2026માં યોજાનારી અસમ વિધાનસભાની ચૂંટણી રાજ્યના રાજકીય ઇતિહાસમાં મહત્વનો વળાંક સાબિત થઈ શકે છે. રાજકીય નિરીક્ષકોનું માનવું છે કે આ ચૂંટણી માત્ર સત્તા પરિવર્તન સુધી મર્યાદિત નહીં રહે, પરંતુ તેમાં સ્થાનિક ઓળખ અને રાષ્ટ્રીય રાજકીય એજન્ડા વચ્ચેની ખેંચતાણ સ્પષ્ટ રીતે જોવા મળશે. અસમ કઈ દિશામાં આગળ વધશે તે તો આવનારો સમય જ નક્કી કરશે.
વિપક્ષ સમાવેશકતાના મુદ્દા સાથે લડી રહ્યો છે ચૂંટણી
હાલમાં સત્તારૂઢ NDA ગઠબંધન વિકાસની સતત પ્રક્રિયાને પોતાનું મુખ્ય હથિયાર બનાવીને મેદાનમાં ઉતરવાની તૈયારીમાં છે. બીજી તરફ, વિપક્ષ સમાજમાં સમાવેશકતા પર ભાર મૂકતું દેખાઈ રહ્યું છે. વિપક્ષ અનુસાર, સમાવેશકતાનો અર્થ એવો સમાજ ઊભો કરવો છે જ્યાં દરેક નાગરિકને—તેની જાતિ, ધર્મ, લિંગ, પૃષ્ઠભૂમિ કે ક્ષમતાને ધ્યાનમાં લીધા વિના સમાન સન્માન અને વિકાસની તક મળે.
માર્ચ અથવા એપ્રિલ 2026 દરમિયાન યોજાઈ શકે છે ચૂંટણી
ચૂંટણી પ્રક્રિયાને લઈ ચૂંટણી પંચની ગતિવિધિઓ પણ તેજ થઈ ગઈ છે.વર્તમાન વિધાનસભાનો કાર્યકાળ મે 2026માં પૂર્ણ થતો હોવાથી, અંદાજ છે કે અસમમાં વિધાનસભાની ચૂંટણી માર્ચ અથવા એપ્રિલ 2026 દરમિયાન યોજાઈ શકે છે. એવું પણ માનવામાં આવે છે કે આ ચૂંટણી તમિલનાડુ, કેરળ, પશ્ચિમ બંગાળ અને પુડુચેરીની સાથે જ યોજાઈ શકે છે.
ઘુસણખોરી સામે લેવામાં આવેલા કડક પગલાં ચર્ચાના કેન્દ્રમાં
ચૂંટણીના મુદ્દાઓની વાત કરીએ તો, તમામ રાજકીય પક્ષો રાષ્ટ્રીય સ્તરે અનુકૂળ વાતાવરણ બનાવવા પ્રયાસ કરી રહ્યા છે. મુખ્યમંત્રી હિમંતા બિસ્વા શર્મા ફરી સત્તામાં આવવા માટે સક્રિય બન્યા છે, જેનો અંદાજ તાજેતરના સરકારી નિર્ણયોથી લગાવી શકાય છે. ખાસ કરીને રાજ્યમાં ગેરકાયદેસર ઘુસણખોરી સામે લેવામાં આવેલા કડક પગલાં ચર્ચાના કેન્દ્રમાં રહ્યા છે. સાથે સાથે NRC અને CAA જેવા મુદ્દાઓ પણ ફરી એકવાર રાજકીય ચર્ચામાં આગળ આવ્યા છે.
મીડિયા અહેવાલો અનુસાર, રાજ્યની ચૂંટણીની સત્તાવાર જાહેરાત ટૂંક સમયમાં થઈ શકે છે. અસમનું રાજકારણ હંમેશા અણધાર્યું અને ગૂંચવણભર્યું રહ્યું છે, અને 2026ની ચૂંટણીમાં પણ કંઈક અલગ અને નવું જોવા મળી શકે તેવી શક્યતા છે.
ઉલ્લેખનીય છે કે આસામ વિધાનસભામાં કુલ 126 બેઠકો છે. રાજ્યના રાજકારણ પર ગેરકાયદેસર સ્થળાંતર, વિકાસ યોજનાઓ, આદિવાસી હકો અને આર્થિક અસમાનતા જેવા મુદ્દાઓનો લાંબા સમયથી પ્રભાવ રહ્યો છે. રાજકીય વર્તુળોમાં એવી માન્યતા છે કે આવનારી વિધાનસભાની ચૂંટણી અસમના રાજકીય અને સામાજિક ભવિષ્ય માટે નિર્ણાયક સાબિત થઈ શકે છે.
