Sugar-Free Tea Options: આપણા ભારતીયો માટે ચા એ માત્ર પીણું નથી, પણ એક લાગણી છે. સવારની શરૂઆત હોય કે ઓફિસનો થાક, એક કપ ગરમાગરમ ચા મળે એટલે આખો દિવસ સુધરી જાય છે. પરંતુ, આ ચામાં રહેલી સફેદ ખાંડ ધીમે-ધીમે આપણા સ્વાસ્થ્યને નુકસાન પહોંચાડે છે. ખાંડના વધુ પડતા સેવનથી વજન વધવું, ડાયાબિટીસ અને હૃદય રોગ જેવી ગંભીર સમસ્યાઓનું જોખમ રહેલું હોય છે. આ જ કારણ છે કે આજકાલ હેલ્થ કોન્શિયસ લોકો ચા પીવાનું ટાળતા હોય છે અથવા મોળી ચા પીએ છે. પરંતુ હવે તમારે મન મારીને ચા પીવાની જરૂર નથી.
વિજ્ઞાન અને આયુર્વેદમાં એવા અનેક કુદરતી વિકલ્પો છે જે તમારી ચાને ખાંડ જેવી જ મીઠાશ આપશે અને સાથે સ્વાસ્થ્યને ફાયદો પણ કરાવશે. કુદરતી સ્વીટનર્સથી લઈને દેશી ગોળ સુધીના વિકલ્પો હવે ટ્રેન્ડમાં છે. જો તમે પણ હેલ્ધી લાઈફસ્ટાઈલ અપનાવવા માંગતા હોવ, તો ખાંડના સ્થાને નીચે મુજબની વસ્તુઓનો ઉપયોગ કરીને તમારી ચાને વધુ સ્વાદિષ્ટ અને ગુણકારી બનાવી શકો છો. આ વસ્તુઓ માત્ર મીઠાશ જ નથી આપતી, પણ ચાનો ફ્લેવર પણ બમણો કરી દે છે.
1. સ્ટીવિયા: કેલરી વગરની કુદરતી મીઠાશ
જો તમે ડાયાબિટીસના દર્દી છો અથવા વજન ઉતારવા માંગો છો, તો સ્ટીવિયા તમારા માટે વરદાન સમાન છે. આ એક છોડના પાંદડામાંથી બનેલું નેચરલ સ્વીટનર છે. તે ખાંડ કરતા અનેકગણું મીઠું હોય છે પરંતુ તેમાં શૂન્ય કેલરી હોય છે. તમે તેના સૂકા પાંદડા અથવા બજારમાં મળતા પાવડરનો ઉપયોગ કરી શકો છો. તેનાથી બ્લડ શુગર લેવલ વધતું નથી.
2. ગોળની ચા: આયર્નથી ભરપૂર દેશી અંદાજ
ખાંડના શ્રેષ્ઠ વિકલ્પ તરીકે સદીઓથી ગોળનો ઉપયોગ થતો આવ્યો છે. ગોળમાં આયર્ન અને મેગ્નેશિયમ જેવા મિનરલ્સ હોય છે જે પાચન માટે પણ સારા છે. જોકે, ગોળ નાખતી વખતે એ ધ્યાન રાખવું કે ચા ઉકળી ગયા પછી છેલ્લે ગોળ ઉમેરવો, જેથી દૂધ ફાટી ન જાય. શિયાળામાં ગોળની ચા પીવી ખૂબ જ ફાયદાકારક માનવામાં આવે છે.
આ પણ વાંચો: શું તમે પણ નકલી કેળા તો નથી ખાઈ રહ્યા ને? : આ રીતે કરો અસલી-નકલીની ઓળખ, બીમારીઓથી રહો દૂર
3. મધ: ઇમ્યુનિટી વધારશે અને મીઠાશ પણ આપશે
મધ એ કુદરતનું સૌથી શુદ્ધ સ્વીટનર છે. ચામાં ખાંડના બદલે મધ ઉમેરવાથી એક અલગ જ સુગંધ અને સ્વાદ મળે છે. યાદ રાખો કે ચા ઉકળતી હોય ત્યારે મધ ન નાખવું, ચા કપમાં કાઢ્યા પછી જ્યારે તે થોડી નવશેકી હોય ત્યારે મધ ઉમેરવું. આનાથી મધના પોષક તત્વો જળવાઈ રહે છે અને ગળપણ પણ મળી રહે છે.
4. કોકોનટ શુગર અને મોન્ક ફ્રૂટ: નવો ટ્રેન્ડ
આજકાલ હેલ્થ માર્કેટમાં 'કોકોનટ શુગર' અને 'મોન્ક ફ્રૂટ' સ્વીટનર ખૂબ જ લોકપ્રિય થયા છે. નારિયેળમાંથી બનતી આ ખાંડનો સ્વાદ થોડો કેરેમલ જેવો હોય છે, જે ચાને રિચ ટેસ્ટ આપે છે. જ્યારે મોન્ક ફ્રૂટ એ પ્લાન્ટ બેસ્ડ વિકલ્પ છે જે વિદેશોમાં ખૂબ વપરાય છે અને હવે ભારતમાં પણ સરળતાથી ઉપલબ્ધ છે.
5. ખજૂર અથવા કાળી દ્રાક્ષની પેસ્ટ
જો તમે એકદમ નેચરલ રહેવા માંગતા હોવ, તો ખજૂરને ગરમ પાણીમાં પલાળી તેની પેસ્ટ બનાવી લો. આ પેસ્ટનો એક ચમચો ચામાં ઉમેરવાથી કુદરતી ગળપણ મળે છે. આ રીત એનર્જી લેવલ વધારવામાં પણ મદદરૂપ થાય છે.
