. જ્યાં સુધી ભૂ-રાજકીય સ્થિતિ સ્પષ્ટ નહીં થાય ત્યાં સુધી બજારમાં આવી જ અસ્થિરતા જોવા મળી શકે છે.
